《無啦啦多左幾個家姐同細妹Season 3》: 樂園

Ellen：「吓？你會有好提議？你成日匿係個lab入面，會知道有咩地方岩拍拖架咩？」
 
喂喂Ellen…咁講好似過份左D喎…
 
Ellie：「嗯？唔通你成日去個d咩打卡熱點就係岩拍拖，又多人又嘈，仲要毫無品格。」
 
Damn…真係不愧為孖生姐妹，你來我往，唇槍舌劍，互不相讓，火藥味好重呀…
 
原本我打算出聲勸下交，因為始終我地都仲食緊飯，唔應該嘈住哂，但坐係我旁邊既Sarah用手肘頂一頂我，仲打左個眼色暗示我唔好介入呢場「戰爭」。
 


Sarah：「條魚好好味架，食多幾舊啦啊明~」
 
我地好似搭檯咁，完全唔理旁邊呢兩姊妹嘈成點，好開心咁食埋我地餐飯。
 
之後我地五個返到偏廳，呢個時候兩姊妹已經無再嘈，但從表情判斷，我都幾sure係Ellie贏左呢場勝負，因為Ellen塊臉燶到不得了，而Ellie一臉自在，十足十一個勝利者咁。
 
Sarah：「點呀？最後決定去邊吖~」
 
Ellie：「今次就俾我話次事喇，同埋可唔可以請Sarah你地到時幫手整小小野食，因為後日可能會野餐。」
 


野餐？唔通Ellie想帶我地去郊野公園？Ellen肯定會嘈到拆天架喎。
 
Sarah：「野餐？好喎！我都好耐無試過野餐啦，Yui呀你話我地整咩野食好呀？」
 
Yui：「um...我最近學左少少日本小食，我諗如果野餐的話都幾適合既…」
 
Sarah：「嘩好啊！會唔會有個個八爪魚香腸架？我一直都好想食個個呀！」
 
Yui：「嗯，我有學啊，可以整。」
 


Sarah：「好野！~Yui你係最好既~~~」
 
佢地好似傾得好開心，我都搵唔到位介入，最後唯有弱弱地舉手，請求發言機會。
 
我：「想問…後日我有咩要準備架？」
 
面對我既提問，Ellie只係微微一笑，講左句「咩都唔洗，只要準備好個人就夠」。
 
我：「咁…我可唔可以問下我地會去邊？」
 
Ellie：「樂園。」
 
除此之外，Ellie再無透露半句，仲拖住Ellen一齊返左去。
 
雖然岩岩嘈到咁勁，不過始終都係兩姊妹黎，感情都係好好既，我諗都唔需要我擔心D乜。


 
樂園啊…？唔通她約我去迪士尼？
 
諗落都覺得自己on9哈哈，首歌都唔知幾多年前了。
 
好快就到第二日，聽日就係要去所謂既樂園既日子。
 
今日我可以話係無所事事，畢竟尋日先present完，都無乜野要搞。
 
睇左d group message見到阿輝同阿Ray已經係度激烈討論緊之後既計劃，應該要點做先可以繼續我地既大計之類。
 
雖然我好想話比佢地知我地已經pass左，但畢竟係大家姐既內幕消息，係未有正式通知之前都係唔好講好D，免得又生支節。
 
無無聊聊咁行到去廚房，見到Sarah同Yui係度整緊野食，相信係準備緊聽日既野餐。
 


見到佢地而家已經好開心，我都開始有少少期待Ellie口中既樂園。
 
希望聽日大家都可以玩得開開心心喇。