《無啦啦多左幾個家姐同細妹Season 3》: 赴約

Sarah：「起身喇阿明，差唔多夠鐘喇。」
 
嗯..？夠鐘？而家幾點啊？
 
係Sarah既聲線引領下，我迷迷糊糊咁打開雙眼，環顧四周睇下發生咩事。
 
蒙蒙朧朧既視野加上陽光既投影下，我只係隱約睇到兩位妙齡女子既身影，我諗一個係Sarah，另一個係Yui。
 
為左進一步證實自己既推測，我捽一捽眼清一清自己視野再望一次，果然係佢地兩個。
 


我：「而家幾點啊…？」
 
Yui：「差唔多十二點半喇，Ellen同Ellie好快就會黎，你差唔多要準備下。」
 
十二點半！？咁晏架喇？？點解今朝無人叫我食早餐個D架？
 
唔知係我唔小心講左出口定佢地觀察力太好，佢地居然主動解答我既問題。
 
Sarah：「見你呢排咁忙咁攰，反正今日都係下晝先出去，我地咪靜靜雞熄左你個鬧鐘，等你可以訓多陣囉~」
 


呃…係咪多謝佢地咁體貼呢…但係老實講我係嚇親多D囉…仲以為自己唔知醒，你知啦今日好緊要架嘛…
 
我：「嗯…好喇多謝你地先，咁我而家去沖個涼先喇，好快，你地都去換定衫喇。」
 
Sarah：「知道~」
 
我送左佢地兩個出房門之後就入左浴室，好好咁淋左一個浴。
 
嘩而家一無左鬧鐘就一直訓落去唔識醒，如果唔係有佢兩個叫醒我，我估我會訓到天黑添呀。
 


搞乜會咁架呢？唔通我真係好似Sarah講既咁，呢排太攰？
 
不過就算真係咁都無辦法架啦，今日咁重要，點都要捱埋落去，最多之後咪訓返兩日。
 
Um…唔應該用「捱」呢個字，同女朋友出去玩，又點可以算係捱呢？係享受先係。
 
好快我就梳洗好，換上一套輕便得黎又可以突顯我靚仔既衫走落大廳搵佢地。
 
都未行到埋梳化，就已經見到兩頂大草帽係度郁下郁下。
 
頂草帽幾時買架？之前都無見過佢地戴既。
 
今次我好肯定自己無講出口，而係慢慢行到佢地面前，睇下佢地咩打扮。
 
唔睇由至可，一睇就出事了。


 
因為真係好撚靚。
 
Sarah一件橙黃色T-shirt配搭碎花長裙，而Yui就一件簡潔既白色連身裙。
 
配埋佢地個頂草帽，不得了不得了，簡直就媲美仙女，唔係！係比仙女更靚！！
 
但我不斷同自己講要冷靜，甚至一度要深呼吸，好彩最後都冷靜到，最後無事！
 
我：「咳咳…咦幾好睇喎你地兩個，不過頂草帽邊度搞返黎架？」
 
Sarah：「多謝喎~你都唔差吖~頂草帽係係大家姐度拎架，我地見今日Ellie話要野餐，所以咪想襯返個feel囉，你睇下，我地仲準備左個籐籃黎裝野食添呀！」
 
佢一邊講一邊炫耀自己既「裝備」，十足十一個大細路，活潑又可愛。
 


至於Yui就只係含羞答答咁坐係Sarah旁邊，雙手緊緊抱住個籐籃。
 
唔，我諗D野食Yui一定整得好辛苦，一陣一定要好好試下，讚下佢既手勢。
 
蘭姨：「少爺小姐，兩位陳小姐已經到左，係外面等緊你地。」
 
就係我打量緊今日既計劃既時候，蘭姨就將兩位孖生姐妹到左既消息帶黎。
 
一出到門口就已經見到兩姐妹企係車旁邊迎接我地，Ellen就戴住副超，身穿天藍色Tee加條短褲仔，而Ellie就一件白色上衣配一條黑色短裙，可以話各有特色。
 
不過都係好靚，嘻嘻。
 
大家都無特別講D乜，好快就上左車，向Ellie所謂既「樂園」進發。
 
唔爭氣既我居然係車程途中訓著左，完全miss左沿路既風景仲有同佢地之間既閒聊。


 
到我擘大眼既時候，車已經停低左係一個室內停車場，佢地幾個亦不知所蹤。
 
我仲發現自己身上掛住一張ID Card，唔知有乜用。
 
電話亦不知所踨，而家咁既環境唯有先落車睇下先啦。
 
一落車就見到旁邊有道大門，環顧四週都唔見有其他出入口，最後唯有入去。
 
入到去發現到沿路都有Memo紙為我指示方向，唔洗諗都知係佢地既主意啦，古靈精怪，想同我玩捉依因？
 
沿途都有唔少地方需要用到我身上既ID Card，令我不禁開始思考呢度到底係咩地方。
 
又話去樂園既？呢度無一忽有樂園既feel喎老細。
 


比起樂園，呢度更似…一個實驗室？半密閉既空間，白色既燈光同地板，真係同電影入面實驗室既形象好相似。
 
到最後，我走到一度門前，讀卡器上面亦同樣有一張memo紙，但今次終於寫住「Goal」，旁邊仲畫左個心形。
 
我諗佢地應該就係門後面…掛？
 
我吞一吞口水，鼓起勇氣將ID Card拍落去讀卡器度。
 
綠燈亮起之後，面前既大門亦緩緩打開。
 
入面既景象，完全嚇左我一跳。
 
鳥語花香，草木扶疏…我係咪可以咁形容？
 
Ellie：「阿明，你黎左嗱？」
 
我抬頭一睇，發現佢地已經坐係遠處既一片草地上等緊我。
 
Ellie：「歡迎黎到我創辦既樂園。」
 
呢度…就係樂園？