樂園之旅之後既兩日,我都係陪住佢地咁過。
 
送Yui返醫院,陪Ellen Sarah兩個去行下街,又去同Ellie食下lunch,睇下佢D研究進展咁。
 
總知就係悠悠閒咁過啦,大家又開心,自己周圍去又有乜所謂。
 
做小小野就可以令大家開心,何樂而不為?
 
佢地為左氹我開心花左咁多心機,我用返D時間去陪佢地都係應該既。
 


之後可能大家又會開始忙,都未必有好多機會聚首係一齊,應該要珍惜呢段難得而又休閒既時光先係。
 
好多野唔係理所當然,想可以即刻見到鐘意既人都唔係必然。
 
點解我呢份人成日都後知後覺架呢?點解我要Anna出左國之後先明呢?
 
唉…如果Anna而家係度既話,佢會同我講D乜呢?
 
好想聽佢親口講返句「傻仔明」呀屌…
 


Ellen:「喂阿明,你電話由頭先開始不斷係度震wor。」
 
Ellen一句既提醒好成功咁將我由回憶既湖泊中拉出,返返黎現實既咖啡店。
 
我望一望電話,發現原來係阿輝佢地個group,大家係度討論緊之後既去向。
 
Eh…又唔可以話大家既…其實都係得阿輝同阿Ray係度講。
 
係喎…應該差唔多收到正式通知先係,今晚返去check下email先。
 


「再等下先啦,今日先第四日,我諗起碼都要一星期先會有通知?」
 
我就咁樣覆左佢地,希望可以以理據增加一下佢地既耐性,雖然唔知work唔work。
 
唔理lu,反正一日未有正式通知都唔知下一步應該點做。
 
我覆完個msg之後就將電話放返係枱面,抬頭望住天花板長嘆左一口氣。
 
Ellen:「嗯?又係同你夾份搞生意個班friend呀?」
 
我:「係呀你又知既?」
 
Ellen:「嘻見你覆完message個樣咁灰,唔多唔少都估到係佢地班人啦,點呀佢地又嘈D乜呀。」
 
我:「哦咁又無嘈,只係大家見咁耐都未有新消息,都想準備定另一條出路咁啫,唉最衰我而家又唔可以話佢地知其實我地已經pass左,真係頭痛…」


 
Ellen:「抵啦,一開始就唔應該遮遮掩掩,而家搞著自己啦,係咪衰呢。」
 
駁唔到,完全駁唔到。
 
無言而對,唯有飲啖野化解下尷尬。
 
Ellen見到我咁就笑左一聲,雙手放係枱,托住塊臉望住我飲野。
 
明明係為左化解尷尬先飲野,但咁樣比佢望住反而更加尷尬,都唔知應該點做好。
 
一時三刻都唔知可以做乜,最後就變成兩個人係度對望。
 
不過好彩對望唔係持續左好耐,因為Ellen好快就破防,忍唔住笑。
 


Ellen:「哎呀唔同你個低能仔玩喇,同你講樣野吖,我都想搞下生意,開間公司咁。」
 
Ellen都想搞生意!?咁突然!?
 
我:「咁你想搞咩生意?」
 
Ellen:「唔…初步係想搞間經理人公司,搵D人拍下片之類,好似澳門個間咁,但我又見呢排興電競,又想睇下可唔可以組到一隊咁…好多諗法喇總之。」
 
我:「哇聽落好大工程喎,都應該要好多錢,你D積蓄夠咩?」
 
Ellen:「呵呵我無你個份無謂既執著,我會叫Daddy支援我既。」
 
咁都比到位佢入,認真厲害…
 
Ellen:「嘛,見到你地個個都咁努力,我覺得自己都唔可以再hea落去,應該要搵D野做下。你會支持我架可?」


 
我:「梗係會啦,難得你肯做正經野喎,點會唔支持你。」
 
Ellen:「喂呀!」
 
我只係串左佢一句,就成功換領到佢既一掌,幾抵換,哈哈哈哈。
 
「個個都咁努力」..啊?我又夠唔夠努力呢?
 
再陪佢行左一陣街買下野,等埋Sarah做完Facial之後就三個人係出面食左餐飯。
 
Sarah:「做乜呢兩日你咁好興致周圍去陪我地幾個既?」
 
我:「um…趁呢幾日得閒,陪下你地,做返個稱職既男朋友咁囉。」
 


Ellen:「哦?論稱職既話你一直都唔算喎哈哈哈哈。」
 
又中箭…Ellen真係追住我黎打…
 
Sarah:「哎又唔好咁講,阿明成日都關心住我地既,好錫我地呀~」
 
總算有Sarah理解我,嗚嗚…
Ellen:「咁我又無話佢對我唔好~唔…重要既時候佢係做得幾好既~唉呀我唔識講喇!」
 
佢講講下唔知係怕醜定係發脾氣,突然就開始大啖大啖岩岩到既蛋糕。
 
原本想話「肥呀唔好食咁多」黎勸下佢,但考慮到佢情緒咁波動,係權衡各方面之後,我決定咩都唔講由佢食。
 
女仔食甜野會開心返,應該係…好事?
 
係送完Ellen返去之後,我自己去左屋企既泳池邊坐。
 
無錯,係個個泳池。
 
點解最近成日有種奇怪既感覺呢?明明所有野都好順利,但總係覺得會有阻濟,會有事發生。
 
定係我自己心入面其實係度期待緊一D野?
 
「叮!」
 
就係我差D中二病發既時候,我電話收到一封email。
 
就係個封令我地等左幾日既email。
 
我第一時間做既就係cap低封email,send出group。
 
「諸君,第二回合要開始了,做定唔做。」
 
當然,我心入面早已有答案。
 
做,一定做。