《無啦啦多左幾個家姐同細妹Season 3》: 考驗
大家得知呢個消息之後既反應可以話有D矛盾。
比較樂觀既例如浩鉻同阿嵐就覺得係一個好消息，話證明我地既努力有回報，但身為多疑大師既阿輝就覺得點解會有第二輪咁麻煩，係咪存心玩我地。
當然，最後都係前者壓倒最者啦，畢竟開心事嘛。
不過，大家都同意係第二輪審核介紹會之後出黎見下面，商量下今後既對策。
嗯…總算安撫到阿輝佢地，個心都安樂D，個口有D乾，落去斟杯水先。
半夜三更，屋企已經烏燈黑火，我一個人拎住隻杯慢慢摸黑覓路，卻係回程經過大廳既時候聽到開門聲。
咁夜仲有人未返屋企？唔通係Uncle？
好奇心既驅使下我停低左腳步，望住大門，睇下會係邊個。
結果開門既係一個女性既身影，慢慢行入黎，即係大家姐啦。
嗯？我好似見到佢後面仲有個人轉身走緊咁既？
可惜太黑，睇唔到個個人係咩樣，甚至係男定女我都分唔到。
Um…我諗係大家姐新識既男朋友？食完飯送大家姐返黎？
大家姐：「咦阿明？咁夜仲唔訓，等我呀哈哈？」
嘩…一聽到大家姐咁既語氣，就知道佢飲左酒…
我：「點呀大家姐…同男朋友去食飯就唔好飲咁多酒喇，失儀態架…」
大家姐：「唔？男朋友？咩男朋友？」
我：「咩呀，岩岩送你返黎個個喎？唔係你男朋友咩？」
大家姐一聽到我提岩岩個個身影就變得十分緊張，眼擘到大一大，好似一𣊬間將身上所有酒氣都蒸發哂咁。
大家姐：「eh…唔係，佢係…eh…公司既同事，岩岩同佢傾下你地第二輪審核既內容啫！」
哦？既然只係同事又點解會咁慌張呀大家姐。睇黎我既推測無錯，九成係佢男朋友啦。
我：「嗯，講左咁多都口乾啦，飲啖水早D休息啦大家姐。」
我遞上頭先為自己斟既水比大家姐，睇住佢大啖大啖咁飲哂成杯水，順手從佢手上接回個杯。
大家姐：「啊~~舒服哂~唔該你吖阿明，都係你最好，斟定杯水係度等我返黎~~」
eh…其實杯水係斟比我自己…不過算啦，你有用咪比你先囉，最多我自己斟過杯…
正當我轉身打算為自己斟多杯水既時候，大家姐突然叫住我。
大家姐：「如果你真係想認真去做好呢個基金申請既話，第二輪審核記得要諗多D，細心D，唔好只係在意表面。」
「大家姐可以為你做既係得咁多喇，畢竟佢…大公司要講公平架嘛~」
佢無等我俾反應就從我身邊經過，跌跌撞撞咁走上樓梯，慢慢走向佢自己間房。
大家姐咁講得，睇怕第二輪審核都有返相當既難度…
正正因為有左大家姐既提醒，我係第二日既簡介會可以話打醒十二分精神，可惜既係唔可以錄音，如果唔係我肯定會錄低佢，拎返屋企逐隻字研究。
我亦都有提醒其他人要多加留神，當然，唔係咁直接話有人叫我地要咁啦，我係用一個比較隱晦既方式講既。
不過佢地有無意識到個重要性我就唔知啦，尤其係阿嵐同浩銘，見佢兩個一直係度傻笑，好似仲沉醉係成功通過第一輪既喜悅咁。
唉，算啦由佢地啦，起碼我地仲有阿輝同阿Ray呢兩個Ace，有佢地應該還可以既。
到左公司間演講廳，粗略睇左兩眼發現除左我地之外大概仲有四組人係度，分開哂坐，自成一國。
咁即係話仲有至少四組對手…係好事定壞事呢？
無論點都好，我地而家可以做既係都只係坐低等簡介會開始。
好彩既係我地之後就再無任何後生仔既物體入黎，入黎既就只有四位公司職員，但就未見大家姐既身影。
浩銘：「唔~~上次present好索個個評判唔係度既，果個姐姐真係正到爆，如果可以有個咁既女朋友既話真係短十年命我都肯呀唔係講笑。」
呃…有機會既話應唔應該話佢知佢講個位姐姐其實就係我大家姐呢…
算喇都係不了，唔好刺激佢同令佢幻想破滅。
講返正經野先，其中一位職員已經開始講野，一黎就係代主席，即係我大家姐向大家道歉，原因係今日佢有其他公務在身無辦法親身到場同大家講解第二輪審核。
唔…？尋晚個個黑影會唔會就係呢個人呢？身型好似都match到…
算啦而家都係專心聽佢講第二輪審核既野啦，做人要識分輕重先岩。
一聽就聽左我地半個鐘，聽到我個腦都有D lag機，一時三刻都未係好消化到當中既內容。
總括而言，第二輪審核就係一個遊戲咁，公司會提供一個場地比我地五組人，我地要係入面住五日，每組都會一間獨立既居所，位置上大家互不相連。
遊戲入面會有三組物品，分別係食物券，金幣，以及幸運券。每組一開始會獲分發十張食物券以及十個金幣。
食物券，係用黎兌換一日份量既食物，亦可以選擇出售換取兩個金幣。
金幣，可以話係呢個遊戲最重要既野，佢係呢個遊戲入面既流通貨幣，除左可以用黎買幸運券之外，亦可以用黎買食物券，不過就要三個金幣。
至於幸運券，一開始並唔會提供，需要我地使用金幣去購買，售價為一個金幣，使用幸運券有機會獲得一個以上既金幣，亦會有機會咩都無。
同埋我地住既屋，每日都需要交一個金幣作為租金。
最後，仲有一個規則就係所有食物券同幸運券都需要scan背後既QR Code先可以使用，系統會記錄低，用左既券會作廢。
五日過去之後，大會就會作統計，評估每一組既表現。
以上就係第二輪審核既大概內容，大家聽完之後都議論紛紛，唯獨我地無。
因為五個人入面有兩個訓著左，兩個已經開左思考mode，而我自己就係度睇緊情況。
唔…巧妙處係邊度呢…
阿輝：「果然係想玩我地呀呢班有錢佬，而家當我地馬嬲睇我地玩求生呀？」
唉阿輝又講呢D野，不過其實我都唔係好明點解要搞到咁複雜…
阿Ray：「唔係wor，幾有意思吖，呢個所謂既遊戲其實好切合創業基金既主題。」
「用黎審查我地既能力既，呢個係最好不過既考驗，我都好佩服設計呢一輪審核既人，居然可以咁精心設計。」
阿Ray咁講得，唔通佢已經睇穿呢個game？