「係你的話,可以贏到既。」
 
佢呢句說話一直係我腦入面浮現,就好似一個水泡係泳池上浮下浮下咁。
 
好奇怪既係,呢句說話理應係一支強心針,特別係由佢呢位咁有份量既人講出黎。
 
但係我卻倍感不安,其實講真,我係由開始認真參加呢個基金個下已經有不安既感覺。
 
雖然我好想靠自己既能力闖出一片天,但我真係可以?我喎?呢幾年逢親我想做某D大事既時候一定會搞到一鑊粥,仲要人幫我執手尾,真係諗返起都怕。
 


而家就連我都唔相信我自己既決定,有乜事要做決定都徵求左身邊既人既意見先。
 
其實好多時最後都係跟住我既方向去做,但咁樣起碼自己會安心D,無咁大壓力。
 
呼…明明開頭就係威係勢,而家遇到複雜少少既情勢就即刻無左度氣,我呢個人真係無撚用。
 
有時都真係幾想一個頭撞埋牆死左佢算…
 
Ellie:「一個人係度做咩呀?」
 


Ellie既突然出現,成功將我係開始萌芽既自我毀滅諗法暫時拉一拉返出返先。
 
我:「嗯?無野呀,好夜下啦喎仲未返去既你地?」
 
Ellie:「家姐話想食甜品,於是拉埋Sarah同Yui一齊研究用光波爐整梳乎厘,好似差唔多整好喇。」
 
我:「哦,聽落好吸引,記得留D比我。」
 
我無心講出既一句說話,卻被Ellie捉到應一應。
 


Ellie:「你一味望實個泳池底,唔會係想跳落去浸死自己吖?」
 
一下就刺中星命點,個心真係寒一寒,Ellie既聰明才智真係唔可以睇少,一刻都唔可以鬆懈。
 
Ellie:「你咁既反應,即係我講中左喇?」
 
無辦法否認,又唔想親口承認,最後只好點點頭。
 
起初我以為Ellie會鬧我,點知佢咩都無講,只係坐左係我旁邊,用手輕撫我塊臉。
 
一個咁簡單既舉動,居然可以令我徹底崩潰,涙腺大解放。
 
Ellie:「對唔住呀,我居然一直都注意唔到你有咁大既壓力。」
 
「其實每個人都有脆弱既時候,就連我都有,當時亦係阿明你係我身邊扶持我,我先走得過個關。」


 
Ellie講緊既…係個時佢嫲嫲既事?

過左咁耐,Ellie佢地既嫲嫲亦早已仙遊,當時佢地傷心既畫面我仍然瀝瀝在目。
 
我個陣都無特別做D乜野,只係陪係佢地身邊,係佢地需要時提供自己膊頭咁。好普通,係身為一個男朋友,一個人應該要做既事,就好似而家Ellie對我做既野。
 
Ellie:「個次之後,我就下定左決心要研究出可以幫到大部分器官疾病既研究,亦即係我而家做緊既野。」
 
「不過係開始既時候,我都有懷疑過自己到底得唔得,迷惘左好耐,就好似你而家咁。」
 
我:「似我…?」
 
Ellie:「起初因為某D事而下定決心,開始既時候勢如破竹,好快就建立左一個初步既框架,但當準備再進一步或者遇上複雜少少既情況就會突然諗到底自己係咪真係得,我有無講錯?」
 


Ex7actly,完全就係我而家既情況。
 
我既契機係因為Anna既決定,而亦正如Ellie講既咁,開始既時候勢如破竹,好快說服到大家入伙,第一輪審核亦好順利通過。
 
問題亦隨之而來,面前呢個帶幾分神秘色彩既第二輪審核馬上就考起左我。
 
雖然聽落好似好on9,但呢份感覺就係咁on9,可以黎得好突然,令人崩潰。
 
我:「咁…個時你係點克服同堅持到架…?」
 
既然眼前有一位有經驗既前輩,梗係要請教下啦,前人既經驗係好重要架。
 
Ellie:「唔…我個時係諗返到底呢件係咪自己想做既事,因為呢個研究講緊可能要花超過十年既時間先會有成果,所以一定要係自己想做既先得。」
 
自己想做既…


 
咁樣同朋友一齊搞生意一直以來都係我既夢想,由中學已經開始…
 
我:「我諗呢件係我想做既事…」
 
Ellie:「咁就夠喇,之後就係諗點去做好件事,而唔係諗自己可唔可以做得好,兩者係有分別架知唔知。」
 
我:「嗯,我明白,只係我怕…」
 
Ellie:「放心啦,就算遇到咩事都好,你仲有拍檔架嘛,再唔好彩你都仲有我地幾個添,你唔係一個人亦唔需要一個人去面對架。」
 
「或者晨哥講既野無形中會對你構成壓力同負擔,但只要放膽去做就可以喇,好似開頭咁,不忘初心!」
 
又啱既,放膽去做…我輸左又有乜所謂喎,我都準備好後路囉。
 


我:「多謝你呀Ellie,又要煩到你黎安慰我。」
 
Ellie:「我係你女朋友,呢D野我應該要做既~」
 
我:「既然係咁,我可唔可以請你為我做多一件事?」
 
Ellie:「嗯咩事啊?我做到一定會做。」
 
我知道呢件事Ellie一定做到所以都無再多講直接行動,訓落佢大脾度望住個天長嘆左一口氣。
 
人既心,有時都幾脆弱呢。
 
不過好彩我有好既女朋友,可以幫我分擔。
 
仲要有五個。