《無啦啦多左幾個家姐同細妹Season 3》: 想法

Ray：「兩星期後先開始，都仲有D時間，大家先返去好好沉澱下，各自諗下策略，過兩日再傾下咁囉。」
 
呢個建議獲得大家既同意，特別係頭先訓著左個兩位，一聽到可以返屋企，佢兩個開心到拍哂手，完全無危機感。
 
唉算啦，呢兩個人本身已經係咁，無謂迫到人咁緊。
 
係返屋企既途中，我將頭先聽到既野一一寫落記事簿，之後再認真睇一次，諗住搵出當中既奧妙之處。
 
唔…內容好似都好直接，可以左右成績既應該大多係幸運券，可以拎到多D金幣但又有風險…
 


如果係扣除作為租金既五個金幣之後再分一半投資落幸運券度既話…
 
但呢種方法我咁快就諗到，相信其他人，甚至評判都會諗到，應該無咁簡單先係。
 
巧妙之處到底係邊呢…
 
諗諗下唔經唔覺就行到返屋企，都係唔好諗住啦，唔好將煩惱帶返屋企。
 
一入到屋企就有一陣好香既牛油味飄到我身邊，一聞就知道有曲奇岩岩出爐。
 


今日玩整曲奇啊佢地？真係多諗頭，日日都整唔同野食，過兩日唔知佢地又會整乜呢？
 
講開又講，我都肚餓啦，成日都無乜野落過肚，食下曲奇醫肚都好。
 
「唔~好香喎？有野食呀？」
 
！！？呢把聲！！咁熟既！？
 
我諗都無諗就即刻擰轉身，打算證實下到底自己既推測係咪正確，結果果然不出我所料，果然係佢。
 


藍洛晨，一個我見過最勁既人，智勇雙全，除左性格有D奇怪之外可以話近乎完美。
 
晨哥：「嗯？做乜咁樣望住我？我塊臉污糟左？」
 
我：「唔係…點解你會係度既？」
 
晨哥：「啊，咁岩我女朋友係附近有野做，我放低佢之後見仲有D時間，咪兜上黎探下你地，一陣再返去接佢咁囉，喂係咪有野食啫，我有D餓呀。」
 
我：「eh…我都係岩岩返黎咋，唔知有無得食wor。」
 
晨哥：「屌，咁仲等乜，快D入去睇下仲好啦。」
 
佢一邊講一邊搭住我膊頭，夾我行入去大廳。
 
講緊係我自己屋企，但我好似個犯咁比佢押，到底係邊度出錯呢？我都唔知，可能係因為佢獨有既氣場啦。


 
我地只係行左幾步就已經見到坐係餐檯既Ellen，佢一邊玩住電話一邊食緊曲奇，仲望住我地，側左一下頭。
 
Ellen：「點解阿明你會同#$%^&!...」
 
我：「喂食埋先講啦傻豬，你D餅碎噴到好似種子機關槍咁啦。」
 
聽到我咁講，佢個傻妹即刻捂住自己個嘴不斷咀嚼，就好似一隻倉鼠咁，好快就食完嘴中既曲奇，仲飲左啖紅茶。
 
Ellen：「點解佢會係度架？？」
 
嗯，兩三分鐘前我都有相同既問題，你會咁大反應我係可以明白既。
 
晨哥無答到Ellen既問題，反而走左去食檯上既曲奇，仲食得津津有味，唯有由我黎答啦。
 


講下講下，其餘三位佳麗都慢慢係廚房捧住一盤盤曲奇行出黎，佢地都係同Ellen問埋一樣既問題。
 
就無人care我返左黎…真係慘…
 
係一番解釋過後，我終於有機會可以食個盤曲奇，終於有野到肚，又幾好食，好香牛油味，配埋杯茶真係世界級。
 
係大家食得七七八八既時候，我拎返頭先張紙出黎想睇多次睇下有無咩新諗法，結果引黎Sarah佢地既注意。
 
Sarah：「嗯？呢D就係第二輪審核既內容啊？」
 
我：「係呀，我而家就係睇返佢地講既野，睇緊當中會唔會有乜玄機。」
 
Yui：「但係就咁睇呢D似係一個game多過考核wor…咁得意既？」
 
我：「就係呢點先令人頭痛啊…講到咁直接，要你地鬥多金幣？應該仲有其他野先係架…」


 
「雖然你大家姐已經提過你，但你識咁諗就最好啦，凡事唔好淨睇表面，眼光放遠D，試下去睇下個大局，或者會發現到更多。」
 
就係我地五個仲研究緊張紙既時候，坐係一邊嘆緊茶既晨哥忽然開聲，成功吸引到我地既眼球。
 
晨哥：「嘛，我都唔知應該點講先好，努力啦都係，我睇好你。」
 
「係你的話，可以贏到既。」
 
講完佢就企左起身，揮䄂離去。
 
留低既，就只有少少係碟上既餅碎同呢句說話。