《無啦啦多左幾個家姐同細妹Season 3》: 策略

浩銘：「哇呢度大過我屋企好多啊，乜唔係用嚟比賽咋咩，裝修仲可以咁靚既？」
 
我：「喂喂喂，我地唔係真係入camp玩架唔好太興奮，快D放好D野傾下頭先觀察到既野喇。」
 
話雖如此，但呢度既格局都真係有啲超乎我想像，我起初仲以為會係兩三個組合貨櫃泊埋一齊就算。
 
而家既感覺就好似一座度假村咁，不過可能又真係咁都未定，畢竟公司唔會痴線到專登為－創業支援基金起幾座野掛。
 
而且從現實既角度諗都唔合理啦，呢壇嘢開始左都未夠三個月，邊有可能係三個月內起好呢座村吖。
 


嗯，去睇下間屋有乜設備好過，而家電話被人沒收左，要搵下有無咩方法可以聯絡到出面。
 
你知啦，佢地五..佢地幾個無左我唔得架嘛，幾日搵唔到我一定會坐立不安，俾蟻咬咁款。
 
咦？呢度有部電腦既？旁邊仲有部好似scanner咁既野…
 
我馬上就叫左佢地幾個過嚟睇下，一齊分析下呢堆野既用途。
 
好快我地就發現呢部電腦雖然有連接wifi，但所有網頁都上唔到，全部都被程式block住左。
 


阿嵐：「哎…咩網都上唔到，咁部電腦到底有乜用呵？」
 
Ray：「我諗關鍵就在於旁邊呢部scanner啦，如果唔係就唔會將兩樣野放埋一齊啦。」
 
阿輝：「食物券同機會券都有QR Code，我估應該就係用呢部野黎兌換。」
 
浩銘:「咁不如我地即刻拎一張黎試吓？」
 
我：「唔好啦，你唔記得我地之前討論過既對策啦咩？」
 


所謂既對策，就係乜都唔做住，靜觀其變，就連食物券都要儘量保存。
 
我地之所以有咁既決定，係因為睇左規則之後預見左有三種情況，全部都係圍繞住食物券。
 
第一種，將多左出黎既五張食物券賣哂去，拎去買十張機會券搏一鋪。
 
第二種，捱一日肚餓將八成食物券賣出去，拎16蚊既優勢然後keep到完場。
 
仲有最極端既第三種，玩苦行將全部食物券賣出去，淨飲水過五日。
 
三種方法都係非常直接，目標都係增加金幣。
 
但阿嵐罕有地發表高見，話件事應該唔會咁簡單，唔會俾我地係呢度hea足五日，應該會有d event，好似RPG Game咁。
 
大家都好認同佢既講法，所以決定以靜制動，咩都唔做住，反正就算真係無野發生，我哋最後一日先賣食物券都無問題。


 
而家重點反而係先掌握對手既動向，從而去決定阿Ray講既「目標」。
 
阿嵐：「啊我留意到有一組拎住一袋二袋，十足十去camp咁，我諗佢哋應該帶左好多野食黎。」
 
我：「吓乜可以自己帶野食黎架咩，咁要食物券黎做乜？」
 
阿輝：「總係有呢D死蠢懶醒既，不過對我地黎講仲好啦，既然佢哋諗得出咁無腦既方法，一定一開始就會賣哂食物券令自己本金倍增。呢組九成係我地要搵既魚腩啦。」
 
阿嵐：「喂我搵到個夾萬喎，你地有無乜野要放入去？」
 
夾萬？岩哂啦我地仲煩緊D金幣食物券放邊好，居然有夾萬真係好。
 
我地之後就將所有金幣食物券放哂入去，除左一張今日要用既食物券之外。
 


就係我哋安置好所有野之後，浩銘又突然叫哂我哋返去電腦度。
 
原來係電腦突然彈左一個page出黎，上面有五組既金幣數量。
 
我地所有人第一時間都注意到排第一既金幣數量。
 
29個。
 
正如我地所料，果然有傻人。