《無啦啦多左幾個家姐同細妹Season 3》: 獵物

大家見到29呢個數字都非常激動，因為咁正正係印證我地既計劃非常順利。
 
但係，開心都唔可以咁早，因為而家只係岩岩開始，仲有好多變數，千其唔可以掉而輕心。
 
而且，我仲發現除咗我地呢組之外仲有一組仲係維持住9個金幣。
 
當然，咁未必代表對方同我地都有一樣既策略，一様都睇中左29個果組白癡既。
 
或者對方只係想先靜觀其變呢？但係點都好，一定要小心提防囉。
 


話哂呢個比賽係好重要，我唔想因為一時大意而令自己後悔呀。
 
不過講係咁講…而家應該做咩先好？
 
浩銘：「哎好悶呀，不如搵野玩下啦，有無UNO或者啤牌呀阿嵐？」
 
阿嵐：「有係有…但係係呢個時候玩真係好咩…？」
 
你識講呢D野咁你又帶埋黎…你擺明係睇緊阿輝面色啦。
 


在場之中一定唔只我一個係咁諗，因為我見到其他人都係度睇緊阿輝眼色。
 
企埋一邊諗野既阿輝自己都察覺到呢件事，叫我地自己玩住先，佢有D野想自己一個諗下先。
 
得到「監護人」批准既我地隨即席地而坐，開始我哋四個人有益身心智既卡牌遊戲。
 
但就算係玩緊個陣，我都留意住阿輝，佢好似心事重重，奇奇怪怪咁。
 
四條友鋤dee雖然刺激，但鋤得多都會悶既，我地鋤到咁上下都開始放慢手腳，最後仲停哂手，望住天花板發呆。
 


阿輝見到我地開始無所事事，終於停止自閉，行返埋黎我地度。
 
阿輝：「係悶既話就一齊出去行下啦，反正呢度咁大，襯有時間周圍睇下啦。」
 
大家都覺得呢個提議唔錯，就一齊出去行。
 
一出到去我地先重新發現呢度其實真係一座渡假村，周圍都有唔同既指示牌，只係未正式對外開放就被呢個計劃借用左。
 
有會所，泳池，高爾夫球場…哇都幾多野玩喎，如果開張的話應該可以搵好多錢。
 
阿嵐：「喂前面係分叉路喎，行邊度好呀？」
 
唔…一邊係高爾夫球場，一邊係會所，去邊好呢？
就係我地企係路口苦惱緊應該行邊條路先好既時候，突然有幾架高爾夫球車係我地面前駛過，直奔向高爾夫球場。
 


明明呢度應該無外人用，如果有咁多staff去同一個方向，應該就表示係關其他組事啦？
 
見到呢個情況我地都對望左一下，交換左眼神之後就決定跟上去。
 
好彩就係D高爾夫球車開得唔快，我哋慢慢行都可以跟得上。
 
係行既途中大家都討論緊發生左乜事搞到咁多staff黎哂，但始終都傾唔出一個合理既答案。
 
過左無耐，呢隊車隊就停低左，係一間同我地個間好似既屋前面停低左。
 
D staff全部落哂車衝哂入屋，無幾耐就見佢地拎住一袋二袋出返黎。
 
我地之中最八卦既浩銘係我地唔為意既時候已經閃左埋去其中一個staff到R水吹，仲傾得相當起勁。
 
不過佢都唔係傾得好耐，因為人地D staff好快就撤退哂，甚至我哋連發生咩事都未搞得清楚就已經得返我地五個傻仔係度。


 
準確D黎講係得四個，因為浩銘佢表現得好開心，好似收到D好重要既情報咁。
 
阿輝：「點呀浩銘，收到咩風？」
 
哇阿輝仲直接過我，我原本仲打算等浩銘自己講出黎添。
 
浩銘：「哦其實都無乜特別啫，佢哋話發現呢組一黎就賣哂所有既食物券，懷疑佢哋私藏左食物，所以先黎檢查下，結果真係搵到好多，就係咁囉。」
 
咪住先！？就係呢組？我哋要搵既水魚就係呢組？
 
哇咁真係得來全不費功夫呀今次，仲要大會主動查封哂佢哋既野食，幫我哋推左呢組一把，真好。
 
就係當我想將呢番見解話比我身後既阿輝知個陣，我忽然發現有一個女仔係離我哋唔遠既地方望住我哋，仲對住我笑，笑到我都有D寒寒地。
 


我會唔會…撞鬼？