第二朝所有野都按照我既計劃進行,大家都各就各位。
 
遊說就一早決定左係交比阿輝同阿Ray,所以我同阿嵐就負責掃貨,我地仲要睇埋對家幾時會到,決定幾時開始掃。
 
至於浩銘就只係需要食就可以,畢竟佢尋日mon左成日,今日就比返D輕鬆野佢做啦。
 
所有野都已經準備好哂,就只要等對方出現就可以。
 
如果佢哋會出現就好了。
 


係等待既漫長時光,難免會周圍望下,咁都係人之常情,總無可能每分每秒都可以全神貫注。
 
不過多得自己既唔專心,先比我發現到有用既野。
 
原來係bar附近有兩塊電子顯示屏,上面仲顯示住而家既比賽走勢。
 
第一仍然係27個金幣,亦即係我哋既目標啦,之後既…咦?
 
之前同我哋一樣數量個組唔見左,得返我哋個組係7個金幣。
 


咁佢地會係邊組呢…佢地又會唔會係Ashley個組呢?
 
唔…旁邊仲有一塊,上面寫住公告,但除此之外就咩都無。
 
哇如果一陣突然係呢度公佈d消息又比佢哋睇到既話就正囉,簡直就係神助攻。
 
不過又點會咁岩吖,諗多左喇陳煒明。
 
阿嵐:「阿明,佢哋行緊黎啦喎。」
 


從二樓望落去,的確發現有三個十足十pokemon入面既大力手持幾個一望就知空既袋行緊黎,佢哋既特徴同浩銘描述既一樣,個個都大大隻隻,但一睇就知道係四肢發達,頭腦簡單既類型。
 
如果係有腦的話都唔會一開始就自作聰明賣晒d食物券啦係咪先。
 
我:「嗯,咁我哋都開始啦,要爽手d。」
 
無錯,重點就係要快,如果慢少少都有機會比對方拎到物資。
 
所以我哋兩個都唔敢放慢手腳,三爬兩撥將雪櫃入面所有清空,成功趕係三個大力黎之前帶走所有野。
 
只要會所既人唔好咁勤力,咁快補貨就好了。
 
話都無咁快,身邊就有兩個staff係我旁邊經過,我即刻停一停睇下佢哋想點。
 
果不其然佢哋停左係雪櫃前面,屌唔係真係烏鴉口呀?


 
Staff A:「喂一支水都無剩既,唉屌又要補貨。」
 
Staff B:「咩呀你無睇通告咩,上頭話唔補住吖嘛,等公司個活動完左先再補,好似話廢事班𡃁仔貪得無厭係咁拎。」
 
Staff A:「真係架?喂咁返休息室hea囉。」
 
幾句交談之後,呢兩個staff就走左了。
 
今鋪真係天助我也,可以擔心小件事了。
 
之後我同阿嵐就帶住d貨開始潛伏,將接下來既野交畀阿輝佢哋。
 
至於浩銘佢都好醒,識得把握時機,用左食物券叫左一枱餸開始用餐,佢仲醒到叫埋我哋埋去食。
 


我哋見物資都收埋哂,於是就決定一齊食,咁仲可以增加影響力。
 
果然,三隻大力黎到見到雪櫃無哂野第一時間就望過黎我哋呢邊,當然我哋無理佢哋,繼續享用我哋既佳餚,仲故意大聲話好食,吸引佢哋既注意。
 
聽阿嵐細細聲講,有兩隻大力已經流哂口水,哈哈。
 
呢個時候,阿輝同阿Ray就登埸了。
 
登場第一時間要做既普遍都係一番虛偽既噓寒問暖,大力們好似唔太高興,轉身就走,
 
阿Ray佢哋又點會咁易放過佢哋,馬上就追左上去,繼續遊說佢哋,不過佢哋既對話係點我就聽唔到了。
 
但有一樣我係知道既,就係三隻大力既面色有所轉變,由不屑變成有所猶疑。
 
係呢一刻我就知道我哋既作戰成功左一半了。


 
佢哋已經咬上左餌,只要再拉一拉就可以了…