《無啦啦多左幾個家姐同細妹Season 3》: 意義

十八個金幣，放係我哋五個面前。
 
估唔到會咁順利，原本諗住佢地會夜晚先黎搵我哋買，點諗到佢哋係系統一公佈加價之後一個鐘內就搵上門。
 
佢地仲買左六個，真係完全諗唔到，原本估佢哋最多買四個，今次真係發大財了。
 
不過佢哋咁玩一玩就一定輸硬了，估唔到佢地真係餓到傻左，定係佢哋仲有咩計仔可以扭轉乾坤？
 
唔會啦，個個都大力咁款，邊可能有腦。
 


計下先，係公佈加價之前我哋買多左一張食物券，而家仲有兩張。

十八加埋而家剩低既四個，二十二個金幣，計埋之後兩日要交既租就岩岩好二十個，比起開頭多左一個Double。
 
咁的話應該可以羸？唔…我都唔係好sure…
 
啊所謂既加價既具體內容其實好簡單，就係話出面運輸出現左問題，物資唔係好足夠，逼於無奈之下只能要求參賽者用兩張食物券先可以換一日既膳食。
 
而系統亦將一張食物券既價格由三個金幣加至四個金幣，所以我地之前以三個金幣賣食物券即刻變得好抵，班大力即刻仆黎買。
 


就咁睇，全部野都仲係掌握之中，可以話今次既作戰十分成功。
 
但係排行榜除咗大力同我地之外並無任何變動，Ashley居然無任何動作？佢唔係豪言壯語咁話要贏我架咩？
 
都係要小心D好。
 
浩銘：「喂咁呢D野飲點算好？都好多下喎，得返兩三日我哋一定飲唔哂。」
 
佢指既我地係bar拎返黎既野飲，數量實在太多搞到而家成堆堆哂係度。
 


唔…的確呢個都係一個問題，無理由最後帶埋d野飲走咁白痴架？
 
如果真係飲唔哂既話…還返俾間bar囉？
 
阿Ray：「關於d野飲呢，我有個諗法，但想浩銘你幫我打聽下而家排第二個組係邊組。」
 
阿嵐：「你想搞乜？」
 
阿Ray：「無，係而家呢個情況之下我諗到一個可以更有效運用呢d野飲既方法。」
 
有效？唔通佢打算賣？
 
阿Ray：「睇阿明你個樣，我諗你已經估到我想點做架啦？」
 
我：「你唔係打算將D野飲賣出去換金幣呀？」


 
阿Ray：「exactly，而且我仲已經計好左搵邊隊開刀。而家只要等浩銘搵埋…」
 
浩銘：「我知道呀，嗱就係呢兩度，兩組都係全女班既，第二個組既特徵就babababa…」
 
真係好佩服浩銘既收風能力，明明只係短短幾日既時間居然可以摸清所有對手既位置，特徵等等，如果呢度有網絡可以用的話，我諗佢肯定可以起埋人地底。
 
就係我一邊感嘆既時候，阿嵐就拍拍我背脊，表情仲十分困惑。
 
阿嵐：「仲去賣啊？唔覺得好麻煩咩…」
 
我：「咁如果可以賺到多d又真係應該去做既，而且咁做唔只可以幫我地加到金幤，仲可以減少到我哋對手既，咁先係呢個比賽既意義，我哋之前都有討論過架？」
 
無錯，呢個諗法係第一日，呀唔係，應該話未正式開始之前我地已經有所共識，我哋所有既行動都係按住呢個方針去做。
 


係呢個比賽下，正途既賺錢路徑係非常有限，就只有兩至三個方法，咁亦代表如果心水唔清，大家所做既野都會係大同小異，例如賣食物券。
 
而食物券呢樣野又設計得十分鬼馬，故意俾多五張你去誘導你賣食物券俾系統去賺錢，
 
至於要賣幾多，我哋相信呢度又係一個考驗去分參賽者既高低，睇下會唔會有蠢材一口氣就放哂所有食物券，就好似大力佢哋咁，落得近乎無法翻身既地步。
 
配合一連串既活動，食物券既價值變得愈來愈大，例如轉售，但一開始就賣哂佢哋既人就無辦法利用呢份價值了。
 
呢個時候，勝負既差距亦同時拉闊左。
 
我哋估計，呢個比賽唔只考參賽者賺錢能力，仲考埋佢地識唔識觀察局勢。
 
唉真係諗起都覺得心很累，到底係邊個仆街設計架…
 
雖然係攰，但之後我地都繼續頂硬上，相討之後既分工，最後我獲分配既居然係看門口。


 
理由係要有人守住辛苦得黎既金幤，以防有人黎偷。
 
講係咁講，但其實我好清楚佢哋係想我可以休息下。
 
不過一靜落黎，個腦就無法控制開始自行運轉，諗好多野。
 
唔知佢哋幾個呢幾日點黎，有冇掛住我呢？肯定係無啦，佢哋幾個肯定自己玩得好開心啦。
 
過多兩日…唔係，過多日半就可以見佢哋，諗起就開心，唔知道到時我可唔可以帶勝利返去呢。
 
要嬴的話…真係要好好掌握Ashley既動態先得，佢肯定會殺我一個出奇不意…