《無啦啦多左幾個家姐同細妹Season 3》: 終局

所謂既摧毀我，赢我，就係要靠搶我個组既金幣去達成？
 
我：「你認為我會乖乖地好一聲將所有野比哂你咩？我都話過呢場比賽對我…」
 
Ashley：「對你有乜意義完全唔重要，我要贏，就係咁簡單為左咁我咩手段都可以用。」
 
佢一邊講佢既偉論一邊拔起插係一邊既生果刀，仲慢慢向我迫近。
 
佢認真架？唔係真係諗住捅死我呀？殺人犯法架喎！？
 


面對已經失控既情況，我一時間都唔知可以點做，加上佢又有刀在手，我只好一步一步咁向後退。
 
Ashley：「哦？識驚啦咩？唔想死既話就快快手交哂出黎。」
 
快D諗下計呀，轉下啦我個死人腦！性命攸關架今次！！
 
我：「之前你滿口豪言壯志話可以打敗我，估唔到係用呢把生果刀去做到喎？」
 
屌，我係咪傻撚左，佢情緒已經唔多穏定，我仲走去用激將法，一陣佢真係捅死我咁真係喊都無謂。
 


唔係，到時連喊都做唔到了。
 
但無諗過呢招居然有奇效，佢居然停低左，係原地揮舞手上既刀。
 
Ashley：「老實講，我原本都唔想用呢D低招，但無諗到你比我想像中醒目，居然先我一步做哂我一早諗好哂既計劃，徹底封死哂我既路。」
 
「啊唔係，應該係你個班朋友勁先岩。」
 
「你永遠都係咁，一味靠運同身邊既人幫手，自己就可以一帆風順，真係令人作嘔，點解呢個世界可以有你呢d咁無恥既人存在？」
 


屌那星，到底點解佢會咁憎我，我無印象有做過咩傷天害理既事喎？
 
咪住先，佢話我哋先佢一步做哂佢既計劃？即係話佢同我哋有一樣既Plan？
 
Ashley：「廢話講得太多啦，你交定係唔交？」
 
大獲，拖唔到好多時間添…
 
佢再一次向我步步進逼，而我今次已經再無退路，身後已經係一幅厚實既牆。
 
正當佢要向我揮刀襲來既時候，我眼前突然有一個黑影閃過，仲打中左佢，幫我稍稍拉開同佢既距離。
 
我當然唔會放過呢個機會，即刻跑返去廚房門口，諗住可以拎多D空間比較容易避開。
 
而係我走左出去個一刻，我先發現原來阿輝佢哋四個已經返左黎。


 
我再望返去頭先係我眼前閃過既黑影，原來係一罐咖啡，睇黎係出自阿輝呢位自稱學界鏢槍冠軍既手。
 
阿Ray：「喂喂喂，拎住把刀好危險架小姐~有咩事都放低把刀先再講啦。」
 
見到人數既差距，形勢突然變得對自己壓倒性不利既Ashley只係拋低一聲「嘖」就從窗口跳左出去，一下就消失左係我哋眼前。
 
係佢走左之後我先敢鬆一口氣，仲幾乎成個人攤左係度。
 
阿嵐：「個女仔咩人黎架？居然想用刀捅阿明，浩銘你有冇咩印象？」
 
浩銘：「唔…我呢幾日好似都無見過呢個人，講返正經野先啦，阿明你有冇邊度整親？」
 
我：「啊…咁又無，好彩你哋黎得及時囉。」
 


阿輝：「佢有冇話黎係咩目的？」
 
應該要點講先好呢…要避重就輕先得…
 
我：「佢想要我哋手上既金幣。」
 
聽到我咁講，佢哋幾個都呆一呆，大家你眼望我眼。
 
浩銘：「哇為左蠃比賽居然諗住擢人命好似over左啲喎，我哋洗唔洗向大會投訴下？」
 
我諗左一陣，最後以我哋無證據為理由回絕左呢個提議。
 
畢竟如果煲大件事的話可能會引發出好多事端，到時要處理就頭痛了。
 
之後我問返大家既情況，發現大家都好勁，所有帶左出去既飲品都成功賣出，又執多幾個金幣。


 
所有野都好順利咁朝我哋既方向進發，最後既食物券都係第四日用左，預祝我哋既勝利，大家都食得特別開心。
 
係當晚我哋想睇下最新既戰報，點知系統已經關閉，估係為左增加神祕感，等最後先揭曉邊個先係嬴家。
 
點都好，聽日都會係最後一日。