《無啦啦多左幾個家姐同細妹Season 3》: 勝負
「喂起身啦阿明，天都光哂，差唔多夠鐘啦。」
嗯…？夠鐘？嘩屌個頭好痛，早知唔同佢哋癲訓地板啦…
無錯，我哋五個大男人圍住張茶几飲野傾計傾到好夜，仲玩起True or dare添。
好彩既係都無幾可轉中我，而且佢哋問既問題都係d好少既事。
唔…其實我心入面可能想佢哋問深入D，等我可以有個好機會同佢哋講哂所有野。
或者…睇黎而家仲未係一個好timing?
大家梳洗左一番之後再次聚集係茶几四周，大家你眼望我眼，好似係度搵緊人開口。
最後呢個重任由我承擔左，我做左第一個開口既人。
我：「係時候啦..？去夾萬拎野？」
大家都紛紛贊成，於是我哋五個人就一齊去夾萬度拎出呢五日令我哋頭痛萬分既金幣。
最後我哋既戰績係二十三個金幣，多得賣野飲令我地又多三個金幣，真爽，多得佢哋諗到呢條計。
而家滿手都係金幣就令我地諗起《幪面超人OOO》既Ankh，佢成日都係咁樣拎住Core Medal，以前仲周不時拎幾個五蚊銀扮佢，諗返都覺得自己傻。
嘛，話題扯遠左少少唔好意思啦，總之我哋就帶住呢袋金幣去大會指定既地方。
但我哋無諗過我哋咁遲起身都仲可以係第一組到，都唔知其他組到底做乜，一d時間觀念都無既。
不過都唔係過左好耐，佢哋就一組接一組咁黎到，個埸好快就熱鬧起黎。
有人面如死灰，亦有人神彩飛掦，似乎對結果相當樂觀。
而我就只係一直搵Ashley既身影，但根本搵唔到。
果然係咁啊…佢果然唔會用真樣出現係度，所以浩銘先話對佢個樣無印象。
其實我一直以來見既可能都唔係佢既真樣，Ashley呢個名都可能係假。
啊…只係諗都覺得頭痛…快D完左呢件事佢啦好嘛。
仲有人等緊我架…
Ashley既事暫且拋開唔諗等我地先回到現實。係工作人員紛紛到達之後氣氛明顯有所改變。
空氣開始凝重，各人減少閒聊，大家既目光全部都投放係司儀身上，期待佢打開呢個局面。
司儀：「各位好，呢五日都辛苦哂大家啦，大家都好努力，咁事不宜遲，就請各組而家上交剩餘既金幣俾我哋既工作人員統計啦。」
明明好正常既措辭，卻引起大家既騷動，其他組都係度議論紛紛，甚至有幾個個樣十分錯愕，搞到司儀自己都一頭霧水。
唔…？點解大家會有咁反應既？收金幣好正常啫？
阿輝：「哦~睇黎有D意思囉。」
？？？你up乜呀阿輝？你知道d乜？
正當我想問下阿輝佢到底參詳到d乜既時候，一個其他組既四眼手忽然舉手發言，哇屌你考dse口試咩仲舉手。
不過重點唔係呢度，重度係佢講既野。
「你哋今朝唔係已經派人黎收左我哋既金幣咩？」
哦，我明阿輝諗到咩了。
九成又係佢搞既鬼啦。
當然，司儀即時否認左四眼仔講既說話，表示並沒有委派任何工作人員到各組收集金幣。
此話一出，大家既情緒就更加激動了，因為咁就即係代表住佢哋俾人呃左，自己辛辛苦苦捱左五日得黎既成果居然係最後一日就咁比人光明正大偷走左。
所以激動都係正常，唔難理解。
阿Ray：「喂記住跟住落黎唔好亂講野，唔係，直頭唔好出聲先岩。」
細心一諗阿Ray既說話其實十分合理，因為我哋手上仍然有金幣，而且仲可以算係一個大數目。
如果我哋唔謹言慎行的話，矛頭就有可能指向我哋度，佢哋會懷疑會唔會係我哋用計呃哂佢哋既金幣。
我諗呢個或者都係Ashley既目的，估唔到佢仲有呢一手，應該又係用佢個塊mask啦，真係好使好用。
講返正題，對於呢個事件，司儀表示無能為力，亦唔會為受影響既參加者補發金幣。
理由十分簡單，直到呢一刻比賽都仲算係繼續緊，你地要為自己行為負責，對方略施小計就輕鬆奪得你哋珍而重之既金幣係你哋自己問題。
呢句說話可以話刺中佢哋既痛處，即時無人反駁到，全場靜哂。
司儀：「好，咁如果仲有組係持有金幣的話，請派一位代表前黎。」
我地幾個四目交投，用眼神相討應該點做先好，最後達成左共識。
推左浩銘出去交錢。
無辦法啊因為總要交出d金幣架嘛，我哋又問心無愧，怕乜啫。
雖然講係咁講，但我哋都察覺到其他人以不懷好意既目光望住浩銘，睇怕都係懷疑係我地做既。
但除咗我哋之外，仲有一組都一齊上交左金幣，係一組全女班。
佢應該就藏身係呢一組入面啦…
幾個工作人員接過嚟我哋既金幣之後並無馬上點算，只係畫上記號就拎左入後台，叫大家等等，話結果好快就會公佈。
但呢段等待期間對我地黎講簡直就係酷刑，要無辜受其他人既恨意，其他人既眼神好似想殺左我哋咁。
我哋就係呢個咁緊張既環境之下等待，直至司儀接過一張卡紙，表示已經收到賽果，直接將呢種氣氛推上最高點。
司儀：「好，雖然過程中出現左少少波折，但點算已經順利，結果亦已經係我手上。」
「先公佈金幣數量先，根據有上交既組別既數量呢，Group 3總數為23個金幣。」
無錯，呢個係我哋組。
司儀：「而Group 5則有43個金幤。」
43個咁多！？三組加埋既數量居然有43個咁多？
司儀：「而我係度宣布本次比賽結果，勝出既組別為…」
無啦，輸左，差距太大。
我望向旁邊既各位，大家都面如死灰，就好似「他一直在玩命.jpg」咁。
唯有用plan b啦，或者都係好事，藉呢個機會向佢地坦白。
「恭喜你哋，Group 3。」
…？
我有冇聽錯..？