《無啦啦多左幾個家姐同細妹Season 3》: 回家

「血液報告同檢查都顯示一切正常，你可以出院架啦。」
 
簡單既一句說話就為我結束了兩日既額外住院生活。
 
無錯，我終於可以返屋企了。
 
返屋企第一件事應該做咩先呢？老實講我唔知道，而家個腦都一片空白，知道有好多野要處理，但根本唔識排次序，唔知應該做邊樣先好。
 
出院既時候咁岩佢哋五個都有野做，Anna要陪佢父母，Ellen同Sarah約左人傾開公司既事，Yui要去實習，而Ellie就要返實驗室，真係有冇咁岩呀？
 


不過換個角度諗，佢哋都有正經野要忙，都係一件好事黎，算啦。
 
就係咁，我要自己一個拎住一袋二袋出院，好彩仲有司機接我，如果唔係我都唔知點算好。
 
係返屋企既途中，司機華叔同我傾左好多，不斷問我身體點，有冇見好D之類。
 
雖然語氣係比較長氣，但都感覺到佢係好關心我，好似一個老豆，唔係，應該更似阿爺關心孫仔咁。
 
如果我老豆仲係度既話，唔知佢會唔會咁樣關心我呢。
 


唔係話曹Uncle對我唔好，老實講佢對我已經好好，俾咁大間屋我住，仲話要交間公司比我，基本上佢可以比既都願意比我。
 
但係有時我又會覺得差咁D野，父愛好似唔應該只係得物質上既供給。
 
算啦，都係我太貪心啫，得一就想二，同班死港女有乜分別。
 
唔覺唔覺就已經返到屋企，我無即刻入屋，而係企左係屋外望左一陣。
 
呼…入去啦都係。
 


深呼吸左一下之後，我鼓起勇氣推開好耐無掂既屋企大門，大步行入去。
 
所有野都無變，廢話，兩星期咋嘛，可以變D乜。
 
不過我仲仍然記得自己離開呢個大門之前同自己講過d乜。
 
我話過下次返黎既時候一定要係贏住咁返黎。
 
好彩我做到，雖然途中係有好多波折，但總算係贏到，達成到對自己同佢地既承諾。
 
咦，咪住先？我記得Ellie買左條好靚既裙話用黎慶祝我嬴左，咁而家我咪有機會睇到？？
 
嘩屌，真係諗下都興奮，唔知幾時先會搞慶功宴呢？好想快D睇到。
 
啊係wor…而家Anna返左黎，希望趕得切係佢走之前搞到啦，想大家可以開開心心聚埋一齊。


 
好，等我呢兩日催下佢哋叫佢哋快D安排下先，不過咁好似有D奇怪，身為主角既我走去叫人快D為自己舉辦party。
 
「返黎嗱？過黎飲啖湯先啦，專登煲比你架，補血架。」
 
唔洗問都知道講呢番說話既人係我老母啦，係佢同蘭姨先識煲呢D香噴噴既老火湯。
 
果然，望向飯廳就見到阿媽捧住碗湯向我走埋黎，我亦乖乖就範，做個乖仔坐低係梳化接過碗湯。
 
我：「岩岩返到黎衫都未換就要我飲哂碗湯呀？」
 
媽：「哎衰仔叫你飲就飲啦咁多野講，呢排都無乜湯水滋潤，補下啦。」
 
係講得有D道理，雖然係渡假村既時候好好伙食，但我好耐都無飲過老母煲既湯了。
 


加上我又有d餓，所以碗湯好快就比我飲哂了。
 
而且如果我唔飲哂既話都無辦法開展之後既對話。
 
我緩緩放低碗，嘆左一口氣，暗嘆一句好飲之後開口。
 
我：「有冇野想同我講？」
 
媽：「無啊，有乜好講啫，點呀要唔要多碗湯？」
 
我：「我搞成咁返黎仲以為你會鬧我添。」
 
媽：「唉有乜好鬧吖，呢幾年都慣架啦，係就係會擔心，但人無事返到黎就可以，最重要係返到屋企。」
 
我苦笑左一下，老母呢幾年講野有道理左好多，係因為年紀大左睇野唔同左吖定係真係收心養性左呢？


 
媽：「好啦我都唔阻住你哋班後生仔啦，廚房仲有湯，想飲就叫蘭姐裝啦。」
 
你哋「班」後生仔？
 
就係我思緒緊呢句說話既含意既時候，廚房就傳黎一陣吵鬧聲。
 
而一向好奇心極重既我當然會想行去睇下到底係咩事，當我行到入廚房既時候，成個人呆左係度。
 
佢哋五個居然係哂度…仲煮緊飯…
 
佢哋又話唔得閒既…