《無啦啦多左幾個家姐同細妹Season 3》: 重逢

我無辦法相信自己雙眼，唯一識做既就只有不停捽眼，想驗證下到底係咪自己眼花。
 
但就算我再用力捽都好，始終都無辦法將佢既身影抹去，佢仍然大大個人企左係我面前，仲叉住腰望住我，似乎已經開始對我有D不滿。
 
我：「Anna…?」
 
Anna：「點呀傻仔明，死得未呀？」
 
我：「你真係Anna…？你唔係應該係英國架咩？點解你會係度？」
 


Anna：「哼都唔知係因為邊個囉！好地地參加個比賽都可以中毒暈低入醫院！」
 
佢意思唔通係…佢係因為知道我有事所以先專登係英國飛返黎？？
 
當我仲思考緊有冇咁既可能既時候，估唔到Anna既耐性已經去到極限，佢既殺氣已經散發哂出黎，仲衝左埋黎捉住我衫領。
 
Anna：「係呀on9！知道你出左事我就即刻係個邊諗辦法撲返黎啦！」
 
喂屌…我都好肯定自己無講出聲架喎…點解你會知道我諗咩架大佬…
 


而且…你講還講唔好喊先得架…咁耐無見你一黎就喊你叫我點啫..
 
我對發生得太突然既呢一切唔識點俾反應，識做既就只有伸手去掃佢個頭。
 
我：「對唔住囉…唔好喊啦好無？要你擔心真係唔好意思呀Anna哥…」
 
屌那星咁搞到我都喊添…
 
Anna：「仲咁叫我！衰人！」
 


佢居然仲有空間可以揮拳…哇屌無見一排佢D拳仲係咁好力水既！好撚痛呀師父！
 
大佬呀咁樣食你一拳的話我肯定要訓多一個禮拜醫院啦…我仲想要照多一次X光睇下D肋骨有冇裂到添呀…
 
不過…今次係我唔岩，硬食左佢算啦唔好怨啦。
 
嗯？其實係咪我唔岩？我都係俾人暗算架喎，唉算啦唔諗太多啦頭都痛埋。
 
而家…就暫時放低，好好珍惜呢段時間先啦，畢竟…我都好耐無見佢哋啦？
 
六個人一齊既時光，唔係咁常見架。
 
雖然我已經醒返仲好精神，但有鑑於我呼吸仍然有D唔𣈱順既關係被要求住多兩日院，順便等埋驗血報告再作決定。
 
所以呢，我仲要訓多兩日醫院，無得走，真係麻煩，如果俾Ashley知道呢個消息又黎搞我一鑊咁我咪同一塊砧板上既豬扒無乜分別。


 
屌話時話，佢到底係點令我中毒？我真係R爆頭都諗唔出佢係點做到。
 
哎屌，明明話左唔諗，但佢哋一行開左得返四幅牆係我身邊既時候又忍唔住諗返起呢件事。
 
好在Anna同Ellie係呢個時候返左入黎，成功幫我分散注意力。
 
機會難得，我亦立即決定開個話題傾下。
 
我：「咦咁Anna你幾時會返去？」
 
Anna：「做咩呀？咁快就想我走呀？你都未出得院我邊放心返去呀明哥？」
 
哇又唔洗起哂槓既我都係隨口講下啫…
 


我：「唔係…關心你既學業啫，如果因為我既關係影響到你既學業既話我會好過意唔去架~~」
 
Anna：「哼我信你有咁好心呀會關心我，兩星期啦，我請左假兩星期後就返去。」
 
得兩星期咋…？
 
可能我咩事都放哂係我臉上，心情都比佢哋睇穿哂，Anna主動行左埋黎彈左我額頭一下。
 
出奇既係明明係佢出既手，我卻唔覺得痛。
 
Anna：「係有兩星期，唔係得兩星期呀傻仔明~」
 
唔知點解，一句咁簡單既說話居然可以令我個心熱到可以煎蛋咁。
 
說話既藝術真係厲害。