《無啦啦多左幾個家姐同細妹Season 3》: 舊友
大家姐講得都岩，係應該花D心思先係。
就決定同佢地去搵阿惠個衰仔啦，敍下舊應該會幾開心。
係洗個臉之後我就換過套衫再返落去大廳，已經見到佢地四個坐左係梳化度睇緊電話又或者雜誌。
無錯得四個，Ellie並唔係度。
我：「做乜坐哂係度既各位靚女？」
Anna：「咪就係等緊你訓醒囉陳生。」
等我？嘩真係受寵若驚呀，惶恐呀Anna哥。若然你叫到的話我即刻醒比你睇都得啦係咪先。
當然，我無將上面個句野講出口啦，只係一句Anna哥就已經夠我死十次，我又點會敢講出口，我既回應就只係一個傻笑。
我：「我原本係打算訓醒再去搵你地架，因為尋晚通頂，今朝食早餐個陣好好好眼訓。」
Ellen：「我都係咁諗架，但係Sarah叫我過黎等你既。」
我：「Sarah？點解呀？」
Sarah：「吓我諗住你訓醒之後會帶我地出去吖嘛，咁咪叫定佢地黎，可以第一時間出發囉~」
哎…心情有D複雜不過無乜所謂啦，反正都係會去搵佢地。咁都可以慳返D時間既。
Anna：「所以阿明哥仔，我地今日要去邊？」
真係好彩，如果唔係一早諗好左的話就企左係度答唔到，到時又會俾佢鬧。
但係！！就係因為我有準備！！所以我擺出一副勝利者既姿態講出呢句說話。
我：「去探下舊朋友。」
起初佢地都唔明我咁講到底係咩意思，直至我帶佢地去到阿惠度。
個衰仔間鋪揀左係尖沙咀既樓上鋪，係主打台灣牛肉麵，老老實實都幾大間，我諗租金都唔平，虧佢做得住，係幾好野喎衰仔。
Waitess：「你好，請問幾多位？」
我：「五位吖唔該你。」
Waitess：「好，呢邊吖。」
呢位侍應好快出黎迎接我地，將我地引領到一張大枱，不得不提，呢位小姐幾靚女，阿惠識請人喎。
Anna：「喂唔好掛住𥄫女啦，你約左人係呢度等？」
啊仆街，差D唔記得左正經野添嘻嘻。
我：「可以咁講啦，佢應該已經到咗架喇，唔該！~」
Sarah：「已經到左？係邊度吖？」
佢哋幾個聽見我咁講都四周圍望，嘗試睇下附近有無熟人，但就只有頭先個位侍應小姐走埋黎。
Waitess.：「係你好，請問有咩可以幫到你？」
我：「我想見你地老闆。」
一聽到我咁講呢位姐姐成個人就開始慌，不過咁都正常既，換轉係我，個客坐低無耐就話要見老闆我都會諗係咪自己問題啦。
Waitess：「唔好意思…老闆未返，不過老闆娘係度我而家就去叫佢出黎吖，請你等等。」
咪住先，老闆娘？喂我要搵既係你老闆呀大姐，如果一陣老闆娘出到黎係我唔識既人咁咪好尷尬？
Yui：「你話個舊朋友就係呢度老闆？」
我：「呃…係呀，不過佢咁岩好似唔係度，仆街喇今次…我唔知我地識唔識佢而家個女朋友。」
Anna：「唉頂你真係低能架喎，唔係應該一早通知聲人先黎架咩！邊個黎架快D打個電話…」
係Anna火力全開既時候，有一個身影慢慢接近緊我地，但焦燥不安既我地並無注意到，其餘三個又掛住睇menu，根本留意唔到有人黎。
「你好，請問有咩…咦？」
直至人地開聲，我地幾個先恍然大悟，但當見到呢位老闆娘個陣，我地卻一句說話都講唔出。
因為呢位老闆娘我地大家都識，佢就係Kathy。
佢係呢度老闆娘..？咁唔通佢同阿惠個衰仔…？咦佢隻手仲有隻戒指？嘩唔係掛…
Kathy：「你地…點解會黎既？搵阿惠？」
我：「嗯…原本打算黎搵佢傾下計敍下舊，不過佢好似唔係度，睇黎我黎得真係唔係時候。」
屌點解D對話咁大台八半劇風格既…媽好尷尬呀…阿惠你條仆街死撚左去邊呀…
Sarah：「阿明阿明！我想食呢個炸地瓜條呀！之前睇電視見過，D人話好好食！」
Ellen：「咩呀，係地瓜球呀！地瓜球先係最好食！」
Anna：「唉呀你兩個靜少少啦，呢度唔係屋企呀小姐…」
係就係大聲D，不過的確有效減低尷尬既，Kathy都笑左出聲，仲向我地推介呢度有乜好食，好有老闆娘既風範。
有呢幾位小姐係度，野食又點會叫得少，只係小食就已經叫左半枱，仲未計一人一碗麵。
不過無所謂啦，佢地食得開心幸福就夠。
係野食黎齊無耐之後Kathy亦主動返黎坐低同我地傾下計，係阿惠未返黎之前同我地講下呢幾年佢地既事。
呢幾年阿惠一直照顧住Kathy，而係上年佢地決定一齊搏一𡆇鋪開左呢間牛肉麵店。
起初既經營的確有所困難，但佢地兩個一齊捱，總算捱得過，而家仲有人投資落去幫佢地手，生意叫做上左軌道。
真好呢，呢D咁既生活真係幸福，我都想要呢D。
Sarah：「咦你戴左戒指既？你同阿惠結左婚？」
一提到戒指既事，Kathy馬上變到滿臉通紅，頭都抬唔起。
大慨係怕羞，唔想俾我地睇到佢幸福既樣啦。
Kathy：「佢係兩個月前左右同我求左婚…」
吖阿惠你條友…係幾好野喎。
正當我想開口祝福佢既時候，就有一個人走左入黎，仲氣喘喘。
Sorry我要更正一下，係一個on9走左入黎。
無錯，個on9就係阿惠。
阿惠：「喂大佬明，我地好耐無見喇哈哈..」
on9。