《無啦啦多左幾個家姐同細妹Season 3》: 行動

結果係點？咪係我被Anna鬧左一餐，仲係Yui幫我搽藥個陣鬧。
 
內容都係鬧我傻，做乜唔走要係咁擋，情緒仲相當激動，聲淚俱落。
 
不過我唔後悔呀，雖然係有D痛，但我起碼保護到佢無穿無爛毫髪無損，咁就已經足夠。
 
今次幾好吖唔洗入醫院，果然鍛練身體係有用，我就知道有朝一日我又會遇上呢D野，唔我真係醒目。
 
仲行得走得，ok啦算係咁，而且我見到佢地既車牌，仲有條友把聲我好似係邊度聽過，應該可以成為一條線索。
 


Anna父母都有黎探我，話好多謝我咁保護佢個女，仲話會派人去查到底係咩人咁大膽居然敢襲擊佢個女。
 
睇黎佢唔知道對方係衝住我而黎…應該係Anna無同佢講？
 
算啦，我唔想理呢D小事住了，而家應該要專心一致搵出班人。
 
我總感覺呢班人同Ashley係有關係，甚至係同一班人，因為佢地講既野都十分相似。
 
而且考慮到Ashley擁有既高科技產品，好難相信可以只靠一個人既力量得到，背後應該有一隊團隊先係。
 


嗯…如果係咁的話，車牌九成係假…但起碼可以…
 
Anna：「唔得！我唔走住！至少都要搵出個班人先！」
 
嗯？做咩事Anna會突然同Ellie嘈起上黎？佢地平時相處得幾好架…
 
聽D對話內容應該都係因為呢單野，Anna想留到件事結束後先返英國，但Ellie就認為無咁既必要啦。
 
今次我就同意Ellie既睇法，Anna已經因為我請左兩星期假，無必要因為同一件事再延遲，咁會好影響到佢既學業。
 


我唔想自己成為一個負累。
 
於是我叫左Anna過黎自己身邊，牽起佢隻手，忍住痛盡量擠出笑容。
 
我：「聽Ellie講，返去啦我搞得掂。」
 
Anna：「搞得掂？但係你睇下你自己而家咁既款…」
 
我：「但係我保護左你喎，咁就已經夠喇。」
 
此話一出，Anna即刻講唔到野，只係識用已經變得水汪汪既雙眼望住我。
 
我當然唔會放過呢個機會，食住個勢伸手去摸下佢塊臉豬登，嘗試為佢擦去已經幾乎乾涸既眼淚。
 
我：「我會去做自己應該做既事，所以我想你都一樣，去做你應該做既事，好無？」


 
Anna：「但係…」
 
我：「唔好但係啦，喊苦喊忽邊係你Anna姐既風格，放心啦，我自己既事我會諗到方法搞掂架啦，相信我多一次。」
 
我講到咁，佢終於都叫做諗通，企返直個人，抹一抹自己眼角，清一清自己喉嚨。
 
Anna：「如果你因為咁死左的話，我一世都唔會原諒你。」
 
佢就咁拋低呢句野就離開左房，消失左係大家既視綫中。
 
我只係笑左一笑，因為知道佢已經變返以前既Anna。
 
而且…如果有人肯記住自己一世…都幾好吖…
 


過左無耐，Yui幫我敷好藥之後我地就迎來兩位客人，晨哥同愛麗絲。
 
晨哥手上仲有一個公文袋，似乎就係我地需要既野。
 
晨哥：「哦？比我想像中精神喎你？你想要既野我拎左黎啦~」
 
「可以開始行動喇。」
 
嗯，開始啦，係時候為呢件事劃上一個句號。