《無啦啦多左幾個家姐同細妹Season 3》: 潛入

晨：「係見到佢地之後你打算點。」
 
係車程途中晨哥突然問既呢個問題，我諗左好耐都答唔到。
 
一直以黎都只係掛住搵佢地出黎，諗住咁就可以結束呢件事，但當佢咁問到我既時候我先發覺自己太天真。
 
見到佢地又可以點做？以牙還牙，將佢地對我做過既野加倍奉還？定係純粹報警處理？
 
但如果報警就算既話我又何必山長水遠走黎赤柱搵佢地？
 


無錯，晨哥用左少少時間就成功透過佢既渠道查出Moon既住址係赤柱既一間大宅。
 
係得知住址之後我地就決定儘快前去一探究竟，但為左安全起見，係晨哥籌組好佢既隊伍之後我地先出發。
 
Sarah佢哋原本都想跟埋黎，但因為可能會遇上危險既情況所以被我拒絕左。
 
我真係唔想佢地再捲入任何危險。
 
於是就有左以上既對話，其實都唔可以算係對話，因為我都答唔上。
 


或者…我只係想問清楚佢地點解要咁針對我？同埋我同佢地之間到底有乜過節。
 
晨：「嘛，見到再諗都無問題既，我只係想你好好諗清楚啫。」
 
嗯…真係應該要好好諗清楚先得。
 
我：「但係晨哥點解你今次要咁幫我？今次應該唔損害你地既利益先係架…」
 
晨：「嗯，今次對方只係針對你一個，的確唔會影響到我，但咁唔代表只係你一個人既事。」
 


「有人拜託我好好照顧你，加上你又係我朋友，咁已經構成我幫你既理由啦係咪先。」
 
朋友…啊？應該係大家姐拜託晨哥架啦，真係吖…
 
說時遲，那時快，我地既車就已經停低左，透過車窗我地可以見到一排獨立大宅，其中一間係我地要搵既目標。
 
晨：「好，開工啦各位。」
 
係佢一聲令下之後，車上幾位素未謀面但一睇就知道係各有特色既專材就紛紛跳落車，係車尾箱拎出幾個箱。
 
而係我旁邊既晨哥就拎出一部電腦，打開幾個程式，但全部都係黑畫面。
 
我：「晨哥，我有無咩要做？」
 
晨：「暫時無，等佢地放Drone出去睇下情況先。」


 
佢講完呢句之後，車後就聽到幾架無人機起飛既聲音，原本黑畫面既程式都開始有畫面，全部都顯示出呢度既風景。
 
嘩出到無人機咁高科技會唔會有少少誇張…？不過諗返Ashley用過既野，呢D又算係d咩吖講真…
 
過左無耐晨哥就話屋內無人可以入去，我地隨即動身一行人好快就行到去門口，卻發現大門被一個電子鎖緊緊守護住。
 
不過呢D情況大家都有預計到，我地其中一位係袋中拎出一個細裝置放左上個鎖度，嘟嘟幾聲之後大門就自動打開左比我地。
 
以為係電影先會發生既橋段，無諗過今日可以親眼睇到。
 
點解而家既感覺愈來愈似職業特工隊既…
 
無論點都好，我地總算順利入到屋內，一如之前佢講既咁屋內並無人，至少呢刻仲未有人。
 


但我並無鬆懈，步步為營腳震震咁一步一步探索呢間屋。
 
就咁睇落呢間屋既格局並無任何奇怪，只係一間普通既大屋，完全唔似一個秘密基地。
 
直至我打開其中一間房門。
 
眼前呢片景象震憾左我。
 
全部都係我，房入面既四幅牆上全部都係我既相，仲要係無一張係相同。
 
到底佢係點樣影到咁多我既相…？跟蹤我？
 
而且每張相上面有我既樣都被大大力畫上一個紅色既交叉，有咩意思相信唔洗講都好清楚。
 
只係透過呢四幅牆就已經感覺到佢既恨意，呢份恨意強到令人心寒，我不禁退後兩步。


 
呢一刻，我只係想儘快離開呢間房。
 
離開左個間房返到客廳既我，第一時間做既就係深呼吸。
 
係個間房入面既時候我好似忘記左抖氣既方法…好辛苦。
 
就係我岩岩回返氣既時候，大門既方向傳黎嘟嘟聲，同我地岩岩係門外個陣聽到既十分相似。
 
緊接住，大門就被打開。