百感交集。除左呢四個字之外我都諗唔到其他形容詞去形容我今日既心情。
 
要點同Sarah佢哋講好呢…如果直接同佢地講話呢一切背後既人其實係二家姐的話佢地肯定會嚇死。
 
定係索性唔同佢地講好呢?但係我又唔想瞞住佢地,要佢地心掛掛我個心更加過意唔去…呀好煩呀屌!!我應該點做先好呀!!
 
「喂到啦喎師兄,仲唔落車。」
 
就係我仲為自己擔心緊既時候,晨哥冷冷既一句說話拉左我返現實。
 


係喎,問下晨哥意見都好,佢人生閱歷咁豐富,呢D情況應該要點處理佢肯定有所心得先係。
 
我:「晨…」
 
晨:「我係你就一五一十同你班女講,反正你班女有乜未見過,呢種程度佢地仲接受到既,只要你無穿無爛佢地就安樂架啦。」
 
喂屌我只係講左一個字咋喎大哥,咁你都知道我想講乜?因乜解究我身邊個個都譤讀心架??
 
我:「但講緊既係佢地二家姐…你知道佢地好鐘意二家姐架啦…我怕佢地…」
 


晨:「有乜好怕啫,唉咁鬼麻煩係度扭屎忽,我無心情理你呢度無聊既憂慮,快D落車,我仲有野要去做。」
 
嘩做咩佢心情好似好差咁?眼神仲要好恐怖,唔通係因為佢唔滿意我處理日月件事?
 
唉都已成過去啦仲咁介意做乜,算啦我都係唔好惹佢快快手走人好D,唔係的話真係唔知佢會唔會撕開我兩邊,望就望佢唔好搞出咩大頭佛啦。
 
我落左車都未夠兩秒佢就已經閂埋車,好似風一般咁迅速離去,留低我一個人望住屋企個大門口。
 
唉算啦諗咁多都係無謂,反正我成日都唔跟plan,諗咁多把撚咩,入去吧啦。
 


係我暗自下左決定既同時,我用力拍打自己塊臉叫自己提起精神,要好好面對佢地幾個。
 
但出乎我意料既係屋入面人影都唔見個,日日嘈喧巴閉既大廳今日靜得可怕。
 
大家都去左邊呢…?
 
我一步一步咁搜索屋企想話睇下D人去哂邊,點知搵哂成層地下都仲係見唔到一個人,真係奇怪。
 
不過講開又講明明一個人都無但仲開住哂D燈,認真哂電喎老細。
 
我一邊暗罵一邊走上二樓繼續尋找佢地既身影,但可惜行過哂所有平時佢地平時會係既地方都搵唔到佢地,甚至連蘭姨佢地都見唔到,成間屋真係一個人都無。
 
呀係wor,仲有Sarah佢地既房仲未搵,過去睇下先。
 
就係我行緊去Sarah間房既時候,我停低左係一間房門口,無錯就係二家姐間房。


 
唔知佢仲會唔會返黎呢…
 
唉,諗諗下又忍唔住嘆左一口氣,真係忍唔住。
 
屌我做乜撚野,對眼好熱好辛苦…
 
「阿明?」
 
咦係Sarah把聲…?
 
一聽到佢把聲我就馬上抬起頭擦擦雙眼,想儘快可以睇清楚返野。
 
但當視綫重新變得清晰既時候,佢就已經係我面前,一個身位都唔夠個隻。
 


Sarah:「發生咩事啊,你做乜一個人企係度喊?係咪個邊既事唔順利?」
 
我並無回答佢既問題,而係行前一步緊緊抱住佢。
 
我:「求下你,咩都唔好講…俾我就咁樣一陣…」
 
面對我突如其來甚至可以話有D任性既請求,Sarah並無拒絕,仲輕輕掃我既背脊,安撫我既情緒。
 
今日…實在太難過…