《無啦啦多左幾個家姐同細妹Season 3》: 振作

嗯…？呢度係…？我間房？我係幾時…？嘩屌隻眼好痛，撐唔大咁款，好辛苦。
 
咪住先等我重組下案情，搞清楚我係幾時…啊…係wor我記得啦我係走廊抱住Sarah，啊原來係咁…之後訓著左，係Sarah抬我返入黎…
 
又麻煩到佢添…唉…
 
「喀察！」
 
咦？廁所個邊有聲既？有人係我房入面？
 


係寜靜得可怕既房突然聽到聲音令我馬上警戒起黎，望住個門口望到實一實，睇下到底會係邊個係入面。
 
「嗯？你終於訓醒啦？」
 
Sarah…？嘩屌你做乜著成咁架！！！
 
大家千其唔好心邪，我所講既著成咁唔係指Sarah佢著左咩好性感既泳衣或者內衣之類，佢係就咁著住件浴袍從浴室行出黎，雪白既肌膚同…唉真係不能用言語形容眼前呢番美景。
 
加埋佢背後個D從浴室飄出黎既蒸氣定霧氣既襯托，令到佢好似仙女下凡一樣。
 


呃…好似無乜分別？定係更加衰呢？頂我處理唔到呀大哥！！
 
Sarah：「做咩呆左咁啊？你無事吖嘛？」
 
仲問我做咩…我先想問你做咩呀小姐…你著成咁出現係人地間房你想點呢…
 
雖然我無講到出口，但Sarah似乎從我既眼神中領會到我既諗法，望住自己既衣著傻笑左一下。
 
Sarah：「咁我想陪住你等你訓醒吖嘛，但等左成晚你都唔醒，我又想沖涼又怕錯過你訓醒個下，咪唯有係你房沖囉，點知一時醒唔起自己無拎衫黎換嘻嘻~我仲以為你見到我咁著會開心添。」
 


唉…我都唔知可以講咩好，而且佢係關心我先咁做，我都無理由話佢啦係咪先。
 
同埋間唔中咁樣整一劑都唔錯，行氣活血呀！
 
綜合以上原因，我無去怪Sarah而係選擇左filrt佢。
 
我：「不過最後都係錯過我訓醒個下囉~」
 
Sarah：「邊有人估到你好衰唔衰會係人地沖緊涼個陣醒啫，係你問題吖。」
 
佢一邊講一邊行埋黎，最後仲走上我張床，訓係我旁邊望住個天花板。
 
我：「快D返去換套衫啦，，因住一陣凍親呀。」
 
Sarah：「嗯…如果係感冒食感冒藥就可以好返，但如果有心病，咁應該點做先可以好返？」


 
「可唔可以話我知到底發生左咩事？」
 
佢講講下突然將目光重新投放係我身上，可以話嚇左我一跳。
 
不過其實我都預左佢會問我，畢竟我尋晚咁反常，正常佢一定會發現到D野先係。
 
啱哂啦，食住呢個勢將呢一切都講哂比佢知啦。
 
我深呼吸左一下，幫自己打打氣，順便當係為接住落黎自己準備講既野作一個小小既鋪墊。
 
之後我將全部，所有野都一五一十講哂比佢知，包括日月既身份，佢地同二家姐既關係同埋見到二家姐既事。
 
出乎我意料，就算Sarah聽到二家姐既出現佢並未擺出一副好震驚既表情，只係稍稍鄒左一下眉，似乎唔多意外。
 


但話哂講緊既二家姐喎，我地既二家姐喎？？點解佢可以咁冷靜？
 
我：「你唔…」
 
Sarah：「嗯，我係好surprise你話關二家姐事，但聽你既講法佢地襲擊你似乎唔係二家姐既意思喎，二家姐反而係想息事寧人，唔係咩？」
 
的確係既…二家姐咩都無講，只係一味話交日月比佢件事就可以完，似係想快D完左件事咁…
 
Sarah：「而且我信二家姐唔係D咁既人，佢比任何人都更愛更錫我地，一定唔會做出傷害我地既野，日月既行動一定唔係佢既意思。」
 
「佢地講既野只係為左打擊你，咩令二家姐痛苦，二家姐一定唔係咁諗。」
 
「所以唔好再咁sad啦，好多人會擔心你架，你仲有好多要做既野架嘛，唔係咩？你仲有同你班朋友個間鋪架~只要你無事，我點會一直支持你…」
 
「希望咁可以令你振作返…我睇書D人係鐘意咁做…」


 
當我仲思考緊佢講既到底係咩意思既時候，佢忽然爬起身，一下捉住我下巴錫左落黎。
 
呢一下就好似奧米加獸既All Delete咁，一下清空哂我腦入面所有野，佢既咀唇唔通有格式化人地記憶既能力？
 
我唔知過左幾耐佢先鬆口，我自己既感覺就好似過左兩個世紀咁，世界都變了天一般。
 
Sarah：「好啦唔準再頹啦知嘛，同埋唔好話比Ellen佢地知啊，佢地一定會殺左我架！」
 
佢一邊講一邊彈下彈下離開我身邊，著住浴袍離開我間房。
 
真係吖…我到底係度做緊乜…真係好似晨哥講既咁，佢地真係接受到。
 
可能其實唯一接受唔到既人就係我…
 


但係我都要一直向前行先得，為左一直支持住我既佢地。