《無啦啦多左幾個家姐同細妹Season 3》: 怒火

Ellen：「你真係決定要講？你諗清楚架啦？咁難得你盤生意岩岩穏定，你而家就要去自爆？」
 
我：「唔係我盤生意，係我同佢地盤生意，大家一齊合作搞生意本來就唔應該隠瞞呢D咁重要既事，趁而家生意叫做穩定D，早D坦白都係好事。」
 
Sarah：「無論阿明你決定點做都好，我都會支持你~最多咪我地自己再開一間~」
 
Ellen：「喂我又無話唔撐阿明，我只係想佢再考慮多次啫。」
 
考慮多次…？我已經諗左好耐啦，而家唔講真係唔知幾時先有更好既時機講，所以今日我先會係度。
 


阿惠：「嘛唔洗咁緊張喎Ellen姐，大佬明做得出咁既決定一定有佢自己既考慮，唔會有問題既。」
 
阿惠一邊講一邊放低幾碗佢鋪頭既招牌麵同D小食比我地，仲幫我手說服一直對我既決定有所保留既Ellen。
 
無錯，我其實約左佢地幾個係阿惠鋪頭見面，我既打算係諗住一邊食一邊傾等氣氛可以輕鬆d，起碼我係咁諗先。
 
而且唔係自己舖頭講呢件事總感覺更加好，個場地效果會更好。
 
過左無耐阿輝佢地幾個全部都到哂，於是我就稍移玉步，離開Sarah佢地幾個張枱，去左旁邊張枱準備同阿輝佢地傾野。
 


唔知係因為我專登叫佢出黎定係我掩飾唔同自己既面口，我好明顯feel到佢地幾個打量緊我。
 
唉，都預左架啦，反正都行到呢步，都無所謂啦。
 
我：「喂辛苦哂咁多位，坐低嗌杯野飲先啦，我地慢慢傾。」
 
聽到我咁講加上環境既影響，佢地亦只好坐低叫野飲，順便打量下周圍既環境。
 
阿Ray：「點呀阿明哥，有咩事咁重要連鋪頭都唔開要出黎傾吖？」
 


我：「um…都真係好重要，係關於我地既鋪頭，其實我應該早D講先係，大家仲記唔記得我地之前參加個個創業基金？」
 
聽到我提起創業基金既事之後，原本注意力散漫既其他人全部都元神歸位，返翻黎呢張枱上。
 
浩銘：「做咩呀？佢地想cut資助？」
 
阿嵐：「唔係呀而家先岩岩一個月咋喎，佢地咁快就取消我地既資助？咁唔岩規矩喎？」
 
果然一提到錢既問題大家都會變得緊張，居然連平時唔多出聲既阿嵐都開始在意。
 
唔知算係好彩定唔好彩，今次我地既問題唔係呢度，不過係一個更加嚴重既問題。
 
我：「無事，佢地唔會cut資助，我想講既係有關基金背後既公司，天晨集團。」
 
係準備講下一句之前，我深深吸左一大啖氣，因為我唔知道自己講左出黎之後會發生咩事，。


 
但係我最後都係講左出黎。
 
「天晨集團其實係我屋企既公司。」
 
講完呢句之後大家都無出聲，無比任何反應，只係一直望住我。
 
局面一下子變得尷尬，但我都唔知自己可以做D咩去改變眼前呢個狀況。
 
好彩既係阿惠及時出現放低小食，先至為我帶黎突破口。
 
阿惠：「嘩搞咩大佬明你班朋友全部定哂格既哈哈哈，你講左嗱？」
 
我：「嗯，岩岩講完。」
 


阿Ray：「吓呢位師兄即係你一早知道阿明身份架啦？」
 
阿惠：「係啊，我同佢識左好多年，知道好多佢既英勇事蹟架，有冇咩野特別想知？」
 
我：「喂今日唔係為左講呢D…」
 
阿輝：「我想問咁係咩一回事？你話個間公司係你屋企既？即係你一直以來都係度玩緊我地？當我地係咩？玩具？」
 
阿輝一番炮轟全部打哂我塊臉上，我亦無避開，堂堂正正接哂佢所有既怒氣。
 
應該話我知道自己唔可以避先岩。
 
我仲記得個陣係camp入面同佢傾計，我亦好清楚佢好憎人呃佢。
 
正因為咁我當初先猶豫過講定唔講，結果就算拖到而家先講都係一樣。


 
但我都已經做好相應既覺悟，就算佢要打我我都唔會怨。
 
不過佢並無咁做，只係繼續啤住我。
 
我：「對唔住，但我絕對唔係玩大家，我真係想同大家一齊開鋪頭做生意，但個下我自己真係無其他更好既辦法，唯有借創業基金呢個方法。」
 
輝：「哦？既然你屋企咁有錢，點解你唔直接叫你屋企比一筆錢出黎，而係要我地搞咁多野，玩咁多馬騮戲呀？」
 
我：「咁係因為…」
 
輝：「因為你想玩埋哂D熱血勵志同伴遊戲，所以就拉我地落水陪你玩，我有冇講錯呀？」
 
我：「其實…」
 


阿Ray：「喂阿輝你適可而止啦，阿明佢係咪真係咁諗你睇唔出咩？雖然佢係有隱暪自己既身份，咁都唔代表佢係想玩我地架？大家都知道佢係咪真心同我地搞生意，唔係咩？」
 
「更何況，你都應該一早察覺到架啦？唔係咩？」
 
…!?