《無啦啦多左幾個家姐同細妹Season 3》: 同行

點解阿Ray會話阿輝其實一早就知道？到底係咩一回事？
 
講開又講，阿Ray既反應比我想像中既更平靜，甚至可以話毫無反應，明明其餘兩個已經嚇到傻左，但佢居然仲可以咁平靜？
 
唔通…阿Ray都一早知道呢件事？唔會掛？
 
不過呢個時候我都仲未可以同時處理咁多問題，焦點仍然都仲係停留係阿輝身上。
 
面對阿Ray既追問，佢只係鬆鬆膊，毫不避諱承認左。
 


阿輝：「比賽結束個陣阿明暈低個下，我留意到主辦單位個女人既反應好奇怪，未必太過著緊阿明，佢地之間應該有d關係先係，所以我就自己去查左好多野。」
 
嘩居然由個陣就已經發現到…不過咁唔怪得我啦，係大家姐咁緊張我所以先露出馬腳啫？但又唔怪得大家姐既，佢都係見我出事先會咁緊張既啫。
 
唉算啦都比佢知道左，追究係邊度出錯都無意思。
 
我：「咁點解…」
 
阿Ray：「哦？咁既然你一早知道既話點解唔即刻講出黎叫阿明解釋？反而仲收埋件事默默同我地籌備間鋪？講唔通喎師兄？」
 


「我同你一樣，都係係個排知道左阿明既身份，但我知道阿明一定有佢自己既理由同苦衷先會咁大費周章搞咁多野去為左同我地一齊搞生意，所以我選擇左相信佢，同佢一齊努力搞好間鋪頭。」
 
「而且佢而家都願意同我地坦白呢一切，你就唔可以再相信多一次？」
 
阿Ray既一番說辭令我感動得眼水都標左兩滴出黎黎了，佢明明一早知道真相但都願意相信我…
 
就連旁邊既浩銘同阿嵐都比佢既演說所感染到，紛紛點頭表示同意。
 
唔知大家明唔明白呢種感覺，但係呢一刻我個心真係好似如釋重負咁。
 


而家剩低既問題就只係…
 
無錯…都係得返阿輝…佢仍然毫無反應，繼續抬頭望住天花板，一動不動。
 
但就係呢個尷尬既時刻，空氣快將再次凝結既一刻，頭先並未列席於此既Ellie突然出現仲慢慢行埋黎。
 
Ellie：「其實你好想相信阿明，同佢一齊拼摶一番事業，只係你被自己既過去束縛住，所以先一直無辦法衝破心理關口，怕重蹈你爸爸既經歷，我有無講錯？」
 
點解Ellie會知道阿輝爸爸既事…？我無同佢地任何一個人提起過架喎？
 
就係呢個時候Ellie望左過黎我呢邊，向我展露出佢溫柔又動人既微笑，但好快又收返埋，擺返個認真樣出黎對住阿輝。
 
至於阿輝，係提起佢爸爸既事之後終於dup翻低個頭，仲擺出一副好surprise既樣。
 
咁都唔出奇，因為佢應該無諗過Ellie居然會知道佢爸爸既事。


 
阿輝：「點解你會知我阿爸…」
 
 
Ellie：「我係早幾日聽阿明話打算同你地坦白個陣，透過我家姐對你既描述估到你應該有過唔愉快經歷，所以我就透過某D方法查左你既資料知道左你屋企以前既事，就係咁簡單。」
 
「你知道左之後的確係好嬲，不過你心入面係想相信阿明，所以先無講出黎，怕過唔到自己個關。」
 
阿Ray：「但當阿明真係講出黎既時候，你又想搵位去釋放你個股積壓左好耐但又無地方宣洩既憤怒，所以頭先先會發咁大脾氣。」
 
面對雙重夾擊，阿輝毫無還手既意思又再變得一言不發，猶如被逼到牆角咁。
 
喂…你地唔好咁啦…做錯野既係我唔係阿輝呀…點解你地要好似審犯咁對佢呀…
 
我：「夠啦，錯既人係我，明明知道左阿輝好憎人呃佢但我都無馬上講清楚一切仲瞞左咁耐，係我唔岩，要發洩的話唔洗客氣全部發洩落我度啦，鬧我又好打我都好我都唔會避，黎啦。」


 
我企起身擺出一副無防備既姿態任阿輝處置，但佢並無任何動作，只係望住我。
 
坐係我旁邊阿嵐浩銘佢地都想阻止我但都比我擋住，因為我自己好清楚呢個係我自己需要負返既責任。
 
唔知係咪見到我既決心，阿輝終於都有動作，企起身走到我面前，舉起佢由頭先開始一直緊握住拳頭。
 
老實講見到佢拳頭個下真係有D驚，因為我以前曾經同佢一齊打過拳，佢出拳既威力我仍然記憶猶新。
 
但都洗濕左個頭，無理由而家先縮沙咁柒架嘛，唯有硬食最多之後訓多幾日囉，
 
但佢並無用佢往日既威力出拳，只係輕輕咁打左我右邊心口一下。
 
阿輝:「唔好令我犯下同我老豆一樣既錯…我唔想以後後悔自己信錯人…」
 


「同我一齊做好間鋪啦。」
 
唔知點解聽到佢最後個句既時候個心好似放低左千斤既大石，人都輕左兩公斤咁，更不自控咁嘆左一口氣。
 
回過神來先發現阿輝同大家都仲望住我，等緊我既反應。
 
我：「嗯，一齊努力啦。」
 
我隨即伸出手，而阿輝亦馬上握住我既手，我地兩個男人就係大家面前大大力握手，個畫面肯定好gay。
 
至於係旁邊一直睇住所有野發展既其他人亦開始拍手，Sarah Ellen佢地甚至攬住我係咁話「真係好啦」，「擔心死我」之類既說話。
 
而我就選擇左緊緊抱住佢地，答謝佢地之餘亦以此釋放自己既情緒。
 
啊…終於告一段落喇…


 
跟住落黎就係…