《無啦啦多左幾個家姐同細妹Season 3》: 爭扎

半夜既時分，我自己一個坐係細細既梳化上，以極為微細既音量講呢個電話，以驚動係房訓覺既兩個細路。
 
家姐：「Sarah同左我講啦，話阿明佢已經向佢班拍檔坦白左所有野，最難搞既野都已經解決哂，你而家可以放心啦？」
 
哦…？佢居然？出符我意料喎…我仲以為佢會拖泥帶水，最後搞到一鑊粥添。
 
睇黎…佢真係大個仔啦…或者…唔再需要我喇？
 
我：「嗯，咁就好啦。而家佢總算叫做有自己既生意，你同阿爸都開心喇？」
 


家姐：「哈，我諗最開心既人應該係你先岩啦？我仲記得你同我一齊睇住渡假村既cam個陣係咩樣架~緊張到七情上面，好似係自己落場咁哈哈。」
 
一時之間我都唔知道可以講D乜去反駁家姐，因為佢講既的確係事實。
 
見我突然無應答，家姐就決定乘勝追擊繼續講落去。
 
家姐：「你個邊又點呀？諗好點安頓嗰兩個細路未？」
 
我：「仲未…但我唔可以隨便dup低佢地，呢個係我既責任…」
 


家姐：「嗯我都明白，所以我都無叫你咩都唔理就拋低佢地，但你而家咁樣真係好咩？拖泥帶水落去對你自己只會係一種折磨。」
 
…我？
 
我：「就算係咁我都無其他可以做既野，唔好講我既事啦公司個邊情況點？所有野都ok嘛？」
 
家姐：「eh…老實講情況唔算太好呀，你知啦而家經濟環境差，公司唔蝕錢已經係盡哂力之下既結果，但班董事就日嘈夜嘈，仲有傳有人私底下接觸過佢地想買佢地既股份搞到Daddy而家好頭痛呀。」
 
居然有人想收購我地公司…？會係咩人？
 


我：「我個邊d公司有幾項技術都幾有潛力，美國個邊都有人有興趣，我可以賣幾樣幫公司賺一筆資金。」
 
家姐：「哎唔洗啦你都好辛苦先搞到呢幾項技術，自己留住啦，係呢我聽日可唔可以黎你個邊？想同你食下飯。」
 
我：「嗯無問題呀，反正我都係要留係屋企睇住佢兩個。」
 
家姐：「好喇咁我地聽日見，早D休息啦。」
 
掛斷電話之後，我攤坐係梳化之上，蜷成一團，緊緊抱住自己雙腳。
 
我應該點做先好…我應該唔再需要偷偷係背後做咁多野喇？佢而家已經可以自己處理好，唔會好似以前咁成個熱血白癡咁一味向前衝衝衝，識得分辨輕重同處理人際關係。
 
起初我聽到佢無同拍檔提起自己屋企背景既時候我就知道終有一日佢會遇上類似咁既情況，但我無諗到佢居然會選擇係咁早既時期就主動交代返一切…
 
不過佢都處理得算好，用佢一向既風格，用心去打動人。


 
哈哈…我自己一個係度講乜呀？低能…
 
月：「家姐？你無事吖嘛？」
 
嗯…？係阿月？
 
我：「無事，只係未係好想訓所以係度坐陣，你呢？訓唔著？」
 
月：「有小小頭痛…出黎想睇下有冇藥食…」
 
我：「頭痛可大可小架，過黎俾我睇下先？」
 
我將手掌輕輕放係阿月既額頭，嘗試感受佢既體溫，再同自己既相比，確認出佢並無發燒。
 


我：「無發燒，食兩粒頭痛藥就去訓啦，休息多D聽朝起身就無事架啦。」
 
佢聽完我講之後就慢慢行去櫃桶拎藥，而係我望住佢既背景既時候令我忽然意識到一件事。
 
既然佢已經唔需要我，而家既我要做既野會唔會就係好好守護眼前既佢地兩個？
 
時間好快去到第二日，我亦同左日月佢地兩個講今日家姐會黎，佢地亦無乜特別反應，因為家姐最近周不時都會上黎探我，仲會主動同日月傾下計，所以日月慢慢都開始接受左家姐，只係仲未可以當佢係家姐咁看待。
 
「叮噹~」
 
哦？就講就到，唉不過諗起今日成日都要聽家姐哦就頭痛…我都咁大個人喇…
 
我一邊抱怨一邊打開大門歡迎家姐既對來，但當我見到門外既另一個人既時候，個心不禁涼左一涼。
 
我：「爸…」


 
正是，伴隨家姐一同黎到既，就係我阿爸。
 
爸：「好耐無見喇，麗晨。」

點解你會黎...？