《無啦啦多左幾個家姐同細妹Season 3》: 休假

難得一日放假…做咩好呢？最近D貨多到搬死人，攰到隻手好似都唔係自己既咁…
 
阿輝同阿Ray兩條仆街…咁大咬入咁多貨…一陣賣唔出責係度就真係仆街喇…
 
唉算喇放假真係唔好諗咁多，休息下仲好，去搵下Sarah睇下佢地做緊咩先。
 
原本想問佢地有無興趣出去行下，但一落到就見到飯廳變到戰場咁，周地都係盒同麵粉，仲有雞蛋殼，見到呢D素材大家都知道呢幾位小姐又係度整緊蛋糕。
 
今個月佢地已經係第三次整蛋糕，仲未玩厭咩…大哥我連早餐都無位食呀…
 


但佢地三個好似當我無到咁繼續醉心係佢地自己既世界，咁我唯有自己行去廚房倒杯水飲解解餓先。
 
萬幸既係我係廚房遇到蘭姨，佢好快幫我煮左份早餐等我唔洗係自己屋企餓死。
 
話說…最近都唔見大家姐，就連蘭姨都話佢最近早出晚歸好少見到佢。公司真係有咁忙咩？想搵佢問下二家姐既事都無機會添。
 
Ellen：「Yeah!!!終於整好喇!」
 
哇大哥你忽然咁樣大叫會嚇親人架知唔知，嚇到我差D連口入面啖水都差D噴出黎。
 


行出去想話睇下佢地搞乜，點知已經見到佢地三個拎住電話係咁影三個蛋糕既完成品。
 
咦睇落同之前個D唔同咁既？睇黎佢地又學左新食譜啦，又整得幾好睇喎。
 
我：「哦？幾靚咁喎，我可唔可以試下？」
 
Ellen：「嘩阿明你幾時係度架？想嚇死人咩？唔得呀三個都已經預左比人唔可以俾你食，乖等下次啦。」
 
嘩原來佢地直頭見我唔到，唔怪得知好似當我無到咁啦，居然可以玩得咁入神，真係無佢地收。
 


但係無諗到整左三個蛋糕居然我連一舊仔都無份，邊個咁有福氣可以食到我女朋友整既蛋糕，仲要係三個！好妒忌呀！！
 
唔知係咪我妒忌既樣太過明顯定抑或係Sarah觀察力太強大，佢居然走到我背後掃掃我背脊安慰我。
 
Sarah：「唔好唔開心啦，今次D蛋糕係比大家姐同Ellie架。下次等我整成個比你一個人食好無？」
 
Ellie同大家姐？哦肯定係Sarah佢地見Ellie同大家姐最近做野好忙想整個蛋糕慰勞下佢地喇。
 
我：「嗱係你話架，唔好走數呀知唔知，我好期待架。」
 
Sarah：「嘻你到時要一個人食哂添呀咁大口氣。」
 
佢講完就隨手係枱上了左一忽cream抹左落我鼻上，之後就轉身離開返去Ellen個邊。
 
對於佢呢下舉動我係有D錯愕，只係識抹返走撻cream放入口中。


 
嗯，又幾甜。
 
之後我都無打擾佢地三個，自己坐埋一邊睇佢地三個小心翼翼包裝各個蛋糕。
 
過程非常順利，三個蛋糕完美入盒，但呢個時候佢地居然開始猶豫。
 
Ellen：「點算好啊？要去三個地方喎。」
 
三個地方？
 
Yui：「唔…先拎去比Ellie之後大家姐，最後先去coffe shop?」
 
Ellen：「唔…但係如果我見到Ellie我會想同佢傾好耐偈，怕未去到coffee shop個蛋糕就會融…」
 


Sarah：「係wor…三個地方加埋既距離都好遠…咦？阿明你今日係咪無野做？」
 
我：「嗯？無啊今日放假吖嘛。」
 
仆街口快快直接講左出黎，講完即刻感覺到唔好既眼光，唔洗兩秒我已經開始後悔。
 
Ellen馬上跑左過黎，雙眼發光非常激動捉住我對手，以好誠懇既語氣求我幫手。
 
Ellen：「黎吖阿明，你幫我拎個蛋糕比Ellie吖~~佢呢排同你一樣好忙成日匿係實驗室，飯都無好好食呀陰公豬。你幫我好好慰問佢啦好無？」
 
吓！你岩岩講到咁姊妹情深話見到Ellie會有好多野想同佢講，轉個頭你居然叫我拎蛋糕比Ellie？會唔會太跳脫呀小姐？
 
我：「吓點解唔係我幫你拎蛋糕去咩coffee shop，等你可以好好同Ellie嘆下茶食下餅盡訴姊妹情？」
 
Ellen：「雖然我都好想…但係我地好想將個蛋糕俾個姐姐品評下睇下佢滿唔滿意，更何況比起我Ellie應該更加想見到你啦~」


 
嘩邊個姐姐咁勁居然比自己細妹更加有吸引力？我又真係想會下佢呀。
 
Sarah：「咁不如唔差在幫我地拎埋去比大家姐喇？」
 
吓！？我唔係跑腳送外賣喎小姐。
 
正當係我想吐糟既時候，Sarah細細聲同我講多一句。
 
「咁你咪可以有機會搵大家姐問佢二家姐既野囉傻豬~」
 
係喎！一言驚醒洛克人！！
 
呢個外賣仔！我當定了！