《無啦啦多左幾個家姐同細妹Season 3》: 暗湧
係我答應做呢個外賣仔既同時我亦係Ellen既手上得到左實驗室既通行咭仲有地址。
無計啦，大家都記得我上次去個陣係昏迷左架嘛，醒返個陣就已經到左，所以我又點會識路先得架。
話就話拎到地址，不過其實對我都唔係有好大作用，因為我都只係call uber報個地址比佢就收工。
拎住兩個蛋糕上架uber，欣賞下沿途既風景唔駛一陣就已經到左實驗室，呢個時候第二件item就可以派上用場啦。
有左呢張通行證，實驗室所有既門都攔我唔住，簡直就係一方通行。
不過門攔我唔住啫，人都仲係可以攔得住我既，過左幾道門之後就有staff經過見到我，問我咩事點解係度。
咁又可以理解佢地既，突然間有個陌生人拎住兩個蛋糕出現係你公司，正常反應都會問下何者何人啦。
好彩佢地都係D會聽人講野既人，係我細心解釋之下佢地總算理解我既身份，仲好好人咁直接帶我去Ellie既辦公室。
當我去到辦公室既時候Ellie咁岩行開左，於是我就帶住蛋糕坐低等佢。
係等待既時候我周圍望打量下，想睇下平時Ellie做野既地方到底係點。
上次黎呢度既時候都只係去「樂園」個邊，根本無黎過呢邊，所以呢度所有野對我黎講都非常新奇。
一枱都係我睇唔明既文件資料，上面仲有一堆好似DNA既圖，嗯總知就係好難明啦。
正當我拼盡力氣想從一份份文件中找出起碼一個自己識既單詞既時候，Ellie就推開門入左黎了。
Ellie：「做咩黎左既？搵我有事？」
面對緊張既Ellie，我只好苦笑指一指身邊既蛋糕，佢亦馬上心領神會，嘆左一口氣。
Ellie：「家姐真係吖…蛋糕咋嘛我返屋企食咪得囉…做咩要專登叫你拎黎啫…咁麻煩…」
佢雖然一臉嫌棄同不滿，但雙腳又居然慢慢行去蛋糕既方向一探究竟，真係身體卻很誠實呀哈哈。
我：「唔好咁啦，Ellen知道你最近做野好忙成日匿係呢度無乜時間食野，所以專登同Sarah佢地一齊學整呢款新蛋糕想幫你打打氣囉~」
都唔知佢有無聽我講野，因為由頭先開始佢既目光就已經只係專注係個蛋糕度，隻手仲好唔規矩咁嘗試打開個盒。
我記得Ellie唔係咁鐘意食甜野架…
Ellie：「哦？咁點解唔係佢自己送黎而係叫你拎黎既？咦仲有個既？」
我：「因為Ellen話我送黎你會更加開心囉，另一個蛋糕係俾大家姐架，我一陣拎過去。」
Ellie：「嗯都算佢醒目，如果係佢拎黎我肯定會鬧佢。大家姐果個我幫你放入雪櫃雪住先喇。」
Ellie一邊講一邊拎走大家姐既蛋糕，又剩低我自己一個係房。
把口講到咁唔鐘意Ellen，其實就好緊張個家姐，兩姊妹都係咁，已經睇慣左喇。
係Ellie返黎既時候，我就已經佈好哂陣，打開左蛋糕既盒，等佢可以隨時就食。
而佢亦正如我所料，一返到黎就行埋個蛋糕度，我都好識做馬上就叫佢拎住個蛋糕影張相，再偷偷地whatsapp比Ellen。
之後我地兩個就一邊食蛋糕一邊傾偈，一齊討論下最近大家既工作。
其實我都有一段時間無見過Ellie，大家都忙係自己既工作上。所以其實都要多謝Ellen俾左呢個機會我去見Ellie。
同Ellie傾偈真係好舒服，佢總係好明白我心入面既諗法，仲會俾好多有用既建議我，幫我解決問題。
唔知我係佢心目中又係一個點既角色呢？我又幫唔幫到佢呢？
就係我地就快食完個蛋糕既時候，Ellie忽然講左一句直插我心房既說話。
Ellie：「我總係有種唔好既預感，覺得又會有事發生，日同月應該唔會咁易罷休先係。」
嗯其實我都同意，特別係阿日咁憎我，就算二家姐點阻止佢都好，我都認為佢會偷偷地搞事。
再加上呢排大家姐經常避開我令我覺得有d怪，好似唔想我去搵佢問二家姐既事咁。
但我總無可能係自己女朋友面前示弱架，所以我決定摸摸佢塊臉安撫佢，順便抹走佢臉上既cream。
我：「到時再算啦，你專心係你既夢想上面就可以。」
Ellie：「不過…」
我：「放心喇分分鐘係我先下手為強，係我搵到佢地出黎先呢？係wor你覺得個
蛋糕點呀？好唔好食？」
要講下其他野分散佢既注意力先得。
Ellie：「好食呀，同之前整個d完全唔同，唔算好甜但好好食。」
我：「咁咪好，Ellen知道既話一定好開心，你知唔知佢整個陣完全聽唔到人地講野，連我企係佢對面佢都可以唔知。」
Ellie：「家姐就係咁架啦，一專心做一件事就咩都聽唔到，好喇你仲要去搵大家姐唔好哂時間係度。」
我：「痴線陪自己女朋友又點會係哂時間呢。又亂講野喇你。」
唔知係咪俾我既花言巧語氹到，Ellie笑得好開心，但佢都係堅持叫我快D去大家姐度，話大家姐食到蛋糕一定都會好開心。
我諗諗下都有道理，大家姐咁鐘意食蛋糕呢D甜品，佢一定會好開心。
加上我開始意識到自己阻住Ellie做野，可能都係快d走會好d。
於是我就拎返另一個蛋糕，再坐車去大家姐公司。
今次唔同既係我一開始就已經被保安攔下，最後仲要大家姐既袐書黎救我。
佢之後安置左我係大家姐既辦公室，話大家姐開緊會要等陣先可以見我。
但呢一等就係以小時計，一個鐘後大家姐都仲未返黎，好彩呢度有雪櫃個蛋糕先唔會融咋陰公。
而我自己亦都頂唔住，坐係櫈上訓著左。
到我再打開眼既時候，大家姐塊臉就馬上映入我眼球之中，仲要係近乎零距離個隻，嚇到我幾乎仆街。
大家姐：「哈哈嚇親你吖？唔好意思呀個會開耐左要你等咁耐。」
大家姐…終於見到佢…用終於好似好奇怪咁…