《無啦啦多左幾個家姐同細妹Season 3》: 最後的開端
基於小小個人既事，今次呢個所謂作戰既方針有所改變，由自己有事都無乜所謂變成一定唔可以有事。
如果有事的話，我諗我會至少再出事多四至五次。
不過其實人地晨哥由一開始都已經無諗過比我有事，係我on9諗埋一邊先搞出咁多事啫，而家只可以叫重回正軌？唉是旦啦。
今日就係同阿日約好既日子，雖然時間尚早，但各路英雄人馬已經齊集係我屋企做最後既準備，就連身在遠方既Anna都專登要求facetime見下我個死人樣。
當然，當中亦包括阿月啦，畢竟佢同我一樣都係今次既關鍵。
但同我唔同既係，佢被Sarah幾個團圑圍住講呢樣又講個樣，內容大慨都係叫阿月要小心D之類。
屌，對方係佢阿哥又點會傷害佢，佢阿哥恨不得將我碎屍萬段，要關心都係關心我多喲係咪呀。
唔知我既妒忌係咪太出面，隔住個mon既Anna似乎都睇得出。
Anna：「唉好心你就唔好咁小氣啦，佢地都係因為當左阿月係屋企人所以先咁緊張啫，而且呢兩日應該都同你講過相同既野千百萬次架啦，你咁都要呷醋？」
我：「道理我當然都明白，只係…」
說話只係講到一半，晨哥就出現左，緩緩行埋黎，仲扔左件唔知咩野比我。
晨：「著左佢啦，呢件野加上你自己個啲身手應該都可以保你安全既。」
果然係個類野…要佢幫我準備埋呢啲野真係辛苦哂佢。
晨：「其實本來我係想叫阿月借個個光學面膜比我等我處理，但你又好似想同阿日傾下，所以…唉我發現你真係特別鐘意同啲想害你既人談心架喎。」
基本上佢講得都無錯，所以我都無辦法反駁只好點下頭就算。
我再環顧四周，見到人來人往，全部都係因為我一個人忙到頭昏腦脹，仲有幾位未見過既師兄幫手整緊幾個mon。
唉之後要搵個機會好好答謝大家先得。
Anna：「喂傻仔明。」
就係我岩岩想整理一下思緒既時候，Anna又叫醒左我。
我：「點呀Anna姐？」
Anna：「唔好成日諗住自己欠左大家，大家係因為當你係朋友先義無反顧咁幫你，你可以做最大既報答就係無穿無爛，你明唔明？」
我當然明，但內心過意唔去呢一點始終都係無變，唉而家唔好諗太多啦，如果一陣仲係咁的話真係分分鐘出事。
我：「好啦我知道啦，你個邊都夜架啦，我地聽日再傾啦，到時大家慢慢傾。」
Anna：「好啦你記得要小心D，我返黎仲要見到你個死人樣架。」
就係咁我地結束左對話，我自己就深呼吸左下，望向阿月。
神奇既係，同一時間，佢都一樣望住我。
突然對上既目光令我有啲唔自在，但好快我就打消呢種唔舒服既感覺，吞左啖口水行過去佢地個邊。
我：「準備成點？」
月：「呃…其實…」
Ellen：「佢有咩要準備呀，人地既角色就係人質有咩要做啫，問題係你咋嘛，你Ready未吖。」
吖屌…佢又講得岩，其實佢都係負責坐係度，要做野既人係我先岩。
我：「咁我都係關心下阿月啫，話哂佢一陣要面對既係自己阿哥，想知佢心理上做好準備未。」
月：「我ok架，只要可以幫到家姐我做咩都無所謂，而且我都決定左要帶阿哥返黎，所以我一定會堅強，無論一陣發生咩事我都撐住。」
真係堅強，如果換轉要面對既人係我既至親我一定會想逃避，想搵人幫我處理就算。
「『無論一陣發生咩事我都撐住』…啊？真係好呢~」
呢把聲大家都熟悉係邊個，係幫我地策劃呢一切既人，晨哥。
佢講呢句說話既時候仍然保持平日既輕佻自在，但就係一瞬間面色突然嚴肅起黎，氣場亦馬上唔同哂。
晨：「好好記住你而家講既說話，話唔定一陣既情況會令你諗起呢句野。」
「時間都差唔多，出發啦。」
佢講完就打左一下手勢，屋內其他人就馬上收拾細軟，整裝待發。
而我，亦開始慢慢行去屋企門口，只不過行唔夠兩步就有人拉住我隻手。
其實係邊個拉住我我都心知肚明，但我都係選擇左擰轉臉，睇下佢地幾個。
傻豬黎既你地，做咩個個都係眼仔紅紅架，望到我心都酸埋。
雖然場面係咁感人催淚，但我地其實並無有任何交談，只係單純對望。
我當然希望時間可以就咁停住，可惜既係我知道時間唔等人，而我仲有更重要既野要做。
於是我只好咬緊牙關忍住傷痛，盡我所能攬住佢地四個作為道別。
之後我就同係一旁望住既阿月一齊離開，上左早已係門口等待我地既車。
車隊出發之後氣氛瞬間變得凝重，全程都無人講野，就連一向表現得輕鬆既晨哥都無發言，只係望住遠方
車程並未持續太耐，好快我地就去到同阿日約好既地點，一座已經廢棄既商場。
臨落車之前，晨哥遞左兩個無線耳機比我地，話一陣會用呢個黎比指令同消息我地。
然後我同阿月就係另外兩位師兄既護送下進入商埸，更搵到一個絕好既制高點，商場大部分比較空曠既位置都可以收入視線之中。
之後就係漫長既等待，畢竟我地為左確保萬無一失其實係早左好多黎。
但就算係漫長既等待之中我都唔敢鬆懈，怕阿日會突然唔知係邊度跳出黎，甚至緊張到被阿月叫我冷靜啲。
阿月：「如果佢出現左的話，晨哥應該會通知我地，所以唔洗咁緊張。」
又講得岩，但係緊張感仍然無法抹去，手仍然震緊。
「佢到左啦，係正門入，你地望落去應該就可以見到。」
晨哥既聲音亳無預警係耳邊響起，為呢一切拉開序幕。
我慢慢望落去，見到一個身影走入商場，而呢個身影亦緩緩抬起頭，好快就同我四目交投。
即使我地之間有相當既距離，但我仍然感覺到從佢身上散發出黎個種敵意，同佢細妹阿月完全唔同。
儘管如此，我終於都行到呢度，可以為所有野劃下一個句號。