《無啦啦多左幾個家姐同細妹Season 3》: 二擇其一

「變身！」
 
屌如果而家係特攝劇的話我一定咁大叫住跳落去同佢隻揪，可惜而家唔係。
 
而且啱啱望左眼，呢度都幾高，都係唔好亂黎，不了不了。
 
晨：「阿明落去，阿月留係度。A隊準備出黎，等佢落到地下就行出黎睇住佢。」
 
無錯，晨哥開始俾指示了，呢套劇耍正式上演了。
 


跟住指示，我一個人緩緩沿住旋轉樓梯向下行，逐步逐步接近阿日。
 
愈行得近就愈發現佢既目光一直都未曾離開過我，由一開始就一直自動追蹤住我。
 
個種目光望到我個心好唔舒服，但事到如今亦再無退路，唯有頂硬上。
 
去到地下，一直潛伏係暗處既幾位師兄亦緩緩現身，係我身後保護我。
 
阿日望左我身後既師兄一眼，然後冷笑左一聲。
 


阿日：「要咁多人保護你先敢出黎？」
 
我：「畢竟我唔可以係度有事吖嘛，仲有好多人等緊我返去。」
 
阿日：「既然唔想有事，你做咩要自己搵野黎搞，綁我個妹？」
 
雖然佢突然玩失蹤，但聽到個妹有事即刻上水，果然佢仲係好著緊個妹，好著緊屋企人。
 
如果係咁既話我既假設或者可以成立都未定…但而家仲未係時候…
 


我：「我之前都有講過，今次係要做個了斷，所有野都耍係今日完左佢。」
 
聽到我咁講令佢有啲懷疑我所講既了斷，但睇佢個樣好快就整理好思緒，繼續仇視住我。
 
阿日：「唔好咁多廢話，你要點先肯放我個妹走，之前所有野都係我既主意，唔關佢事。你想點對我即管放馬過黎，唔好搞我細妹。」
 
「你要我死都無所謂，反正都去到呢步所有野都再無意義。」
 
死都可以？所有野都再無意義？佢係度講緊乜？
 
今次到我猶疑了，同我預計既有啲出入喎…我expect既係佢會怒氣衝天而唔係死狗咁喎…
 
我：「既然你咁著緊你屋企人，做咩要粒聲唔出離佢地而去？」
 
呢個問題對佢黎講似乎係一個痛處，表情明顯起了變化。


 
阿日：「因為我做左唔可以挽回既錯事，已經唔可以再返去。」
 
「留比我既路就只有兩條，永遠離開又或者…」
 
「死。」
 
佢呢份決心令我一時之間無言而對，只能夠企係度，而且我亦仲未搞清楚佢所指既再無意義同唔可以挽回既錯事指既到底係咩。
 
就係呢個時候，耳邊又再次響起晨哥既聲音。
 
晨：「唉真係頂唔順，點解你成屋人諗野都咁多愁善感，偏激到下下都講到死咁？」
 
eh…又好似真係駁唔到…



晨：「你呢個細佬思想都幾危險下，你想我幫你講定你繼績自己黎？前者既話就咳一聲，唔係就咳兩聲。」
 
雖然我唔知自己有冇能力可以說服到佢，但去到呢步我唔想假手於人，想靠自己，所以我諗都無諗就咳左兩聲。
 
我：「你覺得咁就可以啦咩？你唔係好憎我架咩？我而家成個人企係你面前你同我講你決定咩都唔做喇仲要消失，去死？你黎搞笑架？」
 
刺激佢，我而家要做既就係挑釁佢刺激佢既情緒，呢啲野我最擅長，完全無難度。
 
我：「你咁樣放軟態度以為我真係會咁容易放過你細妹？俾返你？得，我而家就叫佢地掟佢落黎，你過去接住囉。」
 
「你對我做過咁多過份既野，傷害左我同我身邊既人，你認為我可以就咁就算？」
 
我一邊講一邊靠近佢，甚至揮手示意係後面保護我既師兄唔好跟上黎，嘗試藉此施加壓力。而效果亦非常理想，佢開始想避開我，向後退之餘仲掩住自己對耳。
 
我：「喂你唔係吖？我都行到埋黎你都唔郁手仲縮？」


 
無錯，我就係要引佢打我， 想佢可以釋放自己既怒氣同怨氣，當然我都會計住唔會比佢打死我啦。
 
阿日隨即望住我，似乎終於忍唔住，衝左上黎一拳打落我塊臉度令我跌倒，之後就係一拳接住一拳，就好似日本人整年糕咁一下接一下。
 
日：「係呀！我真係好後悔呀！！後悔點解當初自己咁蠢要咁做！又後悔點解唔出手狠啲，結果搞成而家咁兩頭唔到岸！！」
 
「我以為咁樣做大家就會開心，結果居然大家都唔開心！！家姐係咁！阿妹都係咁！！」
 
正當佢準備再揮多一拳既時候，我睇準時機一下接住佢既拳頭，順便擦一擦嘴角既血。
 
我：「終於都講到出口喇？我之前都好似你咁諗，以為自己既做法可以令大家都開心，結果居然事與願違，大家都鬧我。」
 
「你其實一直都有其他選擇，只係你自己睇唔到。」