《無啦啦多左幾個家姐同細妹Season 3》: 都是你

「而家諗返，係我心目中既二家姐係一個好靚而且非常堅強既人，雖然以前佢對住我既時候成日都好harsh，好似好嫌棄我呢個突然出現既細佬咁，但係我知道佢對所有屋企人都好好，有時甚至會想犧牲自己去保護屋企人，唔通咁樣既人你覺得佢會唔要自己既屋企人咩？」

雖然隔住咁遠唔係句句都聽得咁清楚，但唯獨呢句完整無缺地傳到入我耳邊。

我...先唔係你講得咁好既人...我只係...

算喇，你地兩個都冇事就最好喇，其他一切都係其次。

照個傻仔既性格，佢應該會先帶你地兩個返去屋企安頓下先，咁之後家姐就會送佢地返去...



即係話而家我無野可以做到...而且若然我突然出現係佢地面前亦只會造成混亂，就好似上次咁...

係簡單判斷過情況之後既我決定靜靜地離開，免得再引起咩風波。

其實我點解要黎呢度...我到底想睇到啲咩畫面...

當我行左一段路差唔多去到商場另一邊既出口既時候，突然有人係我背後好用力捉住我膊頭，嚇左我一跳。

我唔敢轉身去望到底係邊個拍我，因為我好怕係佢。



「你要去邊度？唔去見下佢地？」

直至聽到呢把聲我先敢慢慢轉身，因為知道左黎既人係家姐而唔係佢。

但當我真係望左過去既時候又被嚇傻左。

因為發現我既其實唔只家姐一個，仲有阿晨，佢仲要用一種十分唔友善既目光望住我，好似恨不得將我煎皮拆骨咁。

但無辦法之下我亦只可以故作鎮定，想辦法儘快脫身離開呢度。



我︰「點解你地會搵到我，你知道我會黎？」

晨︰「嘛我咁樣比得個地址你就係預左你會偷偷黎，不過我一早係呢度裝好哂cam，一來係為左防你個新細佬，二來就係為左睇你幾時出現，屌咁玩又唔知哂左我幾多錢。」

「言歸正傳，你真係諗住就咁就走左去？你最錫個班細佬妹而家就係下面個層咋喎，你真係唔去見佢地？佢地全部都好掛住你架喎。」

我︰「唔關你事...你次次都係咁多事...明明就同你一啲關係都冇但你係都要差隻腳埋黎...最後搞到成件事複雜哂...」

家姐︰「阿May你唔好咁喇，阿晨佢都只係想...」

我︰「家姐你唔好出聲，如果開頭唔係佢搞到情況咁複雜的話阿明就唔會被迫去到呢個地步，一次又一次咁陷入危險。」

家姐︰「你冷靜啲先...」

晨︰「朋友需要我幫我就會幫，就算幾難我都會去幫，直至幫到為止。」



講得好啊...咁又有邊個可以幫下而家既我？

我︰「哦係咩，咁之後如果再有咩事就麻煩你喇，家姐都係，我走先喇拜拜。」

好，趁佢地未黎得切反應之前離開，呢個係好機會！

我馬上就動身，輕輕推開家姐既手想話即刻離開呢個地方，但行唔夠幾步又被阿晨既說話拉停左個人。

晨︰「要我幫你細佬幾多次都唔係問題，但今次我幫既人唔係佢，我幫既人係你。」

「你自己應該都好清楚自己既清況，因為幾年前一個任性既決定導致今日而家呢個咁樣既局面，自己既細佬妹因為自己而係度努力，而你自己亦知道佢地...佢下一步就係要搵到你。」

「無錯，就係你，其實一直想人幫既都係你。」



我︰「痴線，都唔知你講乜。」

明明被佢講中左，但內心個份僅餘而又無謂既自尊卻拒絕承認。
 
唔得，我一定要快啲走，唔可以再比呢個人牽住鼻子走。
 
晨︰「你個細佬而家比你更加堅強，至少佢好知道自己想要咩野同要做咩野，一決定好自己眉既方向就會勇往直前。」
 
「但你呢？你仲要逃避到幾時？你聽完佢個番說話之後仲打算繼續逃避？咁樣去辜負一個咁信任你崇拜你既細路？」
 
家姐見到佢步步進逼，終於睇唔過眼行前兩步，企左係我同佢之間隔開我地。
 
家姐︰「夠啦阿晨，做人唔洗下下逼到人咁盡既，比人抖啖氣都得掛？何況呢啲都係我地既家事，你又何必咁緊張呢？我會好好話佢架啦，今日真係辛苦哂你，今次啲費用你遲啲比張單我啦，我會開張票比你。」
 
阿晨聽完之後深呼吸左下，然後又嘆左一口氣，似乎冷靜左啲。


 
阿晨︰「啊啊我知道啦你地想點就點啦，錢個啲小事就由佢啦最緊要幫到大家，咁我返去先啦，仲有手尾要做埋佢。」
 
佢一邊講一邊走，最後消失係我地兩姊妹既視線之中。
 
亦即係話，而家呢度就得返我同家姐兩個人。
 
家姐馬上就笑住咁摸我塊臉，一邊就安慰我話已經冇事，就好似細個媽咪走左個陣咁。
 
而我都同細個一樣，就只係識喊。
 
或者真係好似佢講既咁，而家既我就只係識逃避，唔敢為自己做過既野負責任。
 
無錯，我其實一啲都唔值得佢祟拜我。