《無啦啦多左幾個家姐同細妹Season 3》: 對不起
啊...仲要係度訓幾耐先得呀...好想返屋企呀大佬...
係，我而家係醫院訓緊，因為同阿日隻揪搞到自己五勞七傷，係Sarah佢地強烈既「要求」下我就被送左去醫院觀察治療，阿日都係一樣。
入住私家病房雖然係好寧靜可以靜養，但就真係好悶囉。佢地幾個都唔知有咩忙緊，除左Yui係呢度實習會過黎睇下我之外，其他人都冇黎睇過我，連whatsapp佢地都藍剔我。
結果我可以係度做既野就只有望住四幅牆發呆同思考下人生。 屌，幾時先可以出院呀...我諗我都唔係咁傷啫？嗱行得走得...嘩痛痛痛...
唉都係算啦，學Yui之前講既咁，呢啲野急唔黎，趁呢個機會好好休息一下仲好，畢竟我為呢件事都有一段時間冇好好訓過。
嗯，件事總算完喇，阿日同阿月都應該可以安樂咁生活喇我諗？
出院之後如果有機會的話我都想向佢地提議下不過為佢地改過個名，始終佢地而家呢個名都唔係幾...大家明喇？
如果可以幫佢地改過個好啲既名，我諗佢地應該都會...啊但係都要先徵求二家姐同意先得，話哂個名係二家姐幫佢地改...
啊仲有二家姐既事...要問阿月二家姐住係邊... 原來仲有呢一件好重要既事等緊我...
我估呢次之後我就真係可以抖下啦掛...?其實我真係唔多想做阿寶，但好多時都唔輪到我揀，總冇理由丟低啲野唔理架嘛。
好想hea下咩都唔理，但自己成日都咁戇鳩鐘意差隻腳埋去啲麻煩野度，次次都搞到自己周身傷都唔知為乜。
但奇怪既係，我無一次係後悔，今次都唔例外。
嗯？邊個打比我？仲要係FaceTime？
我拎出一直係我枕頭旁邊既電話，嘩唔睇仲好啲，原來係Anna打黎，屌我唔想比佢見到我而家呢個豬頭咁既樣喎...但唔聽的話我又會比佢罵到隻狗咁...
不過其實諗落我根本無選擇既餘地，女朋友打黎可以唔聽咩？做男朋友唔可以咁架嘛？
所以最後我都係乖乖地打開左FaceTime，俾Anna見下我而家呢個豬頭。
奇怪既係佢見到我咁既樣無乜表示，無發火亦無講啲乜，只係鄒鄒眉，嘆左一口氣。
咁反而嚇左我一跳，即刻就想同佢解釋「吾系甘牙」。
我：「Anna你聽我講先，件事其實唔係...」
Anna：「有乜好解釋吖，Sarah佢地講哂比我知喇，我今日打黎都係只係想睇下你傷成點，點呀死得未呀傻仔明。」
嘩屌你我想講你咁平靜講出啲咁有骨既說話真係好得人驚囉。
不過都好既，起碼我都唔洗再哂口水同心力去慢慢解釋比佢知，未嘗唔係一件好事。
我：「還好啦，只係仲係周身痛，但我諗應該好快就可以出院，唔洗擔心太多，你繼續專注你既學業就可以，俾心機快啲讀完佢返黎陪我。」
Anna：「痴線邊個話擔心你，只係本小姐悶咋嘛，如果唔係我邊會得閒打比你。」
係啦係啦，口是心非你最叻架啦，明架啦。
睇穿佢把戲既我並冇多講啲乜，只係笑左一笑，冇諗到咁反而牽動到佢既神經。
Anna：「你笑咩呀？」
我：「無...見到你開心咋嘛...」
Anna︰「哼，虧你搞成咁都仲笑得出，即係個兩兄妹既事你好滿意喇？」
我︰「算係喇，咁樣大家都好，我呢小小傷都抵啦係咪先？」
Anna無馬上答我，而係又再先嘆左一口氣。
Anna︰「都唔知話你好人好定傻好，算啦我都慣左，最緊要你個人仲係度我就已經心安。」
佢既意思我其實聽得明，我一直以來每一次做呢啲野個陣佢地有幾擔心我係知道既。
明明知道佢地布有幾擔心我，但我仍然要去做，我真係一個仆街黎，明明幾年前我仲話要比平凡幸福既生活佢地幾個，唉。
今次輪到我深呼吸左一大啖，為我接下來想講既野入一入油，充一充電。
我︰「一直以黎...好對唔住，今次一定一定會最後一次，我以後一定會錫住自己個身。」
Anna今次又唔出聲，只係隔住個mon望住我，持續左近半分鐘。
Anna︰「無論你點做都好，我只係想你知道，只要你安全我點都會支持你，就係得咁多。」
「我唔係你身邊既呢段時間要自己保重，真係要好好錫住自己，雖然有Ellie佢地係度我應該唔洗擔心太多...不過你份人...唉我都唔知點講好。」
「算啦唔講咁多啦我都仲有功課未做完，你有咩事就打比我啦知唔知？」
我：「咁冇事可唔可以打比你？」
Anna馬上哼笑左一聲，講左咁耐第一次見佢笑。
Anna：「唉你鐘意啦，但我唔保證我會聽架下，喂真係唔講啦我夠鐘出門口喇。」
係佢伸緊手去收線個一下，我馬上叫住左佢。
我：「Anna！」
聽見我突然大叫Anna都嚇左一跳，見到佢個人彈左一彈。
Anna：「又點呀陳煒明先生，我真係要出門口架啦，如果係普通野我地下次再傾啦好無？」
我：「我愛你。」
佢一講完呢句我就即刻接話，殺佢一個措手不及。
呢招亦確實起到奇效，佢今次成個人freeze左，甚至有一刻我以為係信號唔好搞到畫面靜止左，但見到佢眨眼我先知唔係。
我都冇刻意去催佢比反應，只係默默咁等佢。
Anna:「傻仔。」
佢只係留低呢短短兩個字，擦擦眼角之後就收左線。
奇怪既係，我都不自覺咁擦擦我既眼角，居然有啲濕潤。
可能係太攰喇，嗯一定係咁。
「knock knock」
嗯？哦又係啲姑娘黎問呢問路，問到我都已經記得哂佢地啲pattern。
不過講時講啦，呢間醫院啲護士姐姐質素認真麻麻，無一個夠Yui靚，如果有機會真係要同阿信講下。
呃...諗諗下都係唔好了...
我︰「請入黎~」
講完之後病房既大門就慢慢被打開，但入黎既人唔係咩姑娘護士，而係阿月，佢仲帶住一個果籃。
唔係，而家應該叫佢Ashley先岩？
Ashley︰「唔好意思係你休息既時候黎打攪你...我放低個果籃就走...」
尷尬，除左尷尬之外都係尷尬。
一時間我咩都唔識做，只係識望住佢。
過左一陣之後，我先醒起我應該要請佢坐低，急急腳起身忍住痛去拎開櫈上既野比佢坐。
佢恭恭敬敬咁坐低，開始環顧四周，睇下我間病房，有咩好睇吖講真病房一間，又唔會有咩PS4之類既野係度。
相信佢都好快發現到呢件事，轉而慰問我既傷勢。
Ashley︰「eh...你好成點？」
我︰「其實我自己覺得可以出院架啦，不過醫院唔俾我走我都無辦法。」
Ashley︰「咁我諗醫院都係有佢地既顧慮所以先唔俾你走，唯有忍耐下，但我見你咁精神我都安樂啲。」
我︰「傻喇唔洗咁喎，係呢你阿哥點？佢應該都係呢間醫院架，你有無去睇下佢？」
Ashley：「有...」
一提起佢阿哥佢就面有難色，不禁令我懷疑係咪出左咩事。
喂喂喂我出手肯定唔夠佢重喎，佢會傷得過我？唔好玩啦~
我︰「係咪有咩事？」
Ashley︰「佢個人就冇乜事...只係咩都唔講...」
唔...我估我知道咩事啦，應該係一時間面對唔到自己同突如其來既變化所以先咁。
我︰「俾啲時間佢啦，唔會有咩事既，畢竟岩岩先發生左咁多野。」
「你又有咩打算？話時話其實Ashley係咪真係你英文名黎架？」
Ashley︰「嗯，唯獨呢個我無講大話，呢個係我媽媽為我改既英文名，係佢唯一留比我既野所以我一直都冇改呢個名。」
聽到佢咁樣既答覆令我有啲意外，同我想像中好大分別。
我仲以為佢地會好憎唔要佢地既父母添...
Ashley︰「唔洗擺出咁既反應既，我知你諗緊咩，其實我一直都冇『憎死佢地』個種感覺。」
「我個時好細個，除左喊同拖住阿哥之外咩都唔識，亦唔明白點解父母會唔要我地，明明我記憶入面佢地一直都對我地好好，咩都肯買比我地。」
「但阿哥就一直話佢地係衰人，唔可以原諒佢地，所以之後我都無再係佢面前提起過。」
「我明明記得媽媽佢好靚而且好溫柔，但時間耐左我發現自己對媽媽印象愈來愈模糊，呢幾年甚至連佢個樣都唔再記得，而家就只係剩低Ashley呢個名同阿哥呢兩樣野可以令我諗起媽媽。」
唔知點解聽完佢咁講之後我會諗起我個死左好耐既老豆，我都係已經幾乎完全唔記得哂佢個樣，但仍然隱若記得佢個把好低沉既聲線。
果然我同佢地都好似。
我︰「咁就一直用呢個名啦，將你對你媽媽個份思念好好放係心入面。」
Ashley︰「我會，之後我都會帶住呢個名同我阿哥一齊去展開我地既新生活，搵屬於...」
我聽到一半之後揮一揮手，打斷佢之後想講既野。
我︰「留低啦，我之前都講左呢度已經係你地既屋企，唔需要再去其他地方。」
「而且...二家姐都需要你地，我係咁諗。」
佢聽完並無馬上答我，只係低下頭望住白色冒既地板，過左一陣先帶住一對已經變得水汪汪既眼睛返黎見我。
Ashley︰「我話比你知二家姐住邊啦。」
「我覺我得二家姐都需要你，應該話係比起需要我地，佢更加需要你。」
今次到我呆左...
估唔到佢居然自己直接講出黎...