《無啦啦多左幾個家姐同細妹Season 3》: 不能再逃避

送走Sarah之後，直至第二日我都冇離開過自己間房，甚至連房門都鎖埋。

係件事完結之前，我無面目見佢地幾個。

所以第二朝一早我就起左身，梳洗一番整理好自己既床鋪之後我就趕係所有人起身之前離開屋企。

然而再精密既計劃都有誤算既時候，我既誤算就係大家姐。

無諗過我出門口既時候大家姐先咁岩返到黎。



大家姐見到我都非常驚訝，原本酒醉時既迷迷糊糊都一掃而空，好在無即場嘔出黎，如果嘔中我我又要上房換過件衫，又會耽誤到時間，分分鐘會撞到Sarah佢地。

大家姐：「咦...我有無睇錯...你係阿明？做乜咁早就出去既...？」

你都知道而家好早架咩，你而家先返黎係咩玩法。

我：「嗯..有啲野要做，我出去喇大家姐你自己小心啲啦。」

大家姐見我動身即刻拉住左我唔俾我走，仲lur下lur下咁講左幾句完全聽唔明既外星話，唯一聽得明既就只有「幫我斟杯咖啡」。



我望望錶，時間尚算早，就算係Yui都唔會咁早起身，算啦服侍埋你啦。

就係咁，出於計劃之外我仍然扶住大家姐去到飯廳坐低，並為佢倒左杯咖啡。

奇怪既係當我遞上咖啡之後佢並無馬上飲用，而係帶住酒氣傻傻咁望住我。

嗯...點形容佢好呢，呀就好似<<頭文字D>>黃秋生飲大左望住周杰倫個樣咁。

雖然唔係好明佢想點，但而家無時間理咁多啦，再唔出門口真係有危險。



斟酌左一番之後，最後我都係決定出發。

但唔知大家姐係咪有心玩我，我行唔夠兩步佢就叫我個名話有野要比我。

係就係好唔耐煩，不過我都係轉身望返向大家姐個邊，睇下到或底佢有咩想比我。

轉身之後只見佢手拎住一張卡揮舞住，仲話我會用得著。

我仔細一睇，發現佢拎住既係張匙卡，馬上就意識到係二家姐屋企用既。

咁亦即係代表大家姐其實已經知道我係想去搵二家姐。


我一邊跑過去拎一邊多謝大家姐，而佢即亦只係繼續帶住醉意咁同我講左句「加油」。



好似玩RPG咁係大家姐手上拎到匙卡之後既我終於終於踏上我既征途，出發去搵二家姐。

解決左quest之後既進度一下子就變得好快，唔洗半個鐘我就已經黎到Ashley比我既地址，抬頭一望天空都被密密麻麻既高樓所困住，個片早已唔多藍既天空係呢度只係可以睇到一個長方形既形狀。

雖然地址上既住宅係比較新既私人屋苑，但我都係好難想像二家姐會住係呢一區。

唉屌諗咁多做乜吖，Ashley都話左二家姐住係度囉，上去睇下咪得囉。

多得專業扮工既保安員，我非常順利係唔洗登記既情況下就進入到二家姐所住既座數，如果要登記既話一定會驚動到二家姐，到時就麻煩得多。

部𨋢愈接近二家姐既樓層，我既心就跳得愈快，甚至感覺到自己既呼吸都開始變得急促，連同𨋢既師奶都用困惑既眼光望住我，可能係以為我有咩病之類。

萬幸既係佢住低層，所以我都唔洗同佢相處太耐，如果唔係就真係尷尬囉。

最後，我終於都黎到呢度，二家姐既屋企門口。



屌我做乜撚野呀，隻手震得咁犀利都有既！

無錯，雖然已經企左係大門前，但隻手突然間好唔聽駛，點拍都拍唔到張匙卡埋個鎖度。

我︰「屌！」

見四周無人，我暗自大叫一聲幫自己吶喊助威，然後把心一橫一下把拍落去，電子音以及機械音隨即響起，示意大門已經為我而開。

事到如今都再無退路，應該話由出門口個一下開始我就已經無打算再退。

今次唔可以再逃避。

我慢慢拉開大門並進入屋內，諗住嘗試唔好打草驚蛇。



哇...四圍行下先發覺到間屋既裝潢唔算好豪華好有氣派，但俾到人一種好舒服好自在既感覺。

聽Ashley講呢度係買而唔係租既，即係話啲裝修係二家姐既手筆？果然有返咁上下既品味。

如果想同鍾意既人一齊住既話，呢度一定係一個好地方，好愛巢。

但睇左咁耐都仲係唔見二家姐既身影，唔通咁早就出左去？

咪住先...點解呢度齊整得有啲古怪...？入門口到而家我連一件衫都未見過既？

簡直就好似一間空屋咁...

唔通...

心感不妙既我馬上跑去最大既睡房，一下打開哂眼見到既所有衣櫃。



果然...

唔好話衫，我連一隻襪都搵唔到。

居然都係黎遲左一步...？嗯？呢張係...

係其中一個衣櫃既角落竟然有一張A4紙平放左係度，如果個衣櫃係白色的話應該都幾難發現到呢張紙。

相信呢個一定係二家姐刻意安排，所以我無諗咁多，即刻拎起左張紙睇。

「日同月就拜託你照顧喇，雖然佢地之前對你做過啲過份既野，但佢地本性唔壞，只係我無照顧到佢地既感受所以先搞成咁。」

以字既痕跡黎睇二家姐似乎仲有野想講，但唔知咩事無再寫埋落去...
…

而家要點做先好...

紙既右下角有寫埋今日既日期，即係話呢張野二家姐好有可能係今日寫，咁我應該仲有機會搵到佢先係！

唔可以再俾二家姐就咁走左去！