《無啦啦多左幾個家姐同細妹Season 3》: 只差一點點
我係呢間空無一人既屋裏苦思左一陣，思考緊二家姐可能會去左邊度。
佢封信講到咁...應該係想離開香港？機場？
但而家先趕去機場的話未必黎得切...而且我都無十足既把握二家姐一定會去機場...
點算好呢...行錯一步既話好有可能會就咁錯過二家姐...
嗯？唔知佢地會唔會肯幫我呢？
我鼓起勇氣，硬著頭皮打左幾個電話。
「喂，好耐無聯絡喇，雖然咁樣好突然但可唔可以請你幫我一個忙？」
「係呀係呀，有的話幫我拖住佢同埋通知我就我得架喇，真係唔該哂。」
呼，好彩佢地仲肯幫我，咁樣的話機場個邊暫時就可以安心，可以有時間諗下二家姐仲有咩地方會去。
如果二家姐真係想離開香港既話...佢走之前應該會去幾個地方睇下？一個係我地屋企，一個係阿日同Ashley佢地既屋企。
我就唔信二家姐會絕情到可以咩都唔理就直接離開，我信佢一定會去睇下佢啲細佬妹先，至少一定會去見阿日同Ashley。
當然唔包括我啦，我估佢而家最唔想見到既人就係我。
…
都係買個保險穩陣啲。
我再次撥出一個號碼，不過今次唔再係打比啲好耐無聯絡既人，而係Ellie。
Ellie︰「喂...？」
聽到佢矇矇矓矓既聲線我先醒起而家其實仲好早，正常黎講呢個鐘數佢應該仲訓緊覺先係。
嘩咁點解頭先佢地幾個把聲都咁精神既？唔通咁早就已經起左身做野？
我︰「對唔住啊嘈醒你，但我而家有啲野想你幫幫手，係關於...」
Ellie︰「係咪二家姐既事...？」
嘩點解你會咁醒既，我咩都未講架喎你就已經知道我想問咩？
Ellie︰「Sarah尋日有同我地提過話你神情有啲古怪，似係想今日就開始去搵二家姐...但我唔知道二家姐係邊喎...我有乜可以幫到你？」
原來係Sarah...即係我咁早起身其實都冇乜意義，佢地一早就已經估到我今日會有動作...
本身打比Ellie就係唔想比Sarah佢地知，睇黎都無乜意義了。
我︰「唔緊要呀，我都係想要問你攞Ashley..即係阿月既電話號碼，你會唔會有？我而家需要搵佢幫手。」
Ellie︰「我記得家姐之前有拎到...你等等..一係我轉頭Whatsapp俾你好唔好？」
我︰「好吖，你啊都唔好成日掛住研究啦，要休息多啲知唔知？見親你都好似好似好攰咁，有啲野係急唔黎架，慢慢黎啦。」
我居然有臉講呢啲說話，都幾好笑。
但溫柔既Ellie並無戳破呢點，只係嗯左一聲就掛斷左電話。
我都唔可以一直係度等...邊行邊等Ellie既Whatsapp喇。
落到樓行左都未夠十步，電話就已經叮左一聲，收到Ellie比我既訊息。
除左一個電話號碼之外，仲有短短兩個字，「加油」。
點解呢兩個字望落去有聲既？點解呢？我都唔知道。
點都好，我唔敢怠慢Ellie既心意，馬上依照上面既電話打左過去。
唔知係咪我心急既關係，總係覺得過左好耐都無人聽，好彩最後都聽左。
我︰「喂係咪Ashley？我係陳煒明呀。」
「點解你會知道我電話既？你搵我有咩事？」
OK呢把聲的確係佢，無打錯電話Good！
我︰「而家事出突然你聽我講先，二家姐唔見左，佢屋企啲野都無哂，但我覺得佢一定會去見下你地，如果佢黎左你地個邊你一定要通知我同幫我拖住佢，明唔明？」
Ashley︰「呃…明係明既…不過…發生左咩事？」
我︰「我都唔知應該點同你解釋先岩，但呢件事好重要，如果我地留唔住二家姐既話唔知要幾耐先搵得返佢，甚至…」
我唔敢講出最後呢幾個字，一來怕嚇親Ashley，二來係自己個心仍然唔想事情最後會變成咁。
Ashley似乎明白我既意思，只係表示明白之後就無再多言掛斷左電話。
佢咁既反應即係代表二家姐仲未去佢個邊…？如果係咁佢會先返我地屋企去見Uncle或者Sarah佢地？
應該唔會吖…如果真係咁既話Sarah或者Yui應該會打俾我先係。
咁二家姐仲會去邊？
唔通係…個度？
雖然個腦仍然係度計算緊相關既可能性，但身體卻已經擅自行動，開始出發。
二家姐可能會返去個度都未定…
唔仔細思考就行動最終都係要付出代價，我坐車去到半路中途先發覺自己根本無個度既鎖匙，去到又點入門口呢？
就算咁好彩二家姐真係係個度，唔通我走去禁鐘叫佢開門比我咩？
為左解決呢個難題，我又打左一個電話，今日真係打左好多電話，用左好多關係，學阿Joey話齋，我好多謝同我發生過關係既人。
今次打既係唔知酒醒未既大家姐想問佢會唔會有後備匙，本來都無乜期望，因為我估佢連我講乜佢都未必聽得清楚甚至連電話都未必會接，但好彩既係佢都有聽到，仲lur下lur下咁話比我知有一條後備匙。
我照住佢講既位置去搵，果不其然俾我搵到，總算解決左目前既難題先。
進入到屋內，同之前個間又係一樣既情況，整整齊齊，一眼望落去唔似有人黎過咁。
裝潢就同以前既一樣，咩都無變到，只係人同事好多都唔同哂。
我仲好記得第一次黎呢度既時候係同大家姐，二家姐一齊黎，當時係因為咩呢？聖所羅王既事？我都唔係好記得了。但我記得既就係個次我地傾左好多，仲第一次食到大家姐煮既野，睇到好靚既星星，過左好開心既一晚。
唉…居然而家先諗起呢啲野…我係發生咩事呀…
正當我再次一籌莫展之際，雙眼居然唔知點解望向廚房洗手盤上既一處水跡。
我再望望係旁邊既一隻倒立放住既杯，以及上面既水珠。
佢真係有黎過呢度…
我又差一步…？
就係呢個時候，電話突然叮左一聲。
我望一望，發現左係Ashley send黎，訊息只有短短三個字。
「佢係度。」