福爾摩斯講過:排除所有唔可能嘅事,剩低個個即使幾咁不可思議,都係事實。
就係「怯!你就輸成世!」
.
.
.
.
.
.
.
其實唔係,我諗用呢句形容會更貼切,就係:




港孩發爛咋!港孩嘅威力真係連喪屍見到都驚!我諗係真㗎!由我目前睇到所有嘅證據,都指向呢個論點。請容許我係到解釋一下普通喊法/尖叫法同埋「港孩發爛咋」喊法/尖叫法有啲咩唔同。
普通喊法/尖叫法可能有幾個原因,因為驚或者傷心。
而「港孩發爛咋」喊法/尖叫法背後只有一個目的,就係希望透過呢種方法逼使其他人做達至佢地心目中期望嘅事。但呢啲都只係我嘅推論,我需要測試一下去證實我嘅推斷。一切都要進行得夠快,因為以我地呢到只有小量糧食嚟講,如果我唔快啲諗對策,即使「港孩發爛咋」真係可以用嚟對付啲喪屍,等多幾日,我班學生都會餓到冇曬力氣「發爛咋」。就係呢個時候,班午睡緊嘅小朋友都陸續醒曬,
我先安頓好佢地,叫佢地自己靜靜地睇書,玩下玩具先。我諗首我都係先唔好俾佢地知發生咩事先,如果唔係佢地驚,就好難「發爛咋」。要測試我心入面嘅想法,我諗我要先捉一個喪屍入嚟做測試。咁我要點捉呢?我一個人點可以係出面捉到一隻喪屍呢?我又唔夠揪,咁實係智取啦!我又可以點智取法呢?
而且係捉隻喪屍返嚟之前,我要先簡班入面幾個最難攪嘅細路出嚟先,我地班入面都有幾個港孩代表,「發爛咋」嘅技術已經係爐火純青,所以我心入面好快就出現咗一份名單。
如果要簡「發爛咋」第一名嘅話,一定非明仔莫屬,晴晴、小可同埋小森位居其後,但都唔差。
諗好簡呢4個細路做測試之後,我突然收到校長嘅電話。
「喂!終於打得通啦李老師!!你地冇事呀嘛?」
「我地冇事呀!校長你喺邊呀?」
「我喺醫療室呀!啱啱有個小朋友唔舒服,我陪佢喺醫療室到休息,見到出面出咗事,依家我地匿埋咗喺入面。」




我帶住一絲希望問:「個小朋友喺邊個呀?」
「陳建豪。」
我聽完之後感動到流咗兩行眼淚,原來豪仔冇事。但後知佢個邊一啲食物都冇我就好擔心,我又仲未諗到點做測試。
最恐怖嘅係過咗唔夠20分鐘,我又收到校長電話,電話入面嘅豪仔為我帶嚟一個極壞嘅消息。「喂!校長!」
「呀姨!我係豪仔呀!」
「豪仔!你見點呀!」
「呀姨!我好驚呀!」豪仔喊住咁講。
「校長佢流咗好多血呀!佢會唔會死架!」吓!校長受咗傷,點解嘅!我好焦急,因為我怕校長喺俾喪屍咬咗。如果喺咁,豪仔嘅處境就好危險。
我問:「校長點受傷架?佢出過房間嚟?」
「喺呀!佢話出去搵啲嘢食,返到嚟就流曬血啦!」




「好!你俾個電話俾校長!」點算,依架每一分每一秒我都怕校長屍變,我好怕豪仔會有危險呀!
「校長!你喺咪俾喪屍咬咗?」
「喺!」、
死啦!我知道醫療室一眼望曬,根本就無可以匿埋嘅地方,校長屍變之後,豪仔必死無疑。
我忍住眼淚,不停咁逼自己諗辦法,佢喺我呀哥個仔,我一早已經當咗佢喺我個仔。如果佢出咗事,我不但對唔住我呀哥,我自己都會痛不欲生。突然,我望到天花嘅通風管道,我知道呢個喺連接住每間房,於是我即刻拜託校長將豪仔托上通風管道,等佢可以爬過嚟同我會合。但當校長將部電話俾豪仔嘅時候,我已經係電話入面已經聽到喪變嘅低吼聲。太遲啦!太遲啦!咁我唯有博一博啦!
我對住電話入面嘅豪仔講:
「豪仔!我有嘢要同你講!
其實你好中意個啲模型公仔唔係你自己整唔見,我見到係你媽咪丟咗,然後又屈返你冇手尾。
上次學校送嘅海洋公園門票唔係過咗期,係你媽咪想你留係屋企溫書,所以講大話呃你唔俾你去。
你唔好嬲!
唔係!你想嬲就嬲啦!
你嬲到尖叫或者喊都得㗎!」
我希望我可以係短時間內激發豪仔「發爛咋」,令佢可以自救。呀⋯⋯,電話對面傳嚟一聲尖叫,然後就收咗線。我唔知個下尖叫究竟係豪仔嬲嘅尖叫,定係佢遇害嘅尖叫⋯⋯








#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/