我唔知個下尖叫究竟係豪仔嬲嘅尖叫,定係遇害嘅尖叫⋯⋯我即刻爬上通風管道,向豪仔嘅位置爬去。爬到醫療室嘅上面,我揭開其中一塊板望落去。望到醫療室入面嘅境況,我感動到心入面講咗句「謝天謝地」!
豪仔佢冇事,坐咗係地下到好嬲咁喊緊,而校長就暈咗係到,郁都唔郁!我唔知校長係咪已經死咗,啫係俾豪仔嘅「發爛咋」煩死咗。但唔理得咁多,我跳咗落地,諗住將豪仔帶返返去。而豪仔見到我喊得又大聲咗啲,大概係怪我幫佢媽咪暪住佢。豪仔喊大聲咗個下,我見到瞓咗係地下嘅校長抽搐咗一下,嚇到我彈咗起身。我拿拿臨將仲喊緊嘅豪仔抱起抬上通風口,然後自己就爬返上去,帶豪仔爬返課室。返到課室,豪仔仲斷斷續續咁係到喊,但冇啱啱先咁激動。
「媽咪真係好衰呀!我憎死佢呀!」豪仔喊住對住我講。
「豪仔!唔好咁嬲啦!其實你媽咪都係為⋯⋯唉!係呀!你媽咪真係好衰呀!我地出到去一齊鬧爆佢。誓要討回公道。」
豪仔嬲爆爆咁點頭。
本來我仲諗住為我呀嫂辯解,不過算啦!豪仔依家呢種情緒對我地生存更有利。呀嫂,你就當我對你唔住啦!但,依家,有咩重要得過條命呀!過咗陣,我拎咗課室嘅一個羽毛球拍同埋一卷繩經通風管道爬返返去醫療室到。因為我諗到醫療室入面得校長一個喪屍,咁捉佢返嚟做測試就啱啱好啦!我爬返返去醫療室上面望落去,見到校長又起返身,係入面漫無目的咁行嚟行去。我係上面整咗啲聲出嚟,等佢望上嚟,佢見到我之後就即刻衝到我正下方,手向上伸但唔夠長捉住我。然後我調整好角度,雙腳對住佢個頭咁跳落去,一嘢踩到佢個頭跌低,校長又暈低咗。之後,我就快快手用繩纏住佢把口,為免俾佢咬到,再用繩綁埋佢啲手手腳腳。我一面綁,心入面一面向校長道歉,校長平日都得我不薄,但我今日就咁對佢。但我都唔想㗎!我身上背負住十幾個學生嘅性命,我唔可以唔咁做!幾經辛苦,我終於將校長拖返返課室。然後我就開始安排我嘅測試,我將校長放係課室中間,只鬆開佢腳上嘅繩,再同明仔、晴晴、小可同埋小森講:「校長話要罰我地留堂呀!」
呢幾個小朋友,我遲小小放學都已經癲曬,所以我用呢招激起佢地「發爛咋」一定有用。
「吓!」
「我唔制呀!」
見到佢地擺出極嫌棄同埋極不滿嘅表情,我微笑,指住瞓咗係地嘅校長再講:「咁等陣校長醒咗之後,你地喊呀,噪佢,噪到佢郁唔到,咁我地就可以準時放學啦!好冇?」「唔會俾人鬧咩?」小森猶疑咁問。




「唔會!今日開始唔會,你地想點就點啦!我唔會鬧你地㗎!有咩不滿就對住校長鬧啦!一定要令佢俾我地準時放學,而且我已經綁住咗校長,佢打唔到你地,又鬧唔到你地,放心啦!」我說服佢地。
佢地聽完點點頭。之後,我叫其他小朋友靠牆坐等睇表演。
隔咗陣,我見到校長起身,開始恢復活動能力。我自己係旁邊扯住綁住校長嘅繩,令佢只可以係好細嘅範圍入面行走,確保即使測試失敗我同班學生都唔受傷。然後我就向4位班(港孩)代表示意可以開始,佢地就開始鬧校長,當佢地見到校長俾我扯住,又真係冇咩反應之後,佢地就開始放心咁鬧,放心咁噪。
「我要以後冇功課呀!」
「校長,你真係好煩呀!我唔要留堂呀!」
佢地鬧鬧下就喊,喊喊下就尖叫。“Well done” 
我心入講。果然係本班嘅4大港孩之首,由平靜去到「發爛咋」嘅情緒唔需要時間醞釀,話嚟就嚟!其他同學真係要向佢地好好學習。及後過咗唔夠10分鐘,校長就成個倒地不起,同之前唔同,校長反曬白眼,身體極彊硬。我推斷佢今次真係死透。我綁返佢雙腳,係到等,等咗成個鐘佢都冇醒返。
我心中暗算,原來呢種程度嘅港孩係可以將喪屍煩死。得出呢個結論之後,我個心跳得好快。
唔係因為我間接殺咗校長。
唔係因為我想利用班細路統治世界。




唔係因為覺得驚,而係覺得好刺激,好興奮!
好佩服自己咁聰明,係我地呢間幼稚園被喪屍攻陷嘅短短唔夠4個鐘,我就搵到對付喪屍嘅辦法。
哈哈!
我係咪要成為拯救地球嘅英雄啦!



#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/