(嚴重FF愛情輕鬆同居故）《我與貓系女室友的二三事》: Ch.1

人到三十歲，有好多男人喺呢個年紀都無錢無樓更加唔好講女人。但可能我比其他人幸運，深知有樓就會有女嘅道理，喺好細個嗰陣就已經認真讀書，出到社會做嘢慶幸有伯樂提攜，喺社會上算混得唔錯，又玩下投資，屋企人幫手先俾到首期。 

無錯前面嘅都係廢話，靠父幹先係人生大贏家！ 雖然買咗細單位，但俗語有話「麻雀雖小但五臟俱全」都叫做有個安樂蝸。宜家樓就有啦！但由於做工程師經常OT都無時間識女仔。

女⋯⋯都唔知幾時先有。 雖然無女但係終於可以自己一個人住，唔使同屋企人住係開心嘅，得閒喺屋企客廳到睇下四仔，無左格仔，都咪話唔過癮，完全無人阻住晒，仲可以光明正大咁睇。 

而且咁啱有個好兄弟都同我住同一座大廈，放假都可以一齊睇通宵波，打下麻雀，所以我好期待搬屋嘅日子。

 正當個單位裝修好，第二日可以拎埋行李，開開心心咁搬去過自己一人世界嗰陣，我個白痴呀妹竟然同我講：「呀哥，我有一個外國回流返香港嘅朋友需要搵屋住，不如佢住你嗰到，你收佢租呀！」



 聽到呀妹呢句說話我即刻放低手機望住佢。

佢見到我唔耐煩嘅眼神就笑住話：「唔緊要啦！你咪當係有額外收入幫手供樓囉！佢話唔介意同人share house，外國好興㗎！」 

佢唔介意但我好介意囉！ 望住呀妹個甜美笑容，我內心有一種唔好嘅預感。因為我知道我呀妹講得好聽啲就係天真爛漫，唔好聽就係低能白痴兼低B，邊個做佢男朋友嗰個一定係英雄，因為佢會睇實呀妹唔會俾佢做埋啲白痴嘢遺禍人間。 

你話我同呀爸呀媽或者同妳住就話啫，無啦啦我做咩要同個三九唔識七嘅人同居呀！ 我深呼吸一下然後問佢：「黃嘉柔妳同佢點識㗎？」 

「我哋喺外國網上討論區識㗎！」 聽到佢呢句説話我眼都突埋出嚟，痴線㗎！我就知道我呀妹廿幾歲人諗嘢仲咁天真。外國網上討論區識都信得過！ 



「個朋友男定女呀？」 黃嘉柔歪住頭諗左一陣，然後話：「嗯⋯⋯我無問過，不過佢喺討論區set個性別係女，佢個名叫Man。」 

今次無啦無啦⋯⋯ 人蠢原來真係無藥醫㗎⋯⋯ Set性別做女，但係個名叫Man，擺明係紅巴啦！ 

「妳唔好傻的嗎咁去信網上面嘅人好唔好呀！妳連佢男定女都唔知，就叫我比佢住埋同一間屋？我話佢係人妖都得啦！如果佢真係女仔真係多謝妳，叫佢同個男人一齊住。」 

我已經好留情面咁無鬧到好絕。我心諗妳有無睇外國新聞，有好多變態殺人狂，妳真係唔擔心個嗰係一個大隻肌肉佬將妳呀哥我先姦後殺，再姦再殺？真係諗起都菊花痛。 

黃嘉柔聽到我嘅說話就好嬲，佢竟然嬲到面都紅埋向我大叫：「呀哥！你點可以話我朋友㗎！佢係好女仔嚟㗎！」



 係！係！佢實係㗎！佢實係當妳係好朋友㗎！ 唉！我真係唔明點解妳呀哥我咁醒，但點解妳咁豬！都唔知道呀妹隻豬有無比男人呃咗。 

我真係無咁好氣同佢講嘢，好難得今晚唔使OT。我都懶得睬佢繼續用電話玩遊戲，心諗佢都痴痴哋㗎。 但係嗰一刻，我無發現到呀妹佢眼神有啲閃縮，正確嚟講係心虛！ 由細到大，呀妹佢都唔識講大話，只要一望佢個樣就會知道佢諗緊咩，甚至知道佢又做咗咩低能嘢。 

如果嗰陣我有發現到佢個心虛樣，就唔會發生之後咁狼狽嘅事，亦都唔會遇到命中注定嘅佢。