第二日我已經迫不及待咁執埋剩餘嘅行李準備去新屋,就離開住左三十年嘅屋企前,呀媽好語重心長咁拉埋我去一邊。

佢一定會話呀仔呀,呀媽同你講然後講一大輪野,長氣到死。

「呀仔呀,呀媽同你講。」

See比我講中咗。

「我同Daddy幫你手比首期,係為咗你第時結婚生仔。你都唔細啦,係時候識返個女仔,快啲生返個B比呀媽抱孫。」



我拍一拍呀媽膊頭:「放心啦,我好快就會識到女仔嫁啦。」

有層樓係手,啲女仲唔飛撲埋嚟!我都想快啲識返個女朋友仔到時日扑夜扑大戰千幾回合。

之前某參選議員講過一個好嚴重嘅問題,就係樓價太貴,年輕人想扑野都無地方可以扑呀!不過唔緊要,宜家有層樓就唔同講法。

「放心啦!我都大個仔啦!我走啦。」早一,兩日已經搬左好多野去新屋,拉埋呢轉行李就可以唔洗再返嚟,我拉住行李往門口方向走。

好鬼型咁頭也不回,一走出家門我立即深呼吸,係自由嘅空氣!我聞到自己嘅空氣呀!



係呢三十年我從未感受過!宜家終於可以一嘗自由嘅滋味。

我call左的士無幾耐就到左我住個座大廈,一入去就見到個保安呀姐坐左係一邊係到偷懶,完全無理過其他住客。我拉住行李走入𨋢,正當我想㩒關門制個陣,忽然有一把好甜美嘅聲音叫住我:「唔該!等埋。」

我立刻㩒返開門制,𨋢門一開就見到一個著住紅色制服裙,拉住行李嘅空姐走入嚟。

「唔該。」佢望住我,露出好甜嘅笑容講。

「唔洗客氣。」唔知係咪做空姐嘅都一定喺靚女,我忍唔住偷偷望咗佢幾眼。



佢好像發現到我偷望佢:「咦⋯⋯我好似無見過你嘅?」

我無諗過佢會主動提出話題,我有啲愕然。

「係呀,我係新嚟嘅住客。」

「喔!咁唔怪得啦!我叫Tracy 呀,住你樓下個層。」到咗五樓,𨋢門一開佢就拉住行李箱走出𨋢。

趁𨋢門未關上,我都立即自我介紹:「我叫Gary呀。」我講完自己個名之後,望住佢甜美笑容我成個人呆咗𨋢門就關上左,我有啲後悔自己做咩發呆,唔㩒實𨋢門問佢拎電話。

到左六樓,我就走出𨋢拎鎖匙開門,走入屋企。

一入到屋企我就立即坐落棕色嘅皮製梳化到,我瞇埋眼攤左係度。

柔軟嘅梳化十分美好。



寧靜嘅環境都十分美好。

一嚟到新環境就識到個靚女空姐真係非常之美好!

我諗我開始轉運行桃花運啦!

諗起啱啱個Tracy 真係幾靚女,笑容好sweet個樣有啲似林明禎。下次搵機會八下佢住咩室,問佢拎電話,睇下有無機會認識認識下。

黎到新屋第一件事緊係嚟個新屋第一炮。正當我係到諗緊睇三上悠亞定上原亞衣嗰陣,我個好朋友忽然打電話嚟,我心諗又會咁啱打電話嚟,唔知係咪想約埋今晚一齊睇波。

唔聽佢電話還好,一聽佢電話就聽到佢好慌張嘅聲音:「黃家杰,你宜家係邊呀!」

「我咪到左新屋囉。元家強你做咩好似好驚咁嘅?」



「唔好講咁多啦,救命呀!你快啲上嚟九樓先啦!救命呀兄弟!」家強講完呢句說話之後就CUT咗我線。

「都唔知佢發咩神經!」家強叫到好似就死咁,好似佢屋企發生咗命案咁。既然佢叫到身為兄弟嘅我就只好上去佢屋企睇下搞咩鬼。我將電話放係褲袋,拎起放係枱上面嘅鎖匙就出門口搭𨋢上九樓。

點知一去就踏上咗條不歸路。

一到九樓我就㩒佢門鐘:「搞咩咁急叫我嚟呀⋯⋯」

我未講完門已經打開咗,我未反應得切眼前一個黑影,一個著住黑色LACE性感內衣嘅女人跌係我懷抱裡面。正確嚟講係家強將一個膠Mary推係我身上,我抱住個膠Mary呆咗咁望住佢,只見家強佢拉住褲頭好慌張咁叫:「快啲帶住個公仔走呀!我老母唔知發咩神經話上嚟幫我執屋,比佢發現就不得了啦!」

「我屌⋯⋯你唔係呀嘛!玩埋啲咁嘅野。你叫我點收埋拎落去呀!我唔要呀⋯⋯」識左家強咁耐,我無諗過佢竟然咁變態玩埋呢啲野,我情願佢出去玩女人。

我將個膠Mary推返佢到,家強又推返去我到。

「咪啦屌⋯⋯」



「嚟啦,趕唔切啦。」

我哋來來回回咁將膠Mary推嚟推去,忽然家強隔離屋傳出開門聲,咁啱Mary推係我身上,身體本能反應下我抱住Mary跑去後樓梯。

一關上咗防煙門,我背脊貼住道門流曬汗,個心怦怦咁跳。

仆街呀⋯⋯今次碌七啦!

我望住膠Mary個腦海好似停止咗思考咁,唔知自己接落嚟應該要點做。

「屌⋯⋯」今次真係屌佢老母啦。

搬個Mary去搭𨋢又唔可以,萬一比其他人見到咪以為我係個變態佬。最後我好白痴咁將Mary倒吊孭住佢落樓梯。



諗起家強一開門就拉住個褲頭,我嚴重懷疑佢係咪啱啱係屋企玩弄過個Mary,我專登將佢倒吊係因為我有一個兄弟就夠啦,唔洗再見到千千萬萬,億億聲嘅兄弟!

一諗到佢點輕撫個Mary,點玩弄個公仔。孭住佢嘅我好似比兄弟侵犯過咁,一諗到呢到我就忍唔住反胃乾嘔:「嘔⋯⋯」

個公仔又重到死孭到我喘曬氣,忽然「砰」一聲後樓梯迴響,內心有唔好預感。我一低頭就望到我部IPHONE跌咗落樓梯,個MON爆撚咗⋯⋯

我開始係到懷疑緊人生,點解我要上去朋友屋企,點解宜家我要孭住個膠Mary,點解宜家會咁折墮。

「我屌⋯⋯唔撚係呀。」我之後一定要問家強拎返錢去整個mon。

原本以為去到新屋,係一個美好嘅開始,點知係一場災難嘅開始。

終於行到落六樓,正當我想推門出去嗰陣,係防煙門嘅玻璃到見到有兩個女仔企係我屋企門外面。

「屌⋯⋯邊撚個呀!阻住曬。」當我望真啲點解個女仔咁熟面口嘅?

仆街啦⋯⋯

黃家柔!

點解佢會係到嫁!佢身邊點解企住一個女仔,仲要拎曬行李嫁!

忽然我回想起呀妹提過有個網友回流返嚟香港,想搵屋住。提過我可以租一間房比個網友住。

我明明講過唔得嫁!佢做咩仲帶個網友嚟,咁樣我點收埋個膠Mary呀。

忽然我聽到一陣好似從地獄傳嚟嘅腳步聲,嚇到我係咁標汗。

唔係咁黑仔呀嘛!係呢個時候有人行樓梯定有保安巡樓呀。

我黃家杰遇到呢三十年嚟人生最大嘅危機!
已有 0 人追稿