(嚴重FF愛情輕鬆同居故）《我與貓系女室友的二三事》: Ch.15

今日有勁多嘢做，多嘢做到媽媽聲，大半日都係到趕緊畫圖，攰到對眼望嘢都有啲矇矇地。OT咗一陣好唔容易咁趕上咗deadline，終於可以休息。

我摔咗摔眼，拎部手機出嚟，見到呀Man影咗好多芝麻糊嘅相比我。自從養咗貓之後，呀Man同我whatsapp多咗，好多時都幫芝麻糊嘅相比我，分享佢每日嘅生活。

「今日帶芝麻糊去睇醫生打最後一枝針。」

「佢好乖呀，完全唔會反抗。」

「Gary，芝麻糊佢指甲好長好尖，要幫佢剪指甲啦。但佢好抗拒剪指甲，一幫佢剪就跳走，捉佢唔住呀。」



我就估到芝麻糊唔會咁乖嫁啦，沖涼打針都唔反光，點都會有一樣嘢驚嘅，但估唔到會驚剪指甲。

「我晏啲返嚟幫手啦。」

我望一望時間，原來已經差唔多九點。

「食咗飯未呀？」

「食咗啦。」



無幾耐呀Man send咗張相嚟，張相係佢抱住芝麻糊食飯，而佢就食一碗白飯加罐豆豉鯪魚。芝麻糊就食罐罐。

見到張相我忍唔住笑咗出聲。

人食罐罐，貓又食。

越望佢地就越似。明明係我執芝麻糊返嚟，但係就一啲都唔似我，而且一啲都唔痴我。

可能因為芝麻糊都係男仔啦，異性相吸呀嘛。比我都會痴實個靚女。



我見啲嘢做得七七八八，就執野返屋企。

一返到屋企呀Man同平時一樣坐咗係梳化到，佢一聽到開門聲就即刻轉過嚟對住我微笑。

「你返嚟啦。」

聽到呀Man講呢句說話同埋笑容，唔知點解個心口怦怦跳，跳得好快，跳得好似痴咗線咁。

「係⋯⋯係呀。我沖完涼就幫芝麻糊剪指甲。」

我拎完睡衫走入廁所，我用花灑由頭淋自己，個腦裡面就不停係到諗起啱啱呀Man嘅笑容同說話。

我唔知做咩春嘢，成三十歲人宜家先走嚟學啲細路女玩少年情懷同怦然心跳。

我搖搖頭唔再諗咁多，沖完涼之後一出到廳，完全見唔到芝麻糊嘅身影。



呀Man知道我準備幫芝麻糊剪指甲說話：「佢匿埋左係電影機後面呀。」

我走埋去一望，果然匿埋左係到。死仔果然夠聰明，識得搵保護色。

我拎咗啲零食比呀Man叫佢引芝麻糊出嚟，芝麻糊受唔住零食嘅誘惑，走咗出嚟。佢反晒肚嗲呀Man比多啲零食佢，呀Man見芝麻糊放鬆晒說叫：「Gary，快啲幫手捉住佢啦。」

我一走埋去，芝麻糊察覺到有異狀，想跳返落地。呀Man即刻捉住佢，但佢係咁踢呀Man。

「Gary！快啲過嚟幫手捉住芝麻糊啦。」我無諗過兩個養貓新手幫隻貓剪指甲會係咁狼狽嘅事。

我立即衝前去想抱實芝麻糊，點知芝麻糊已經掙脫咗呀Man，跳咗落地下。

但我就殺唔切制，一野攬實咗呀Man。



我哋兩個人呆咗，靜咗落嚟。我攬住咗呀Mn，我feel到佢因為抖氣而胸前不停起伏，同埋佢胸前嘅柔軟。

而且呀Man佢係屋企只著住白色小背心同短運動褲，完全展露晒佢完美嘅身材。搞到我有啲扯起咗。

我驚佢feel到我有啲扯扯哋，就慢慢鬆開向後退咗一步。

我哋無對話，只係見到呀Man佢面紅紅，好似怕醜咁。

為咗緩和我哋之間奇怪嘅氣氛，我就搞笑咁講：「呀Man你做咩面紅呀？妳怕醜呀？」

聽到我咁講，呀Man挑咗挑眉，佢開口講：「咩⋯⋯咩怕醜呀！我先無怕醜呀。」

佢鼓起咗塊面，走去抱起咗芝麻糊就走入房。

見佢口窒窒咁講嘢，好似真係好怕醜咁，我無諗過呀Man會反駁我，我以為佢會唔出聲。



「又會咁傲嬌嘅。」