呀Man聽到係我呀媽就開咗門,呀媽一入嚟就係咁打量呀Man。

「您好。」呀Man對我呀媽打招呼。

「姨姨您好。」家強向我呀媽打招呼。因為家強同我由細認識到大,以前中學時代經常上嚟我屋企打機,所以我呀媽都認到家強。

「你哋好,做咩有個咁大嘅紙皮箱放係到呀?」呀媽見到我同家強搬個大紙箱就問。

我未開口講嘢,家強已經搶先答:「黃家杰佢買咗嘢,我幫佢手搬上嚟啫。」家強趁機推返個紙皮箱入雜物房。



屌呀!乘人之危!

呀媽見咁大箱嘢,就好奇想走去睇下。

「呀仔做咩咁嘥錢買咁大件嘢呀?」做咩有間雜物房嫁?使唔使呀媽幫你執屋呀。

呀媽講呢句嘢嚇到我同家強標晒屎咁滯,我同家強對望咗一眼,然後話:「唔使!唔好呀!唔好搞亂我屋企嘢呀!我有set風水陣嫁!你整亂咗壞咗個局會死嫁!」

我哋擋住係雜物房前,呀媽見到我哋反應咁誇張,就停落嚟。



「係呢!點解呀媽你今日會無啦啦嚟嘅。」

「衰仔!你仲好講!搬出去住咁耐都唔返嚟食餐飯,平時OT都話啫,但星期六日又唔返嚟。」

俗語講得好「養兒一百歲,長憂九十九」,呀媽除咗掛住我之外,可能都驚我自己一個住食得唔好,成日都叫我唔好出街食外賣,食杯麵,話多味精。

講起都有啲慚愧,新屋同以前住嘅地方距離有啲遠,平時返工已經好攰,一放假都想係屋企休息,唔想出遠門。

「搬到流晒汗,快啲去沖個涼換套衫,我哋一齊去食餐飯,你哋都一齊嚟啦。」呀媽對住家強同呀Man講,見呀媽咁遠嚟到,我當然乖乖哋聽佢話。



但我無諗過沖完涼出到嚟,就見到呀媽拉住呀Man坐係梳化到傾計。

我就知道呀媽見到有個女仔係我屋企,就一定會亂諗嘢。家強見到我出嚟就向我投向睇好戲嘅眼神。

呀媽見我出咗嚟,我哋就出門。係沿路中呀媽都翹住呀Man係咁同佢講嘢,完全都無理過我。

我用手肘撞咗撞家強問:「宜家係咩情況呀?」

「你呀媽知道咗呀Man住係你屋企,佢當正咗呀Man係你女朋友咁。啱啱係咁同呀Man講你細嗰啲嘢。」

屌!唔係呀嘛!望住呀Man同呀媽嘅背影,我有啲尷尬。唔知之後應該點同呀Man解釋返。

「呀Man佢有無同我呀媽講啲咩呀?」

「佢無解釋得好詳盡,只係話佢係你朋友,借住你屋企咁囉。不過睇你呀媽個樣,點解釋都無用。」



家強忽然搭我膊頭笑住問:「屌!Man真係好鬼正。Tracy同呀Man你揀邊個呀?」

「痴線咩!你亂講咩呀。」好驚家強講得大聲得滯會比呀Man聽到。

我哋跟住呀媽去到一間酒樓,一入到除咗呀爸呀妹之外,仲有埋姑姐姑丈。

仆街!呢個場景咁似見家長咁嘅。

姑姐見到呀Man就問:「係咪杰仔女朋友呀?睇過又幾靚女,屁股又翹一定好生養!」

聽到姑姐咁評論呀Man,我即刻開口阻止佢再講落去,我驚呀Man會告佢性騷擾呀。果然啲人講得無錯,啲三姑六婆真係好鍾意評論人。

「唔係呀!佢係我朋友,暫時租住我屋企咋。」