(嚴重FF愛情輕鬆同居故）《我與貓系女室友的二三事》: Ch.19

星期六一朝早呀Man無等我起身整早餐比佢，佢就已經出咗門口去PMQ準備佢喺香港第一個畫展。

我對畫展呢樣嘢無咩概念，我由細都大都無主動去過畫展，大多數都係學校活動先會去下。我份人真係無咩藝術細胞，不過既然呀Man邀請到，我當然要出席啦。

我有諗過要買咩去比呀Man，最後我都係好老套咁買花比呀Man，但又唔想好誇張，所以買咁一束靚靚哋嘅保鮮乾花去。

當我去花店買完花出嚟竟然又咁啱見到Tracy。

「Hello Gary。」



「Hello Tracy。又會咁啱見到妳嘅，今日放假呀？」

大家都係住客，係附近撞到並唔出奇嘅。不過經常撞到就唔係巧合，係緣份！

我覺得同Tracy都幾有緣。

不過望到Tracy我就諗返起家強講嘅傳言。雖然飲咖啡事件令我好深刻，但係點望都唔會覺得佢似啲咁嘅人。

可能啲女人講得啱，男人唔會睇得出個女係咩人品，只會睇到對方嘅外貌同身材。不過我都係唔願意認為Tracy係個一類人。



咁靚女，又咁斯文⋯⋯

我最多只會確認佢係一個港女。

「係呀。我係附近行下啫。」佢望到我手上束花就笑咗笑。

「鳳梨酥，無啦啦做咩買花嘅？送比女仔呀？」

「er⋯⋯我送比我朋友呀。」



「上次個嗰女仔？」

Tracy一估就估中咗，我有啲尷尬話：「係呀⋯⋯佢今日開畫展，佢邀請我去，兩手空空唔係咁好，所以咪去買束花比佢囉。」

Tracy點點頭話：「原來係咁⋯⋯估唔到你朋友係畫家嚟喎。」

「係呀，佢畫畫好靚嫁。」雖然我唔係好識藝術，但一睇到呀Man畫嘅畫，就知道佢畫畫好叻好靚。

「我都好想去睇下呀。不如我哋一齊去呀？」

聽到Tracy提出去畫展，我呆咗。我無諗過佢會想去，但係佢並無獲邀請⋯⋯

「但今日係有邀請卡先可以去喎，聽日先開放比公眾。」

佢望到我手上面張邀請卡就笑住講：「你咪有邀請卡囉。我跟埋你去咪得囉。」



「⋯⋯」好似唔係幾好咁。

Tracy佢見我有啲猶豫就話：「我都好想去睇下呀。我平時都有去開畫展呀，藝術館呀。我對於藝術好有興趣嫁。既然我哋今日都放假，不如就一齊去行下啦。」

我見Tracy佢好似好想去咁，我又唔好意思拒絕⋯⋯

「咁⋯⋯好啦。我諗呀Man都唔係好介意嘅⋯⋯」

聽佢講佢今日都邀請咗好多行內業界人士同埋傳媒媒體，我諗多Tracy一個應該都無咩嘢掛。

「好呀！咁我係咪都要買啲嘢比你朋友？」

佢同呀Man只係一面之緣，我諗呀Man收佢送嘅嘢好似唔係咁好。



「唔使啦。我買咗就得啦。」