我同Tracy一齊搭車去中環,沿路Tracy好少講嘢,只係一直注視住我,同以往唔同。應該係話自從上次食飯後,好似有啲唔同咗。

可能係我FF啦,我硬係覺得Tracy嚟緊會對我做啲咩咁,又或者佢會對我做主動。

如果講比其他人聽,佢哋一定覺得我痴咗線。

一定會屌我清醒啲,唔好諗得太多。一個好似林明禎咁靚女,身材咁好嘅女仔會對你有興趣?會想向你投懷送抱?

唔好諗太多啦!



但我總係有種咁嘅感覺。

人哋話呢類女仔好鍾意捕獵,睇中咗個獵物如果唔係輕易得到,就會提升佢哋嘅興趣同覺得有挑戰性,會不斷嘗試,引起佢嘅好勝心。

唔通我都要扮下矜持,拒絕佢?我驚我無咁大嘅定力同佢角力落去。

「Gary,今晚一齊食飯?」

嘩!FF都無咁快,佢話咁快就已經開口問我今晚食唔食飯,唔通佢想延續上一次嘅事件,想同我飲返一杯咖啡,大戰幾百回合!



但係我今晚約咁呀Man食飯⋯⋯


真係天人交戰呀!好大嘅引誘呀!

「我今晚約咗人食飯呀。」

「係唔係約咗個女仔朋友一齊食飯呢?」

比Tracy估中晒,佢笑咗笑之後講:「不如大家一齊食飯?」



嘩!咩Tracy咁主動呀!聽到一齊食飯,諗返起上次食個間法國餐廳,我都流晒汗。

「但好似唔係咁好喎。」明明約咗呀Man,無啦啦多個Tracy一齊食飯,唔知呀Man鍾唔鍾意,因為我覺得佢都係一個慢熱嘅女仔,唔係咁鍾意同陌生人一齊,就好似一開始住係我屋企個陣咁,一開始都經常留係房,好少行出客廳。直到偶爾機會下,大家覺多咗嘢講。

「嗯⋯⋯我再睇下點先啦。」

Tracy聽到我咁講,嘟起咗嘴表示不滿。

我同Tracy一齊行一條長斜路,終於到PMQ。我跟住邀請卡嘅地址,走到一間落地玻璃嘅展覽室,透過玻璃見到呀Man同緊一啲傳媒傾緊計同影相,睇嚟應該接受緊訪問。

今日呀Man著咗一條米色雪紡長裙,將原先長直黑髮電成大波浪曲髮,望落好斯文,好女神feel。

我哋一齊走去接待處展示邀請卡,然後就走入展覽室。展覽室好大,每一塊板都用相框保護住畫掛係到,而下面有個價錢牌標示住,聽工作人員講全部畫都可以賣,如果幅畫無show到價錢就係有人買咗。所有買家係展覽會後就可以拎返畫,亦可以送貨形式送上屋企。



我係到欣賞呀Man畫嘅畫,見到作大多數畫都以少女同貓做主題。唔知係咪因為養咗芝麻糊嘅關係。連畫畫靈感都以貓為主,睇下睇下我停低咗係一幅畫前面,畫以男人同貓做主題,畫中男人著住西裝,望落好熟口面。

好似畫緊⋯⋯畫緊我咁。

「你朋友係好出名畫家!我經常係網上見到佢啲畫嫁!」Tracy有啲興奮咁講。

「係呀。」我一邊回應Tracy,一邊望住呀Man,見佢接受媒體訪問個陣,個表情好有自信,呢個表情我從來都無見過,我好似又發現到佢另一面。

當媒體訪問完佢離開後,我就往呀Man個方向行埋去,呀Man原本望到我露出燦爛嘅笑容,但唔知點解佢嘅笑容慢慢冷卻咗落嚟。
已有 0 人追稿