又係一個ot嘅晚上,當我趕返屋企嗰陣,我竟然見到呀Man同一個大隻佬一齊。當我見到佢哋唔知點解我會停低咗腳步,唔敢再向前行一步。我⋯⋯竟然驚比佢哋發現。

我走埋一邊企係電線杆後面偷望佢哋。

屌!我做咩嘢要鬼鬼崇崇咁。我明明就光明正大!

雖然我係咁諗,但我都係好無膽唔敢行埋去。

我見個大隻佬同呀Man有講有笑,到咗樓下同對方道別後,呀Man就行咗入大廈裡面。大隻佬就轉身離開。



見呀Man走咗入大廈,呢個時候我先夠膽行出嚟,我直視住個大隻佬,打量佢究竟有咩吸引力可以令慢熱嘅呀Man同佢咁好傾。

見佢個身形又大隻,勁多肌肉,特別係個胸肌。而個大隻佬個樣同身材好唔襯,佢個樣一啲都唔型,反而係個種眼大大,個樣生得幾cute幾靚仔。

唔通⋯⋯

呀Man鍾意呢一類型嘅!

個大隻佬好似察覺到我注視緊佢,佢都望住我,好似奇怪我點解會啤住佢咁。



我驚我望多幾眼會比佢打,我立即轉移視線。當我同佢擦身而過之後,我轉頭而望多佢一眼,點知佢咁啱都擰轉頭望我。

我嚇到立即跑入大廈裡面。

一返到屋企,呀Man拎住衫準備去沖涼。我唔知自己發咩神經,我竟然忍唔住問呀Man:「呀Man呀⋯⋯」

呀Man聽到我叫佢就停咗落嚟,其實自從畫展後,我同呀Man好像疏遠咗,我想同佢close返但係我竟然唔知道應該點做。

明明我無資格過問有關呀Man嘅嘢,但我個心真係好唔舒服,我忍唔住問:「啱啱⋯⋯我係樓下見到有個男人送妳返嚟。佢係妳男朋友呀?」



呀Man愣住望住我,好似無諗過我會咁問佢。

「佢只係我泰拳導師。」

泰拳?

「妳⋯⋯妳打泰拳?」

「係呀。我都學咗幾年啦。返咗嚟香港呢段時間,我忙住安頓好同準備畫展,早排先有時間去搵班上。」

「妳一星期上幾多堂呀?」

「三堂⋯⋯你問嚟做咩呀?」

「無⋯⋯無呀。我問下啫。」



仆街!個大隻佬係泰拳教練,做得教練一定有拎過金腰帶啦!殺人放火金腰帶!想同我爭女!我要同你死過!

呀Man走咗去沖涼之後,我望到佢個袋有一張傳單,我一拎嚟睇原來係泰拳班嘅宣傳單張同優惠券。

我望到傳單上大隻佬叉住手擺pose影相上面寫住Nick,仆街條友叫Nickkhun!係咪叫親Nickkhun嘅人都係咁靚仔!

我對住張傳單上嘅Nickkhun用手指扮要插佢眼,叉佢腰。忽然我覺得好似有人注視住我。我立刻抬起頭,原來芝麻糊佢跳咗上梳化到望實我,好在呀Man仲沖緊涼。

芝麻糊好似用望住白痴嘅眼神望住我。

「望咩呀芝麻糊。」

「喵~」芝麻糊喵咗一聲跳落梳化,屁股扭下扭下咁走入呀Man間房。
已有 0 人追稿