(嚴重FF愛情輕鬆同居故）《我與貓系女室友的二三事》: Ch.25

「係咪呢到呢？」 

透過玻璃窗見到裡面有好多⋯⋯係好撚多大隻佬係到打緊拳，更傳出打拳出力嗰陣嘅叫聲同埋沙包被打嘅啪啪聲。 

屌⋯⋯ AV裡面嘅啪啪聲就經常聽啫，打沙包嘅啪啪聲就第一次聽。聽到沙包發出嘅哀叫聲，我忽然覺得個沙包好似我咁。

單挑Nickkhun比佢打到啪啪聲⋯⋯ 

啪啪啪啪啪啪⋯⋯ 



真係諗起都驚。 

見到門口塊牌我諗我應該無去錯啦。

門口有勁大塊Nickkhun嘅企牌，條友咁鬼自戀。 

呢排星期六下午，阿Man都係呢個時間出咗去，所以我預計到呢個時間佢會去打拳。

因為事前已經知道咗佢係邊間拳館，所以我係網上提前報名，比咗錢先。



 好在係比咗錢可以一個月自由揀邊日上堂。如果今日估錯阿Man唔係到嘅話，我下次都可以再揀其他日子。

 可能裡面個職員見到我係門口望咗好耐，佢就打開門走出嚟問我：「靚仔，係咪上堂呀？」 

我一望原來係Nickkhun！ 望住佢一邊講嘢，個胸肌係咁左右震動，睇到我都有啲驚。 

「係⋯⋯係呀。」 我走咗入去拳館登記，換完衫之後我就四圍望，睇下阿Man係唔係到。忽然我見到一個熟悉嘅身影，係阿Man呀！ 阿Man著住一件黑色半截緊身背心，下面著住一條紅色短褲仔，佢戴上咗拳套準備打下沙包熱下身。 

我可以欣賞到阿Man打拳嘅英姿，真係諗起都開心。 



但當阿Man開始打沙包個陣，我面色一變。 

「砰砰砰砰砰」

 「喝！喝！喝！」 阿Man用力咁打向沙包到，而且佢又用腳踢向沙包，個沙包受重擊不停抖動。唔知點解我覺得佢好似踢緊我咁⋯⋯我覺得有啲赤赤痛咁。

 唔怪得阿Man唔驚同我同屋住啦。如果我向佢伸出魔爪，佢一定打撚到我仆街。 

「靚仔，呢邊呀。」Nick向我招手。

 阿Man一擰轉頭見到我就呆咗：「Gary⋯⋯」 佢應該打死都唔會信我會出現係到。 

「Hello Man。」我有啲尷尬咁向佢打招呼。

 「你哋原來識㗎？」Nick有啲驚喜咁問。 



「係呀⋯⋯我租住緊Gary屋企。」 係呀！係呀！阿Man租住係我到，我哋同居緊㗎！近水樓臺先得月！咪撚同我搶阿Man。

 Nick直視住我好似係到諗緊嘢咁，佢應該知道我係為咗阿Man而嚟。望咩望！打柒你呀！ 雖然我係咁諗，但應該係佢打柒我多啲。

 「原來係咁⋯⋯」 無幾耐就開始熱身，今日呢堂加埋我同阿Man有八個學生，只有我係新人。 

除咗我之外，Nick開始教其他學生，而我就係咁做sit up ，掌上壓等等好多好劇烈嘅運動。

可能平時無做開運動，做無幾下已經索晒氣。

 我懷疑佢玩鳩me。 「你要做多啲帶氧運動，操fit返先可以正式開始學，你要打好基本工先。」 Nick佢講完呢句之後就放低我係一邊，佢叫我做三百幾下sit up同三百幾下掌上壓，之後先簡單教下我基本動作。 「三十⋯⋯三十一⋯⋯」我視線一直們留係阿Man身上。 

阿Man戴上咗拳套，個Nick教阿Man嗰陣竟然襯機會掂佢！有好多身體嘅接觸！ 雖然話係教佢擺動作啫，但唔使掂佢呀！ 呢一刻我覺得自己有啲挫敗，見到咁嘅情況只可以敢怒不敢言，因為我同阿Man最多只可以話係朋友，並唔係情侶嘅關係。