[校園][純愛]《幸運星下的預言》: 第十六章

還記得，

當年學生會上任之後搞嘅第一個活動係sing con

點解咁記得唔係因為我有玩

而係喺賽前我被命令要返去一齊諗下比賽嘅細節

佢地話要趕住開始喎



嗰次有六個人返去，

主席啦副主席啦

宣傳嗰兩個人，

亦即係映彤同埋Felix

淨低嗰兩個就係我同埋筱瑜



我都唔知點解文書都要返去

嗰陣重有好多濕鳩位

乜q野財政呀總務呀咁樣

嗰啲又唔使返去喎

文書都係濕鳩位啫



你地想搞sing con關文書叉事咩

都算喇，

我當真係關事，

咁你淨係要筱瑜一個咪得囉

之前我都有講過啦，

其實佢做嘅野多過我好多

表面上我係佢副手，

不過實際上佢從來冇叫過我幫



每次都係自己搞掂

所以我真係唔明點解要叫我返去

我都一早講明我唔識諗呢啲，

點解佢話多個人多把口點都好啲喎

屌你咁其他唔係人咩

得我一個係人咩

當然，



我都係好冇骨氣咁樣返咗去

嗰日係禮拜六嚟，

原本佢地話想上晝傾，

跟住我梗係話打死都話唔得啦

上晝咁我點樣瞓覺

中學生禮拜六都唔可以瞓晏啲，

係一個恥辱

所以梗係屌晒老母咁樣



好彩佢地都衰唔晒

決定四五點先返去傾

咁就冇問題喇，

重可以打多幾鋪機先出去

我肯定唔係得我一個受益，

因為我知坐我隔離嘅筱瑜都好滿意

筱瑜:「做到野喎今次」



之前我都有講過啦，

筱瑜喺人少嘅情況下

其實都會同其他人傾下計

加上嗰次我咁英勇幫佢整死隻曱甴

佢後尾幫我執返好個班房跟住一齊走

咁樣就開始friend咗，

未去到乜都傾個階段，

不過關係點都好過幾個月之前

我:「梗係啦佢都傻嘅

禮拜六都唔可以瞓晏啲重叫我八九點返嚟

睬佢都戇鳩」

筱瑜:「今次你有道理」

我:「唔係今次

係每一次都係」

筱瑜:「係咩我又唔係好覺喎」

我:「你識乜野丫

映彤同埋主席肯定係食懵咗

佢地早醒啫唔代表我都係丫嘛」

筱瑜:「特別依家涼涼地

真係可以瞓耐啲

瞓到自然醒真係好正」

我:「咪就係，

佢兩個都唔知用咩諗野」

筱瑜:「佢兩個點諗我就唔知

我淨係知你後面有邊個喺度」

因為嗰陣我掛住耷低頭抄野，

我唔記得抄咩喇

總之冇望到有邊個行過嚟

映彤:「邊個食懵咗呀」

我:「點解你會喺度

你唔係去咗樓下買野飲咩」

映彤:「醒起唔記得帶銀包咪行返過嚟囉

跟住就聽到你喺度鬧我」

我:「咁真係丫嘛大姐

邊有可能七八點起身呀係咪傻架

平時重唔夠早咩」

映彤:「咪應承咗你囉重想點喎

食懵咗，

你就係」

我:「唔係呀你老友都有鬧你呀」

點知筱瑜竟然話

筱瑜:「唔好屈得就屈

你又係唔啱嘅，

映彤佢地都已經就你

你重咁樣講人」

我:「你條友真係漢奸」

映彤:「衰得過你」

我:「唔好講呢樣喇，

係喎可唔可以幫我落去買朱古力奶」

映彤:「你自己落去買啦

我食懵咗呀唔識買」

我:「仆你個街咁小器」

映彤:「筱瑜你飮咩呀」

筱瑜:「朱古力奶丫唔該」

映彤:「好呀」

我:「咁我呢」

映彤:「冇手拎咁多包喎」

我:「死啦你去」

幾分鐘之後佢上返嚟俾返包朱古力奶筱瑜

頂佢個肺真係唔買俾我

正當我諗住行落去買嗰陣，

筱瑜佢就遞咗俾我

筱瑜:「嗱」

我:「做咩呀你唔飲咩」

筱瑜:「我重有支茶呀

邊飲到咁多」

我:「多謝喎咁又

咁就正唔使落去買

咪住先有冇又收埋支飲筒」

筱瑜:「你擰轉嚟睇咪知囉

跟住我就擰轉嚟睇啦，

果然又係冇

我:「又收埋咗」

筱瑜:「嗱

究竟你有邊日係冇飲朱古力奶」

我:「究竟你有邊日係冇收埋支飲筒」

筱瑜:「日日都飲真係服咗你」

我:「話咗你成日留意我」

筱瑜:「俾你發現咗添

我會好尷尬喎」

我:「屌唔似呀

你都冇面紅」

筱瑜:「唔識扮哈哈」

跟住我就冇理佢繼續飲，

原來連接嘅橋樑就係一包永遠都係冇飲筒嘅朱古力奶。