[校園][純愛]《幸運星下的預言》: 第十七章

事實上嗰個所謂嘅會議傾啲咩真係唔記得

叫我俾意見，

唔識

問我點睇，

唔知



咁樣好唔好，

好

基本上我淨係講呢三句

其他冇所謂啦關我叉事咩

我又冇份玩



細節野又係筱瑜寫

基本上我嘅角色同我嚟之前所估計嘅一樣

就係閒人一個

去到走我都諗唔明，

點解要叫我返去



記得嗰晚傾到六點幾先走人

我地六條友，

原本我以為全部一齊食飯

點知主席條撚樣私心起想溝女(副主席)

就靜靜雞同我地講

不如分開食啦咁樣

最後係點分配呢

唔使講都知，



映彤梗係同Felix

人地係名正言順男女朋友

主席亦都一早擺明車馬咁樣溝女，

結果就得返我同筱瑜兩個

我:「食唔食飯呀」

筱瑜:「um

好呀」



我:「去邊呀」

筱瑜:「唔知喎我冇所謂」

我:「你諗啦」

筱瑜:「咁呀，

包剪揼輸咗話事」

我:「你真係未死過

咁多年我都未輸過呀包剪揼」

筱瑜:「係咩



睇過」

唔夠三秒之後

筱瑜:「你梗係咁多年都未輸過啦

都冇猜過

Ok架喇都」

我:「頂

點解會輸」



筱瑜:「咁就要問你喇

食咩呀

唔好扮野」

我:「鰻魚飯啦屌

唔准話唔鍾意

又係你叫我諗」

筱瑜:「都冇話過唔鍾意

係咪嗰間呀」

我:「嘩你又知嘅」

筱瑜:「咁唔係得你一個住喺度嘅

重有好多人都喺度住嘅

嗰間啲蛋包飯好食呀」

我:「幾驚你唔鍾意

你咁講就得喇」

筱瑜:「如果我話唔鍾意咁點呀」

我:「冇計架

咁梗係就你啦」

筱瑜:「肯定唔止囉

第一句會講粗口鬧我先囉」

我:「痴線點會咁衰」

筱瑜:「唔知呢

可」

佢講呢句嗰陣係無啦啦擰轉面對住我講

嗰陣個天黑晒，

按理光線唔夠梗係睇得冇咁清楚

不過我到今日都重記得佢嗰陣個樣係點

應該係我第一次見佢個樣咁鬼馬同埋笑得咁甜

第一次就係第一次，

個口點樣話唔記得唔在意

一去到夜晚瞇埋眼嗰陣就會自自然然見到佢個輪廓，

話就話自欺欺人，

其實連自己都呃唔到。

好快我地就去到嗰間餐廳

去到就梗係嗌鰻魚飯啦

筱瑜雖然頭先係咁講蛋包飯好好食

不過入到去就叫咗個海鮮炒飯

我:「搵啲野講下丫

兩條友坐喺度你眼望我眼好撚尷尬呀大佬」

筱瑜:「你想講咩呀

你講乜我跟住同你講」

我:「叫我諗話題即係死得」

筱瑜:「你得嘅

係喎表弟呢排點呀」

我:「你好似知道我實知你表弟係邊個咁」

筱瑜:「識咗表弟幾耐丫

不嬲佢都係大喇叭周圍講哈哈

你同佢咁friend你依家又拍住我

我唔知係你問佢定係佢主動同你講啦，

不過無論邊樣你都唔會唔知囉」

我:「小姐你真係好撚醒」

筱瑜:「佢呢排點呀」

我:「你唔自己問佢」

筱瑜:「咁你知啦，

無啦啦行過去學你話齋好尷尬架嘛

佢都可能覺得奇怪，

平時唔講野點解無啦啦行過去問佢呢排點」

我:「唔會掛我諗

唔係呃你同性我真係驚

異性就正常得多啦」

筱瑜:「同性你驚咩呀」

我:「最撚驚就係gay佬」

筱瑜:「其實我接受能力好高

唔使咁刻意話唔鍾意

我會包容你喎」

我:「收皮」

筱瑜:「佢有冇同你講佢嗰邊讀成點」

我:「佢話正正常常冇乜特別

去到都係讀書啫特別係呢個階段

重細咩掛住埋堆一齊玩，

係喎點解你兩個會一齊讀嘅」

筱瑜:「好複雜喎可以慢慢講嘅」

我:「有野傾咪幾好

冇野傾真係戇鳩鳩咁樣坐喺度望住大家」

筱瑜:「我可以望住你唔講野架喎」

我:「唔好搞喇我知你真係可以」

筱瑜又喺度微笑，

即係輕微揚起嘴角嗰種

我:「同埋重有」

筱瑜:「重有咩呀」

我:「你一路望住我我自然望返住你架啦

咁樣我啲飯會變咗粥架喎

又或者我要食返自己啲口水」

筱瑜:「低b」

唔使講到咁白大家都明

呢一點真係好正

不論同性又或者異性都好，

真係要好好珍惜身邊有一個咁嘅人。