[校園][純愛]《幸運星下的預言》: 第六十七章

唔知點解，

人越大，

會同「鍾意」呢兩個字距離越遠

以前好簡單，

鍾意就做唔鍾意就唔做



俾人鬧幾句當食菜，

鍾意嘅就乜都唔去諗

只係掛住呢一刻想要啲乜

總之隨心而行

隨著年紀漸增，



呢份勇氣顯得越嚟越卑微

做緊嘅唔一定係自己想做

唔鍾意做嘅未必唔會做

甚至乎所謂鍾意緊嘅，

對比以往都唔係真係咁鍾意



可能係我自己嘅毛病啦

凡事都慣性去比較，

人同事都係用呢種態度

即使條件唔係完全恰當都好，

都會夾硬去比

當然啦純粹係我自己心底裏面比啫，

就唔會將結果公開講出嚟

得罪邊個都唔係好啦，



講出嚟對件事冇幫助倒不如選擇隱藏

隱藏得多自然駕輕就熟，

唔會再好似以前咁生硬

一望就望到你有所隱瞞，

我喺度講咁多廢話，

其實都係想回憶返當年嗰個自己啫

隨心所欲原來係好奢侈



依家嘅我真係冇本事

唔同以前嘅自己，

嗰陣會覺得感情呢回事要好認真

唔可以亂咁鍾意人

一旦鍾意當然想得到啦

因為咁樣可以理所當然對佢好

理所當然係好重要架

唔係鍾意人就唔好玩人，



只會浪費大家時間

就當我自己冇浪費

搞著人都唔係好啦

十年人事幾番新，

今日的我打倒昨日的我亦都係好正常嘅事

始終歷練多咗，

思想有變化絕對唔出奇



你可以話合理化自己嘅，

我都唔會否認

其實唔一定鍾意先一齊，

鍾意亦都唔一定要一齊，

以前嘅自己實在係諗得太簡單

果然係對愛情一竅不通。


冇記錯，

喺筱瑜幫我整走粒釘嗰晚

瞇埋眼嘅時候，

全部都係關於佢

特別係今日我望住佢幫我整走嗰一刻

好似影相咁樣記低咗落嚟

話說我都真係好耐冇試過咁樣

自從擺脫咗映彤之後

冇鍾意人呢真係唔會咁得閒諗咁多野

好似部電腦咁咋嘛，

自己容量都唔係多，

何必要理―啲事不關己嘅野

近幾年都真係咁樣諗

唯獨今晚終於去返幾年前嗰種思緒

好想見到佢，

好想聽到佢把聲，

總之一切同佢有關嘅野，

好想會接觸

嗰啲野可能冇乜特別，

平時都已經有做開

不過心態唔同睇嘅野自然唔同啦

之前從來都唔覺得有咩特別，

經過今日之後，

就會變得珍而重之

所以你話人幾麻煩

未去到瞓唔著嘅，

不過真係有諗佢囉

發咩夢就唔記得喇，

不過應該都冇

因為我冇咁犀利可以控制夢境

哈哈有就好啦

第二朝同以往一樣，

朝早都係喺佢嗰度等

然之後佢就會自動送上一塊腿蛋治

以前從來唔會覺得有幾溫馨，

今日就好似發春咁樣，

一路食一路手震

唔可以明爽喎

佢咁醒目一定會估到

同埋暫時唔知佢點諗，

所以都係決定保守啲先

中學雞愛情，

有時真係好似一場角力戰

諗好多野從而去加強自己本錢

敵不動我不動，

幻想晒有可能發生嘅情況

然之後再根據狀況去調整

呢個位點做嗰個位講乜，

真係得以前先咁好心機

諗埋咁多無謂野，

依家?

唔好玩啦