[校園][純愛]《幸運星下的預言》: 第六十六章

感覺嘅野，

有時可以嚟得好快

呢―點大家都明白啦

唔需要有咩特別原因

唔係話咁樣咁樣就一定點樣點樣，



情愫一環邊容許「一定」嘅存在

唔好玩啦

亦都唔使好似電視劇咁樣，

一見鍾情然之後男女一齊培植呢一顆愛情嘅種子

邊有咁夢幻



拍戲咩有晒劇本

嗰下感覺純粹係一剎那

突如其來嘅衝擊，

往往就係每段感情嘅開端

唔好淨係講愛情，



其實友情都係啦

或者十幾年之後無啦啦會諗返起，

點解當初會鍾意呢

係咪佢一路喺隔離照顧住我

唔似丫

係嘅話就唔會等到咁遲啦

直至到你記返起咩原因，

就會發覺唔係呀話



點會咁兒戲呀，

哈哈可能真係呀

感情有冇得用科學去解釋，

我唔會評論得定係唔得

因為我真係唔了解咁就唔班門弄斧，

我只可以話，

對比起實在嘅科學，



我寧願相信係抽象嘅感情去主導

可能我水皮啦

唔識得亦都唔夠資訊去表達點解會鍾意邊個邊個

可能真係好簡單，

純粹係因為某個原因驅使鍾意一個人

當年嘅映彤就係咁

不過對於我嚟講，

鍾意映彤嗰陣好啲



起碼拎得起放得低，

雖然中間持續幾年

不過下定決心睇開之後，

真係可以做到完全冇任何牽掛

依家重可以同佢做朋友就知啦

映彤之後嗰個

我就差得多喇



拖泥帶水，

自己成日都講唔好回望

講一套果然真係做一套

你估我唔想咩，

唔得都冇辦法

呃到其他人又有咩用

我成日都講一個人獨處嘅時候，

就會知道究竟可唔可以呃到自己

呢啲先係鏗鏘有力嘅證據

慢慢打入心坎

無啦啦講咁多廢話，

梗係發生咗啲野啦。


話說嗰個camp之後冇乜特別

燒完野食玩多日就走

既然係咁就唔拖劇情啦

費事咁多位悶

復活節假返到學校

隨著中七師兄師姐因為要考公開試

當我意識到自己喺學校係最大年級嘅時候

意味著一年之後今日就到我考公開試

之前我都有講幾重視咁就唔再嘥口水

自己覺得唔止我一個係咁樣諗，

好多同學個態度亦都積極咗唔少

我唔理人啦關我叉事咩啱唔啱先

整體嘅生活模式都冇乜點變

一去到lunch小息甚至放學，

都係會落去學生會室抄功課或者溫書

筱瑜仍然係常客

基本上同之前完全冇分別

之不過，

有一日發生咗一單旁人睇落去好平凡嘅事

或者我都覺得真係好普通，

但係，

帶俾我嘅影響一直纏繞到呢一刻

喺嗰日，

我好記得要幫手將報紙釘落去學生會室壁報

筱瑜當然有份啦

跟住唔知發生咩事

唔係講笑連我都唔記得

我淨係知道隻手有一粒釘，

整咗入去掌心嗰度

佢唔係黐實而係入咗去

應該係我論盡

釘嗰陣將隻手擺咗落去

應該咋因為詳細真係冇乜印象

跟住就梗係覺得痛啦

筱瑜:「做咩呀」

我:「隻手有粒釘好撚痛」

筱瑜:「拎隻手嚟啦」

跟住我同佢即刻坐低，

佢坐我對面幫我拎返嗰粒釘出嚟

我唔敢望隻手因為驚痛，

所以我只係望住眼前嘅筱瑜

對上一次拖佢隻手係凍到喊嗰陣

亦即係冇任何感覺

今次唔係呀

唔知點解望住眼前嘅佢，

有返當初怦然心動嘅感覺

原來我重有呢種感覺

只係以為自己唔記得啫

喺往後，

我永遠都覺得只有對住最鍾意嘅人，

先可以確實感受到何謂心如鹿撞


冇其他野比呢件事更加有效

腦袋原來真係會一片空白，

跟住耳仔同埋背脊就會覺得好熱

甚至會有啲痕

不過又要扮冇野喎

你地可以話我蠢

嗰陣佢幫我做咁多野我都冇feel

不過今次你唔可以咁樣講

無論佢細唔細心幫我整走粒釘，

可能我都會有呢種感覺

當下衝擊實在係太大

筱瑜:「冇野喇」

我:「唔該晒」

筱瑜:「又會釘咗入去都有

心不在焉

講究竟諗緊乜」

我:「冇野呀

整野啦屌」

唔通我同你講諗緊你咩

平時對住佢講乜都得，

幾嘔心都唔會覺得肉酸

不過唔知點解到我真係諗佢嘅時候，

竟然選擇隱藏

真係好諷刺

依家打出嚟再諗返起，

反而會怪責當日咁論盡嘅自己

唔係咁論盡，

好多野應該會唔同

以前覺得鍾意人係好事，

起碼自己有個目標先，

我從來都相信，

人係感情嘅動物

至少我會係先，

就係因為咁，

今日先怪責當日嗰個我。