[校園][純愛]《幸運星下的預言》: 第七十九章

各位打工仔都明白

每日上晝最期待就係放飯嘅時候

扮咗幾耐工終於等到忙裏偷閒嘅時刻

我地就放十二點半嘅

兩點要返到去



中間有個半鐘食，

可能我冇乜大志啦

有個半鐘食對我嚟講已經唔錯

當然冇得同連登仔成個下晝都係攞嚟食飯比啦

我呢啲咁嘅騎呢怪拍馬都追唔上



一去到十二點成個人自然有返動力

係咁望住個鐘倒數

三個字十分鐘五分鐘咁樣

最慘又唔可以表露出嚟

寧俾人知莫俾人見



最後嗰五分鐘係最難捱嘅時候

過咗之後可以鬆晒

咁就大錯特錯

因為重有補時

搭正嗰一刻我唔會即刻起身

更加唔可以展露笑容好似攞獎咁樣

雖然應該就唔會被閒言閒語

不過有得避免盡量避免啦



反正都唔爭在一兩分鐘

直至到同我食飯嗰條友起身行過嚟

等佢同我講:「Jaydan呀

起身食飯咯

返嚟先做啦」

講完呢句我先至真正企起身

有時如果隔離有人我會扮埋最後一幕



我:「爭少少做埋先啦

一係你行先囉」

我好肯定同我食飯嗰條友一定會叫我唔好做住

跟住我就會扮到俾佢說服

「好啦好啦唯有返嚟先做啦」

個「唯有」係好緊要呀

有講同埋冇講係兩個意思，

當然啦假設有人喺隔離先咁講啦



側邊冇人嘅話就唔會有以上嘅對白

有時見到呀澤行過都係當睇唔到就算

所以你話大人嘅世界幾複雜

喺職場上面，

其實真係唔想咁有心計去做咁多野

就連每日咁簡單嘅食飯，

都要部署咁多



講乜做乜都要諗過度過，

唔知你地有冇同感啦

可能係我先至咁折墮啫。



出到公司門口就梗係去餐廳啦

我地就冇固定飯堂

基本上都係睇佢鍾意食乜

我就冇乜意見，

當然就唔會食三文治啦

對於晏晝嚟講都唔飽肚嘅

要食，

都係朝早食啦

邊度有位咪去邊度囉

夏天會多一個選擇，

就係一定要去有冷氣嘅地方

冇嘅話真係你同我食

入到去正常咁坐低，

跟住叫野食

冇乜特別啦

呢個時候大家等緊啲飯嚟，

少不免會拎部電話出嚟睇

同朋友我就唔會

不過依家係同事

可能佢平時都唔係咁啦

咁就唔知喇

我肯定佢係連登仔嚟

因為有一次靜靜雞見到佢去感情台嗰啲叫春post睇

當然佢唔知我偷睇佢啦

實在係太過唔小心

不過就未搵到佢ac

事實上佢都經常同我講佢啲感情野

詳細真係唔記得

因為我真係冇擺喺個心度

淨係聽佢話拍過幾次拖

其中有個到依家都重係好鍾意

不過已經名花有主而佢重未move on

其他就真係講唔到咁多

關我撚事咩講真

唔係同事真係屌柒佢

跟住啲飯就嚟到，

大家都冇再得睇電話

咁就梗係傾計啦

唔通兩個男人戇鳩鳩喺度對望咩

突然間，

問咗一條連我都有啲意外嘅問題

有一刻空白咗

平時佢問我咩問題都唔會突然hang機

唯獨係今次有啲愕然，

同事:「係喎

你初戀係點架」

你話係咪痴線突然間問啲咁嘅問題

完全冇上文下理無啦啦開首

我:「下

做咩咁問呀」

同事:「冇呀頭先睇到一個post關於呢個問題

咁咪想問下你囉」

我:「邊有你咁靚仔丫

你都好啲有得失，

我直情連戀都冇得失添」

同事:「真定假呀」

我:「呃你托柒咩

咁多年都冇乜邊個特別鍾意
自己知咩事啦

既然係咁唔好害人嚕」

同事:「我都覺得奇怪你好似冇女朋友

成日都咁得閒

我以為你因為好似啲連登仔咁因為放唔低一個人而唔敢開始添」

我:「痴線啦

咩年紀呀重講呢樣

唔搵多幾個錢真係粥水都冇得飲」

同事:「真係咁搏命」

我:「係呀

唔係你以為咩呀」

係都要講呢啲話題

依家就會明白，

人大咗自自然然經常喺度想當年

以前唔明點解咁樣做，

有冇咁多野諗呀，

原來時間真係可以解釋好多野

至少喺我身上係絕對適用，

依家又一次喇。