[校園][純愛]《幸運星下的預言》: 第八十章
我永遠都記得中六學期尾某一日
嗰日亦都係我同司徒每星期嘅聚會
佢無啦啦講咗啲令我意想不到嘅事
司徒:「知唔知尋晚細表姐同我講咩」
我:「你地食飯咩」
司徒:「係呀
本來諗住即刻打俾你,
不過我見今日都出嚟
特登留返依家慢慢同你講」
我:「即係咩先得架
關於邊個先」
司徒:「屌頭先咪講咗細表姐囉」
我:「係係係係
筱瑜佢講咗啲乜」
司徒:「俾你估下
一定嚇到你暈低
唔係喎應該爽到暈先啱」
我:「屌你快啲講啦」
司徒:「仲諗住賣關子
屌點知你懶到估都唔估」
我:「吊癮真係好辛苦
拍硬檔幫幫手快啲講」
司徒:「話說尋日我地食飯呀
之後細表姐行咗過嚟同我傾計
內容關於你嘅」
我:「跟住呢」
司徒:「你之前係咪叫我幫手套口風嘅
咁你知我一定幫你做
我咁好人係咪先
結果收穫比預期更加多」
我:「竟然係咁
拿拿臨分享啦屌你」
司徒:「我乘乘機機問佢點睇你呢條契弟
佢同之前一樣
一路講雖然冇讚過一句,
不過嗰啲笑容甜到
盲都知咩事」
我:「你之前講過啦冇乜特別」
司徒:「所以話你唔知真係唔知
都未到重點」
我:「繼續繼續」
司徒:「我特登問佢一句
笑到咁即係好鍾意啦
你知唔知佢點答」
我:「梗係唔知啦戇鳩」
司徒:「佢話,
『唔知人地鍾唔鍾意喎』
咁你明啦」
我:「佢真係咁講」
司徒:「呃你有金執咩
機會俾晒你自己上啦」
真係估唔到佢咁諗
我係遲鈍啲啫不過唔係完全傻
咁嘅對話真係盲都知咩事
不過一定要詳細去部署之後點樣做
佢依家有feel就得啦
咁我可以進取好多
司徒真係做到野
嗰排已經考完學期最後一個試
返學日子已經唔多
冇啲咩特別活動都唔需要返去
你當半放暑假咁就得
既然係咁即係好多日子可以特登約出嚟啦
我都知好快A-Level
不過依家都係講緊出嚟一日啫,
同埋呢啲野點可以打電話講
梗係面對面最好啦
不過咁,
我要約佢都要透過打電話嘅
順便睇下佢咩反應同埋語氣
記憶中我未試過打俾佢會手震
個人會好熱,
可能嗰陣真係好緊張
中學雞係咁,
情情塔塔嘅野總係特別重視
即使依家去到埋門一腳,
都唔敢有半分鬆懈
聽到電話入面一路嘟,
個心就係咁喺度跳,
真係feel到一下一下震動
直至聽到有把我最想聽到嘅聲
先至知原來已經駁通
筱瑜:「做乜打電話嚟呀傑哥」
我:「咁你都知係我」
筱瑜:「有來電丫嘛」
睇嚟我已經緊張到傻咗
咁基本嘅野都唔記得
我:「冇呀
諗住問你」
原來真係會突然間講唔出口
以前唔明拍戲嗰啲戇鳩仔點解會講下停下
有幾難講呀
依家真係知
的而且確好難講出口
筱瑜:「問我咩呀」
我:「下個禮拜幾時要返學啫」
筱瑜:「禮拜一同禮拜四囉
今個禮拜就唔使
又唔記得晏晝先同你講完」
我:「係咩原來係咁」
筱瑜:「仲有冇野呀
冇我收線喇」
我:「唔好住啦」
筱瑜:「咁你講有咩做先得架
係咁等你又叫我唔好收線」
我記得嗰陣我同自己講
我假設司徒佢冇講大話先
依家人地都已經咁講
自己仲有咩好驚
差你一句約出嚟就搞掂
唔好理喇死就死啦
我:「冇我諗住問你聽日有咩做啫」
筱瑜:「聽日呀
好多野做呀」
我:「咁你聽日做嗰啲野
後日做得唔得呀」
筱瑜:「你講嚟聽下你要做咩先」
我:「冇諗住冇乜野做出去行街
有冇興趣」
筱瑜:「好少可喎同我行街」
我:「你知要約你有幾難
我依家都係搏一搏咋」
筱瑜:「其實呢
我諗住聽日都約一個小器鬼出嚟嘅
你知佢啦好鬼記仇
我驚約咗你佢會嬲喎」
我:「佢一定唔會嬲
如果知道你約咗我的話
佢肯定自愧不如啦」
筱瑜:「真係
咁我一陣同小器鬼講聽日唔得閒陪佢啦」
我:「你咁講即係聽日得閒」
筱瑜:「你話呢
你想去邊度就同我講啦我冇所謂呀
拜拜」
跟住佢好快就收線
一見到計劃成功,
成個人即刻飄飄然
真係好似啲球員入波咁樣
喺間房度周圍撞周圍跳
好彩冇人啫如果唔係真係捉我入青山
直至到收到一個sms先至冷靜落嚟
原來係筱瑜搵我
我心諗唔係咁撚搞笑丫嘛
會唔會無啦啦話聽日唔得呢
心情一下子跌返落去谷底
跟住諗諗下死就死啦
反正真係咁樣都冇辦法,
於是就睇咗佢個message
筱瑜:「小器鬼唔好意思呀聽日約咗人
原本諗住約你點知有人聽日約咗我
佢話你唔會介意喎」
睇完之後知道虛驚一場
就繼續喺度跳喺度撞
以前就係咁,
少少野已經咁興奮
依家先發覺容易滿足都係一種福氣。