[校園][純愛]《幸運星下的預言》: 第八十五章
冇幾耐就落到車
呢程車好犀利
因為佢係將我地嘅關係昇華至男女朋友
未上車嗰陣大家都只係朋友
點解我地會拖住隻手
咪就係因為追巴士
上到車喺邊度拖住隻手
亦都係喺巴士上面
初戀係喺巴士發生
其實真係唔光彩
同人講都驚俾人笑死
你諗下邊度浪漫
人地就喺海旁呀又或者一片大草地
我就搞笑
場地冇佈置好不特止
重要都只係因為我上到去唔記得甩開隻手先至引發後來嘅事
成個過程衰啲講,
就係錯有錯著
呢個女朋友都係誤打誤撞求返嚟
不過算啦展望將來最緊要
呢一刻唔浪漫唔代表之後唔係呢哈哈
不過話晒都啱啱拍拖
就梗係要講下保密嗰邊嘅問題啦
我:「係喎
你諗住公唔公開呀」
筱瑜:「冇所謂呀
你呢」
我:「我都冇所謂喎你話事啦」
筱瑜:「扮野
我知你有嘅」
講完之後特登搣咗我一下
男朋友就係男朋友
待遇唔同
我:「真係要講
我反而想低調啲」
可能好多巴打都唔明
拖住一個靚女點解要低調呀
咁或者真係性格問題
小弟又唔係好鍾意乜都同人講
即使對住屋企人都係
同埋依家都係啱啱拍拖
等大家穩定啲先算啦
雖然我有信心我兩個一定會好穩定
真係唔知邊度嚟嘅自信
同埋我幾享受地下情嗰個刺激
即係喺枱底拖手嗰啲呢
將其他人蒙在鼓裏
但係你同佢就好緊張
因為驚俾人見到
又唔想唔拖住喎
呢種矛盾感覺好刺激
筱瑜:「好呀冇問題」
我:「你唔嬲咩
你地啲女人唔係好鍾意高調
唉原來因為我唔係靚仔所以費事公開」
筱瑜:「痴線調轉嚟講都有嘅
佢地鍾意佢嘅事
我淨係知,
身為你女朋友嘅我
會配合你啫
同埋唔可以話自己唔靚仔
因為咁樣即係話埋我眼光唔好」
我:「咁多謝你體諒喎」
筱瑜:「梗係啦
唔體諒你
又憑咩做你女朋友」
我:「抵錫嘅啫」
筱瑜:「不過同唔同映彤講
話晒我兩個識佢咁耐
唔同佢講好似唔係咁好」
我:「ok嘅
你叫佢條友唔好咁多口囉」
筱瑜:「嗯」
講下講下都開始夜,
咁就梗係返屋企
我同平時一樣都係會送佢
我:「送你返屋企」
筱瑜:「好呀」
我:「積極咗喎
以前未聽過你話『好呀』咁樣
原來咁恨嘅」
筱瑜:「係呀拍咩認呀」
我:「以前你又唔講」
筱瑜:「以前咩身分依家咩身分呀」
我:「不過話時話真係未試過拖住你送未返屋企」
筱瑜:「咩呀點會未」
我:「有試過咩」
筱瑜:「記唔記得上年聖誕
好凍好凍嗰次呀」
我:「又好似有啲印象」
筱瑜:「嗰陣咪拖住你囉傻仔」
跟住梗係摸佢個頭
我:「犀利啦咁好記性」
筱瑜:「係呀唔好諗住呃我呀」
我:「痴線點會
咁耐嘅野都記得我就知你有幾記仇」
筱瑜:「想記咪記囉哈哈」
一路行嗰陣佢就一路拖住隻手
同埋間唔中會挨落我膊頭嗰度
一開始有講過佢同我差唔多高
所以我唔使特登就佢
佢好方便就可以挨落嚟
筱瑜:「舒服呀」
我:「呢個位係俾你
其他人唔使問,
除非你唔要嘅啫」
筱瑜:「邊個話唔要呀」
我:「你咁講就得」
筱瑜:「記唔記得嗰次我同你講過一句野」
我:「即係聖誕嗰次」
筱瑜:「我咪同你講過嘅
日後你條路有幾難行都好,
我都會好似今日咁
喺你隔離
話就話為咗配合你亂噏,
其實我嗰陣講真架」
我:「原來你咁早中箭」
筱瑜:「輕鬆啲講易啲講出口丫嘛」
我:「感動到我屁滾尿流」
筱瑜:「扮野啦你」
說好的 你怎麼忘記了