[校園][純愛]《幸運星下的預言》: 第八十八章
之前都講過啦
小弟我就係7月3號生日
今年好彩呀,
送咗個女朋友俾我
咁多年嚟計
今年嘅禮物係最大份
講真嘅,
其實佢送唔送禮物俾我真係冇所謂
佢肯同我拍拖已經係一件好豐厚嘅禮物
我唔係氹佢先咁講
可能本身我唔係對禮物有好大憧憬
所以睇得唔算好重
不過原來佢記得我幾時生日喎
筱瑜:「傑仔呀聽日你生日喎」
我:「犀利喎咁都記得」
筱瑜:「梗係啦
點會唔記得男朋友生日」
我:「有你就已經係禮物啦」
講真依家諗返起真係好骨痺
都唔知以前點樣講得出口
筱瑜:「口花花你就最叻
聽日出唔出嚟呀
話晒都係第一次我同你過生日丫」
係喎
上年今日我都未識佢
淨係知有呢個人喺度
嗰陣重係叫佢做冰美人
不拘言笑目無表情
我對佢印象就係咁多
一年之後今日我竟然拖住佢隻手
世事真係難料
我自己都估唔到今年係咁,
更加估唔到佢呢一年笑容多咗咁多
原來都唔係咁冷酷啫
我:「係喎你知唔知我以前點叫你」
筱瑜:「點叫呀」
我:「冰美人囉
靚就好靚不過冇表情」
筱瑜:「你真係睇得卡通片太多」
我:「真係咁樣覺得
你自己唔知啫」
筱瑜:「um
你都冇講錯嘅
其實依家都係」
我:「依家點會係呀
笑得咁甜乜冰都被你整融啦」
筱瑜:「唔係呀喺你隔離先係咁咋
你話你幾無聊幾低能幾傻仔」
我:「有得睇你點樣笑乜野都得啦
以前我覺得好罕有架」
筱瑜:「不過幾無聊幾低能幾傻仔都好啦
又真係幾開心嘅
得你做到咋」
我:「係嘅
話咗唔會令你失望」
筱瑜:「梗係啦你唔得咪即係我睇錯人
我要話俾自己知我冇睇錯人」
我:「呢次你一定冇睇錯」
筱瑜:「自大鬼
不過又真係嘅哈哈」
嗰晚一過十二點佢就打俾我
筱瑜:「生日快樂呀」
我:「使唔使咁準時呀」
筱瑜:「梗係要啦
男朋友生日咁大件事喎
知唔知呀我好耐冇試過十一點半都未瞓
就係為咗你」
我:「屌真係好多謝
難為你咯靚靚女朋友」
筱瑜:「聽日想唔想出嚟慶祝呀
其實呢啲野正常梗係唔使問啦
不過我見你冇乜特別講驚你唔鍾意出嚟
所以都係問定先好啲」
我:「講真丫第二個就不了
你就梗係唔同啦
出嚟囉」
筱瑜:「唱k好唔好呀」
我:「好你話點咪點囉
不過book到位咩
聽日禮拜六喎」
筱瑜:「一早搞掂啦
我諗住如果你唔鍾意咁聽日咪唔去囉
諗第二樣都得啫
依家你去就最好」
我:「有人想唱我一定識做啦」
筱瑜:「係咩邊個呀」
我:「唔知呢
嗰個人越嚟越蠱惑
趁其他人生日拎嚟自己用」
筱瑜:「唔好講到咁衰
如果你話唔鍾意唱真係可以唔去
講到我咁賤格都有嘅」
我:「終於肯認喇咩」
筱瑜:「咩呀……係呀……好啦拜拜
聽日十二點巴士站等」
佢一俾人踢爆就永遠都係咁
肯定有一句特別窒
跟住就好快唔講
咁耐以嚟都係咁
話時話又係喎
今次應該係拍拖之後,
佢第一次喺夜晚打過嚟同我傾電話
可能你地唔信啦
不過我同佢又真係未試過冚住被細細聲講電話
sms就有,
佢係嗰種好自律嘅人
除非有特別野做,
如果唔係就唔會改變生活模式
估唔到咁尊重我
我話夜晚要打機就真係冇搵我俾返啲私人空間。