[校園][純愛]《幸運星下的預言》: 第八十九章

去到第二日按照約定時間去到巴士站

筱瑜一嚟就同我講生日快樂

今日佢著得好靚

同上次一樣著返我之前講過嗰件淡黃色薄褸

當時嘅夏天唔係今日咁熱



唔熱就呃你嘅不過同依家冇得比

早幾日我落去買野上嚟食已經好似游水咁樣

真係痴撚線

講返佢

下身著短褲



成個感覺好清爽

都知今日係出去玩所以著得casual啲

又唔會太暴露

佢本身又白淨

話我擦鞋都咁話，



唔用個靚字去形容我都唔識用其他字

我:「又講生日快樂」

筱瑜:「點同呢

面對面講多次丫嘛

話晒18歲生日喎

咁重要梗係講多幾次」

我:「係咩連我自己都唔記得」

的而且確年紀越大對年齡就越唔敏感



我講我啫唔代表其他人，

同細細個唔同喇，

以前臨近生日就每日倒數住重有幾耐

依家就連18歲都唔記得

不知不覺間變得唔重視

或者我都唔明點解

筱瑜:「你唔記得唔緊要呀



我記得咪得囉

我呢個女朋友係咪好稱職」

我:「你肯做我女朋友已經幾生修到

稱唔稱職有咩所謂」

筱瑜:「調返轉咪又係」

我:「幾時開始變到咁識氹人」

筱瑜:「有人鍾意聽咪講多啲囉」

我:「係咩邊個呀」



筱瑜:「唔知喎你自己估啦」

我:「上車啦」

我到今時今日都重記得呢幾句說話

可能當時有人只係純粹為咗氹另一個人開心，

先至埋沒良心講啲說話出嚟

但係對於聽嗰個人嚟講，

一度以為係真話



你話嗰個人幾戇居。


跟住我地就去唱歌啦

我記得嗰次唔錯

兩條友可以唱四五個鐘

我知你地班鹹濕仔梗係會問

一對情侶去k房淨係唱k

哈哈我會答你真係囉

以前好單純架

其他人唔知啦，

我同佢就一定係

真真正正嘅puppy love

你地可以屌我戇鳩仔嘅

有囡都唔識食

不過話說回頭

又真係得以前先至會咁樣

對住一個女仔，

可以完全唔諗性嗰一面

真係唔知點解喇

究竟係自己單純，

定係佢令到我唔諗

曾經我都唔係好明

對住一個靚女點會唔諗呢方面

唔好扮聖人啦

不過世事無奇不有

經歷過就會知係咩感覺

原來真係會有一個人，

可以顛覆一直以嚟嘅思想架喎

唔好話做出嚟，

就連諗，

都怕會沾污咗腦入面嘅佢

腦入面嘅佢永遠都係最靚

幾時問我都係咁答

所以你話有幾低能丫，

好喇都係唔好講咁多廢話，

繼續講返唱k，

入到去佢就係咁點衛蘭

我就唱返常見嗰啲香港男歌手啦

不過記得以前幾鍾意洪卓立

貪佢夠靚仔(非gay唔使砌我生豬肉)

苦行憎三腳貓難以取替嗰期呢

筱瑜:「識你咁耐都唔知你聽開咩歌手」

我:「香港男歌手囉

嚟嚟去去都係嗰啲

洪卓立幾靚仔」

筱瑜:「係呀我都覺得」

我:「同我差唔多啦」

筱瑜:「er

今次就真係」

我:「講笑咋戇鳩」

筱瑜:「差唔多……嘅

俾面你今日生日」

跟住我地兩條友就準備喺度唱四五個鐘k

順便欣賞下佢唱成點。