[校園][純愛]《幸運星下的預言》: 第九十章
話我吹奏都咁講
佢一拎起支咪唱第一句就知佢平時有唱開
大家都知衛蘭啲歌有幾惡哽
高音不特止重要長氣
肺活量少啲都唔掂
佢竟然全部handle到
或者係我唔識聽歌啦哈哈
就乜都話好
唔識音樂呀冇計啦
同埋我見佢真係死忠
點解咁講
因為我留意到佢唱嗰陣根本就冇望歌詞
不過又冇錯喎
尤其兩段副歌歌詞上有少少改動不過又唔係成段唔同嗰啲呢
又或者好似雜技呢啲歌咁
副歌有幾句長到呀媽都唔認得
「施展魔鬼的嫵媚」之後嗰幾句呀
我見佢望都冇望過就輕鬆搞掂
高音上得好自然
真係唔惹少
我:「好聽喎」
筱瑜:「多謝喎
雖然我覺得你只係想氹我」
我:「今次真係講堅」
筱瑜:「哦
即係之前唔係啦」
我:「之前都係
不過今次更加係咁解啫」
筱瑜:「最叻就係講歪理」
我:「對住你先係咁咋」
筱瑜:「點歌呀點歌呀」
我:「有呀未嚟啫
係喎你係咪點晒衛蘭」
筱瑜:「唔係呀
有一首唔會點」
我:「邊隻呀」
筱瑜:「『為任性苦因好勝痛的我
只想有日有可能等到你肯改過』,
呢首一定唔會點」
我:「哦
我知喇」
筱瑜:「你又知
唔係好hit咋喎」
我:「你有聽我咪聽囉
你send過俾我丫嘛
我依家個playlist
衛蘭啲歌應該係佔得最多」
筱瑜:「識貨」
我:「我就不嬲冇吹水嘅
信未先」
筱瑜:「嗯
信你喇」
跟住我地就一路拖手一路唱歌
個感覺真係好正,
成間房重要冇人
光明正大拖住都唔驚啦。
我地兩個真係循規蹈矩
喺k房就係唱歌
不過歡樂時光從來都係過得特別快
轉下眼又要離場
筱瑜:「犀利喎唱歌原來咁好聽」
我:「邊個你玩丫靚女」
我同佢拍完拖之後
傾計個模式都係冇變
因為筱瑜嗰陣講過唔想因為拍拖之後改變傾計個模式
唔自然就不如唔好改
講真架我曾經有一刻諗過,
拍拖之後我同佢點樣傾計呢
好似之前咁丫定係一個男朋友嘅角色同佢傾呢
後來我發覺自己真係好撚無聊
可能真係初戀掛
乜都唔識遑論有咩經驗呢,
有時係諗得多啲架喇
都係筱瑜講得好,
佢有同我講過
「我鍾意嘅係一個唔刻意扮出嚟嘅你
享受同一個自然嘅你相處,
唔使俾男朋友呢個身份框住」
就係佢講呢幾句說話我成個人先至鬆晒
呢啲野我冇同佢講過
點講得出口丫
講返嗰陣先,
筱瑜:「唔係呀我真係覺得你唱得好好聽
真心唔係扮野」
我:「講真我覺得自己把聲好難聽
呢次真係堅嘅」
呢個的確係我由心而發講出嚟嘅
我到依家whatsapp從來都唔會錄音
就係驚有時撳錯聽到自己把聲
無謂搞到人啦
筱瑜:「唔緊要呀我好鍾意聽呀
其實我都相信冇乜人會唔鍾意你唱歌把聲」
我:「屌你落足鞋油喎
係咪有咩企圖」
跟住將佢即刻拉過嚟我個人嗰度
不過佢就貼唔到我心口
因為佢同我差唔多高咋
男朋友就係有呢啲權利
筱瑜:「搞錯呀咁都懷疑我
真心覺得好聽你又諗到咁誇張
嚟緊會唔會上枱唱歌」
我:「梗係唔得啦屌
一上去我就腳震啦」
筱瑜:「係喎你上去唱得咁好聽
聽完之後咁咪大把人同我爭」
我:「傻豬啦
你估我個個睇上眼咩」
筱瑜:「講笑咋
不嬲都好信你」
少女真係少女
佢都唔例外
好鍾意聽呢啲說話
筱瑜:「街頭表演有冇得諗
我真係覺得你唱得好好聽」
我:「唔得啦淆底呀屌」
嗰陣busking唔係依家咁普及
通街都有人喺度唱,
你經過時代出面又或者尖東碼頭梗係見到一班人喺度
筱瑜:「一齊唱啦我地
唔驚喎我拖住你壯膽
喺邊度我都會企你隔離」
我:「好呀好呀好呀」
筱瑜:「唔好走數呀
我當你講好咗呀」
我:「痴線有邊次走過你數」
筱瑜:「又係喎哈哈」
我:「爭住先有拖冇欠」
筱瑜:「本身講笑依家好似講到真咁嘅」
我:「下你唔係講真嘅咩」
筱瑜:「原本唔係依家係囉」
我:「到時我降key唱衛蘭
你睇住嚟啦」
筱瑜:「得喎」
我:「得還得依家食野先」
筱瑜:「嗯」